Read Buku Loyera - Chichewa 1 Maf. 22 Bible Online

1 Maf. 22 - Buku Loyera - Chichewa bible

1 Maf. 22

¹Padapita zaka zitatu popanda nkhondo pakati pa Siriya ndi Israele.

²Pa chaka chachitatu Yehosafati mfumu ya ku Yuda adakacheza kwa Ahabu, mfumu ya ku Israele.

³Tsono Ahabu adafunsa aphungu ake kuti, “Ramoti-Giliyadi ndi mzinda wathu, nanga chifukwa chiyani ife tikukhala chete, osaulanda kwa mfumu ya ku Siriya?”

⁴Ndipo adafunsa Yehosafati kuti, “Kodi udzapita nane limodzi ku nkhondo ku Ramoti-Giliyadi?” Yehosafati adauza mfumu ya ku Israeleyo kuti, “Ine ndili nanu limodzi, anthu anga nganu, akavalo anga nganunso.”

⁵Yehosafati adauza Ahabu kuti, “Poyamba upemphe nzeru kwa Chauta.”

⁶Tsono Ahabu adasonkhanitsa aneneri ake okwanira ngati 400, ndipo adaŵafunsa kuti, “Kodi ndipite kukamenyana nkhondo ndi Ramoti-Giliyadi, kaya kapena ndileke?” Aneneriwo adamuuza kuti, “Pitani, pakuti Ambuye aupereka mzindawo kwa inu mfumu.”

⁷Koma Yehosafati adafunsa kuti, “Kodi pano palibe mneneri wina wa Chauta woti timpempheko nzeru?”

⁸Ahabu adauza Yehosafati kuti, “Alipo munthu wina amene angapemphe nzeru kwa Chauta, dzina lake ndi Mikaya, mwana wa Imila. Koma ine ndimadana naye ameneyo popeza kuti sandilosera zabwino koma zoipa.” Tsono Yehosafati adati, “Iyai mfumu, msatero.”

⁹Apo Ahabu adaitana imodzi mwa nduna zake nkuiwuza kuti, “Takaitanani Mikaya, mwana wa Imila, abwere kuno msanga.”

¹⁰Nthaŵi imeneyo mfumu ya ku Israele ndi Yehosafati mfumu ya ku Yuda adaakhala pa mipando yao yaufumu, atavala zovala zao zaufumu. Pamenepo panali pa bwalo lopererapo tirigu, pa khomo la pa chipata cha Samariya. Ndipo aneneri onse ankalosa pamaso pa mafumuwo.

¹¹Wina mwa iwo, Zedeki, mwana wa Kenana adaadzisulira nyanga zachitsulo. Iyeyo adati, “Chauta akunena kuti, ‘Ndi nyangazi iwe udzagonjetsa Asiriya mpaka kuŵaonongeratu.’ ”

¹²Aneneri onsewo adalosa chimodzimodzi, adati, “Pitani ku Ramoti-Giliyadi, ndipo mukapambana. Chauta aupereka mzindawo kwa inu mfumu.”

¹³Wamthenga uja amene adaapita kukaitana Mikaya namuuza kuti, “Onani, mau onse amene akunena aneneri, akulosera mfumu zabwino. Ndiye nanunso mau anu akhale ofanafana ndi mau aowo. Muzilosa zabwino.”

¹⁴Koma Mikaya adati, “Pali Chauta wamoyo, zimene Chautayo andiwuze, ndizo ndidzalankhule.”

¹⁵Tsono atafika kwa Ahabu, mfumuyo idamfunsa kuti, “Kodi Mikaya, ife tipite kukamenya nkhondo ku Ramoti-Giliyadi, kapena tileke?” Iye adayankha kuti, “Pitani, mukapambana. Chauta adzaupereka mzindawo kwa inu amfumu.”

¹⁶Koma mfumuyo idamufunsa kuti, “Kodi ndikulumbiritse kangati, kuti undiwuze zoona zokhazokha m'dzina la Chauta?”

¹⁷ Mikaya adati, “Ndidaona Aisraele onse atamwazikana pa mapiri ngati nkhosa zopanda mbusa. Tsono Chauta adati, ‘Ameneŵa alibe mbuyawo. Aliyense apite kwao mwamtendere.’ ”

¹⁸Pamenepo mfumu ya ku Israele idafunsa Yehosafati kuti. “Suja ndidaakuuzani kuti ameneyu sadzandilosera zabwino, koma zoipa zokha?”

¹⁹ Apo Mikaya adati, “Nchifukwa chake mverani mau a Chauta. Ine ndidapenya Chauta atakhala pa mpando wake waufumu, gulu lonse lakumwamba litaima ku dzanja lake lamanja ndi ku dzanja lake lamanzere.

²⁰Tsono Chauta adati, ‘Kodi ndani amene akanyengerere Ahabu kuti akafe ku Ramoti-Giliyadi?’ Wina ankanena zina, winanso nkumanena zina.

²¹Apo mzimu wina udadzaima pamaso pa Chauta nunena kuti, ‘Ndikamnyengerera ndine.’

²²Tsono Chauta adaufunsa kuti, ‘Ukamnyengerera bwanji?’ Mzimuwo udati, ‘Ndidzapita nkumakanena zabodza kudzera mwa aneneri ake onse.’ Pamenepo Chauta adati, ‘Ukakatero, ukakhozadi. Pita ukamnyengerere.’

²³Tsonotu Chauta waika bodza m'kamwa mwa aneneri anu onseŵa, ndiye kuti Iye yemwe waneneratu kuti mukaona tsoka.”

²⁴Tsono Zedeki uja, mwana wa Kenana, adadza pafupi namenya Mikaya pa tsaya, namufunsa kuti, “Kodi mzimu wa Chauta udadzera njira iti kuti uchoke mwa ine, uzikalankhula ndi iwe?”

²⁵Mikaya adayankha kuti, “Udzadziŵa pa tsiku limene uzikaloŵa m'chipinda china ndi china cham'kati kuti ukabisale.”

²⁶Pamenepo Ahabu, mfumu ya ku Israele, adati, “Mgwireni Mikayayu, mupite naye kwa Amoni, mkulu wa mzinda, ndiponso kwa Yowasi, mwana wa mfumu.

²⁷Mukaŵauze mau angaŵa akuti, ‘Munthu uyu muikeni m'ndende ndipo muzimpatsa chakudya pang'ono ndi madzi pang'ono mpaka nditabwerera mwamtendere.’ ”

²⁸Mikaya adati, “Mukabwerera mwamtendere, ndiye kuti Chauta sadalankhule kudzera mwa ine.” Ndipo adaonjeza kuti, “Mumve anthu nonsenu zimene ndanenazi!”

²⁹Zitatero, Ahabu mfumu ya ku Israele ndi Yehosafati mfumu ya ku Yuda adapita ku Ramoti-Giliyadi.

³⁰Mfumu ya ku Israele idauza Yehosafati kuti, “Ine ndidzizimbaitsa, ndipo ndipita kunkhondoko, koma iwe uvale malaya ako aufumu.” Choncho mfumu ya ku Israele idadzizimbayitsa onsewo nkupita ku nkhondo.

³¹Mfumu ya ku Siriya nkuti italamula akapitao a magaleta okwanira 32, kuti asamenye nkhondo ndi wina aliyense, wamng'ono kapena wamkulu, koma mfumu ya ku Israele basi.

³²Tsono pamene akapitao a magaletawo adaona Yehosafati, adati, “Ndithudi ameneyo ndiye mfumu ya ku Israele.” Choncho adabwerera kudzalimbana naye. Yehosafati adayamba kufuula.

³³Apo akapitao a magaleta aja adaona kuti si mfumu ya ku Israele, ndipo adabwerera osamtsatanso.

³⁴Koma Msiriya wina adakoka uta wake mwachiponyeponye, ndipo adalasa mfumu ya ku Israele pa maluma a malaya ake achitsulo. Pamenepo mfumuyo idauza munthu woyendetsa galeta lake kuti, “Tembenuka, ndipo undichotse pankhondo pano poti ndavulazidwa.”

³⁵Nkhondo idakula kwambiri tsiku limenelo, mwakuti mfumu ija adangoisiya ili tsonga m'galeta lake atayang'anana ndi Asiriya, mpaka mfumuyo idafa madzulo. Monsemo nkuti magazi akutayikira pansi pa galetalo.

³⁶Pamene dzuŵa linkaloŵa kudamveka mfuu wa ankhondo kuti, “Aliyense apite ku mzinda wakwao, aliyense apite ku dziko lakwao.”

³⁷Motero mfumu ija idafa, ndipo anthu adapita nayo ku Samariya, nakaiika m'manda kumeneko.

³⁸Anthu aja adatsuka galeta lija ku chidziŵe cha ku Samariya, kumene akazi adama ankasamba. Ndipo agalu adayamba kunyambita magazi a mfumuyo, potsata mau amene Chauta adaalankhula.

³⁹Tsono ntchito zina za Ahabu ndi zonse zimene adazichita, kudzanso za nyumba ya minyanga ya njovu yomwe adaimanga, ndiponso za mizinda yonse imene adaimanga, zonsezo zidalembedwa m'buku la Mbiri ya Mafumu a ku Israele.

⁴⁰Choncho Ahabu adamwalira, kulondola makolo ake naikidwa m'manda. Ahaziya mwana wake adaloŵa ufumu m'malo mwake.

⁴¹Yehosafati, mwana wa Asa, adayamba kulamulira ku Yuda pa chaka chachinai cha ufumu wa Ahabu, mfumu ya ku Israele.

⁴²Yehosafatiyo anali wa zaka 35 pamene adaloŵa ufumu, ndipo adalamulira zaka 25 ku Yerusalemu. Mai wake anali Azuba, mwana wa Sili.

⁴³Yehosafati ankayenda motsata chitsanzo chabwino cha atate ake. Sadapatuke pa zimenezo. Ankachita zolungama pamaso pa Chauta. Komabe akachisi opembedzerako mafano sadaŵawononge, mwakuti anthu ankaperekabe nsembe ndipo ankafukizabe lubani pa malowo.

⁴⁴Chinanso nchakuti Yehosafati adapangana za mtendere ndi mfumu ya ku Israele.

⁴⁵Tsono ntchito zina zonse za Yehosafati, mphamvu zimene adaonetsa, ndiponso maponyedwe ake a nkhondo, zonsezo zidalembedwa m'buku la Mbiri ya Mafumu a ku Yuda.

⁴⁶Chinanso ndiye kuti Yehosafati adapirikitsa gulu lotsalira la anthu ochitana zadama ku malo achipembedzo, amene anali adakalipo pa nthaŵi ya Asa, bambo wake.

⁴⁷Masiku amenewo ku Edomu kunalibe mfumu, koma kunali nduna yaikulu chabe yoikidwa ndi mfumu ya ku Yuda.

⁴⁸Tsono Yehosafati adapanga zombo zazikulu zomapita ku Ofiri kukatenga golide. Koma zombozo sizidayende chifukwa zidaaonongeka ku Eziyoni-Gebere.

⁴⁹Tsono Ahaziya mwana wa Ahabu, adauza Yehosafati kuti, “Amalinyero anga apite limodzi ndi amalinyero anu pa zombo.” Koma Yehosafati sadavomere zimenezi.

⁵⁰Pambuyo pake Yehosafati adamwalira, naikidwa m'manda momwe adaaikidwa makolo akewo mu mzinda wa Davide. Ndipo Yehoramu mwana wake adaloŵa ufumu m'malo mwake.

⁵¹Tsono Ahaziya mwana wa Ahabu, adaloŵa ufumu wa Ku Israele ku Samariya pa chaka cha 17 cha ufumu wa Yehosafati, mfumu ya ku Yuda. Ndipo adalamulira anthu a ku Israele zaka ziŵiri.

⁵²Iyeyo ankachita zoipa pamaso pa Chauta, ankatsata mayendedwe oipa a atate ake ndi amai ake. Ankatsatanso zoipa za Yerobowamu, mwana wa Nebati, amene ankachimwitsa kwambiri anthu a ku Israele.

⁵³Ahaziyayo ankatumikira Baala ndi kumampembedza, ndipo potero adaputa mkwiyo wa Chauta, Mulungu wa Aisraele, potsata zonse zimene atate ake ankachita.