Read Buku Loyera - Chichewa 1 Maf. 1 Bible Online

1 Maf. 1 - Buku Loyera - Chichewa bible

1 Maf. 1

¹Mfumu Davide anali wokalamba kwambiri. Ndipo ngakhale ankamufunditsa mabulangete, sankamvabe kufunda.

²Nchifukwa chake nduna zake zidamuuza kuti, “Inu amfumu, tikupezereni namwali woti azikusungani ndi kumakusamalani. Namwaliyo azigona pafupi nanu kuti inu amfumu muzifundidwa.”

³Choncho adafunafuna namwali wokongola m'dziko lonse la Israele, ndipo adapeza Abisagi wa ku Sunamu, nabwera naye kwa mfumu.

⁴Namwaliyo anali wokongola kwambiri. Tsono adakhala wosamala mfumu ndi kumaitumikira. Koma mfumuyo sidakhale naye malo amodzi namwaliyo.

⁵ Tsono Adoniya, mwana wa Hagiti, adayamba kudzikuza namanena kuti, “Ndidzakhala mfumu ndine.” Motero adadzipezera magaleta ndi anthu okwera pa akavalo, ndiponso anthu operekeza makumi asanu oti azithamanga patsogolo pake.

⁶Bambo wake Davide anali asanamdzudzulepo nkamodzi komwe pomufunsa kuti, “Kodi zakutizakutizi ukuchitiranji?” Adoniyayo anali wokongola, ndipo adaapondana ndi Abisalomu.

⁷Iyeyo adapangana ndi Yowabu, mwana wa Zeruya, ndiponso Abiyatara wansembe. Choncho iwowo adamtsata Adoniya namamthandiza.

⁸Koma Zadoki wansembe, ndi Benaya mwana wa Yehoyada, ndiponso mneneri Natani, Simei, Rei, pamodzi ndi anthu amphamvu aja a Davide, sadamtsate Adoniyayo.

⁹Tsiku lina Adoniya adapereka nsembe za nkhosa, ng'ombe ndiponso anaang'ombe onenepa ku Mwala wa Njoka umene uli pafupi ndi Enirogele. Adaitana abale ake onse, ana a mfumu, ndi akazembe onse a ku Yuda.

¹⁰Koma sadaitaneko mneneri Natani, Benaya, anthu amphamvu aja a mfumu Davide, kapenanso Solomoni mbale wake.

¹¹ Natani adafunsa Bateseba, mai wa Solomoni, kuti, “Kodi simudamve kuti Adoniya, mwana wa Hagiti, wadzilonga ufumu, chikhalirecho Davide mbuyathu sakuzidziŵa zimenezo?

¹²Nchifukwa chake tsono ndikupatseni nzeru kuti mupulumutse moyo wanu pamodzi ndi moyo wa mwana wanu Solomoni.

¹³Pitani msanga kwa mfumu Davide, mukamfunse kuti, ‘Kodi inu mbuyanga mfumu, suja mudandilonjeza molumbira ine mdzakazi wanu, kuti mwana wanga Solomoni ndiye amene adzaloŵe ufumu m'malo mwanu nadzakhala pa mpando wanu m'malo mwanu? Nanga chifukwa chiyani Adoniya waloŵa ufumu?’

¹⁴Tsono pamene inu muzikalankhula ndi mfumu, inenso ndidzaloŵa pambuyo panu, kuti ndikachitire umboni mau anuwo.”

¹⁵Choncho Bateseba adapita kwa mfumu, nakaloŵa m'chipinda chake. (Apo nkuti mfumuyo itakalamba kotheratu, ndipo Abisagi Msunamu uja ankasamala mfumuyo).

¹⁶Bateseba adagwada nalambira mfumu. Tsono mfumu idamufunsa kuti, “Kodi nkwabwino?”

¹⁷Bateseba adati, “Ai nkwabwino. Koma mbuyanga, paja inu mudaandilonjeza molumbira ine mdzakazi wanu m'dzina la Chauta Mulungu wanu kuti, ‘Solomoni mwana wako ndiye amene adzaloŵe ufumu m'malo mwanga, nadzakhala pa mpando wanga.’

¹⁸Komabe tsono, onani, Adoniya wadzilonga ufumu, inuyo mbuyanga osazidziŵa zimenezo.

¹⁹Iyeyo wapha ng'ombe, anaang'ombe onenepa, ndiponso nkhosa zambiri, kuperekera nsembe, ndipo waitana ana anu onse, wansembe Abiyatara ndiponso Yowabu mkulu wankhondo. Solomoni mwana wanu sadamuitaneko ai.

²⁰Mwakuti tsopano, mbuyanga mfumu, maso a Aisraele onse ali pa inu, kuti muŵauze munthu amene adzakhale pa mpando wanu waufumu, m'malo mwanu.

²¹Mukapanda kutero, zidzachitike nzakuti inu mbuyanga mutatisiya, kulondola kumene kudapita makolo anu, ine pamodzi ndi mwana wanga Solomoni adzatiyesa ogalukira mfumu.”

²²Tsono Batesebayo akulankhula ndi mfumu, mneneri Natani adaloŵa.

²³Anthu adauza mfumu kuti, “Kwafika mneneri Natani.” Tsono iye atafika pamaso pa mfumu, adaŵeramitsa mutu wake pansi.

²⁴Ndipo adafunsa mfumu kuti, “Mbuyanga mfumu, kodi inu mudalengeza zoti Adoniya ndiye adzakhale mfumu ndi kukhala pampando panu?

²⁵Pakuti lero lomwe lino wakapha ng'ombe, anaang'ombe onenepa, ndi nkhosa zambiri, kuperekera nsembe. Ndipo waitana ana anu onse pamodzi ndi Yowabu mkulu wa ankhondo, ndi wansembe Abiyatara. Onsewo akudya ndi kumwa naye Adoniyayo tsopano lino, ndipo akunena kuti, ‘Adzachite kufa ndi ukalamba mfumu Adoniya.’

²⁶Koma ine mtumiki wanu, wansembe Zadoki ndi Benaya mwana wa Yehoyada, ndiponso Solomoni mwana wanu, tonsefe sadatiitaneko.

²⁷Kodi zimenezi mwalamula ndinu mbuyanga mfumu? Bwanji nanga simudauze anthu anu za mwana amene adzakhale pa mpando wanu waufumu m'malo mwanu?”

²⁸Apo mfumu Davide adati, “Mundiitanire Bateseba, abwere kuno.” Bateseba adaloŵa, nakaimirira pamaso pa mfumu.

²⁹Ndipo mfumu idalumbira kuti, “Pali Chauta wamoyo, amene adapulumutsa moyo wanga ku mavuto onse,

³⁰monga momwe ndidaakulonjezera molumbira m'dzina la Chauta, Mulungu wa Israele, kuti mwana wako Solomoni ndiye amene adzaloŵe ufumu ndi kukhala pa mpando wanga, m'malo mwanga, ndikubwerezanso zomwezo lero.”

³¹Pomwepo Bateseba adaŵeramitsa mutu wake pansi nalambira mfumu, nati, “Mbuyanga mfumu Davide akhale ndi moyo mpaka muyaya!”

³²Pamenepo mfumu Davide adati, “Mundiitanire wansembe Zadoki, mneneri Natani, ndi Benaya mwana wa Yehoyada.” Onsewo adafika pamaso pa mfumu.

³³Tsono mfumu idaŵauza kuti, “Tengani anthu anga, ndipo mukweze Solomoni mwana wanga pa bulu wanga, mupite naye ku Gihoni.

³⁴Kumeneko wansembe Zadoki ndi mneneri Natani akamdzoze kuti akhale mfumu yolamulira Israele. Kenaka mukalize lipenga, ndi kufuula kuti, ‘Achite kufa ndi ukalamba mfumu Solomoni.’

³⁵Tsono inu muzikamtsata pambuyo pobwerera kuno, kudzakhala pa mpando wanga waufumu. Iyeyo ndiye akhale mfumu m'malo mwanga. Ndamsankha iyeyo kuti akhale wolamulira Israele ndi Yuda.”

³⁶Apo Benaya mwana wa Yehoyada adayankha kuti, “Indedi, zichitikedi motero. Chauta, Mulungu wa mbuyanga mfumu, akwaniritse zimenezi.

³⁷Monga momwe Chauta wakhalira nanu mbuyanga mfumu, momwemonso akhale ndi Solomoni, ndipo ufumu wake aukweze ndithu, ngakhale kupambana ufumu wanu, mbuyanga mfumu Davide.”

³⁸Tsono wansembe Zadoki, mneneri Natani ndi Benaya mwana wa Yehoyada, ndiponso Akereti ndi Apeleti oteteza mfumu aja, adapita nakamkweza Solomoni pa bulu wa mfumu Davide, kupita naye ku Gihoni.

³⁹Kumeneko wansembe Zadoki adatenga nsupa ya mafuta ya ku hema la Chauta, nadzoza Solomoni. Pomwepo adaliza lipenga, ndipo anthu onsewo adafuula kuti, “Achite kufa ndi ukalamba mfumu Solomoni!”

⁴⁰Anthuwo adapita namamtsatira pambuyo akuliza zitoliro ndi kukondwerera kwambiri, kotero kuti dziko lidagwedezeka chifukwa cha phokosolo.

⁴¹Pamene Adoniya ndi anthu onse oitanidwa amene anali naye ankamaliza madyerero ao, adalimva phokosolo. Yowabu atamva kulira kwalipenga, adafunsa kuti, “Kodi phokoso limeneli mumzindamo, kwachitikanji?”

⁴²Akulankhulabe, adangoona Yonatani mwana wa wansembe Abiyatara wafika. Adoniya adamuuza kuti, “Loŵa, chifukwa ndiwe munthu wabwino, mwina mwake wabwera ndi uthenga wabwino.”

⁴³Tsono Yonatani adayankha kuti, “Iyai, zinthu zaipa uku! Mbuyathu mfumu Davide walonga Solomoni ufumu.

⁴⁴Adatuma wansembe Zadoki, mneneri Natani, ndi Benaya mwana wa Yehoyada ndiponso Akereti ndi Apeleti ku Gihoni. Ndipo iwo adamkweza Solomoniyo pa bulu wa mfumu.

⁴⁵Tsono Zadoki wansembe uja ndi mneneri Natani adamdzoza Solomoni ku Gihoniko kuti akhale mfumu. Ndipo kuchokera kumeneko akhala akukondwerera, kotero kuti mumzinda monse muli phokoso. Ndiye lumbwe mwamvali.

⁴⁶Solomoni wakhala pa mpando waufumu.

⁴⁷Kuwonjezera pamenepo, nduna za mfumu zidadzamuyamika mbuyathu mfumu Davide nkumanena kuti, ‘Mulungu wanu akweze dzina la Solomoni kupambana dzina lanu, ndipo akweze ufumu wake kupambana ufumu wanu.’ Ndipo mfumu idaŵerama niyamba kupemphera pa bedi.

⁴⁸Idati, ‘Atamandike Chauta, Mulungu wa Aisraele, amene lero walola kuti mmodzi mwa ana anga akhale pa mpando wanga waufumu, ine ndemwe ndikuwona.’ ”

⁴⁹Pomwepo anthu onse amene Adoniya adaaŵaitana aja adayamba kunjenjemera, ndipo adamwazikana aliyense kumapita kwao.

⁵⁰Pamenepo Adoniya adayamba kuwopa Solomoni. Adapita ku Nyumba ya Mulungu nakagwira nsonga za guwa lansembe.

⁵¹Tsono ena adauza Solomoni kuti, “Adoniya akukuwopani, inu mfumu Solomoni, ndipo wakagwira nsonga za guwa lansembe, ndipo akunena kuti poyamba afuna kuti inu mfumu Solomoni mulumbire kuti simudzamupha mtumiki wanuyo.”

⁵²Solomoni adati, “Iyeyo akakhala womvera, sitimchita choipa chilichonse, koma akakhala woipa mtima, adzafa basi.”

⁵³Kenaka mfumu Solomoni adatuma anthu kukamtenga Adoniya kuguwa kuja. Iye adabwera kudzalambira mfumu Solomoni. Ndipo Solomoni adamuuza kuti, “Chabwino, ungathe kupita kunyumba kwako.”