Read Buku Loyera - Chichewa 2 Maf. 11 Bible Online

2 Maf. 11 - Buku Loyera - Chichewa bible

2 Maf. 11

¹Ataliya, mai wake wa Ahaziya, ataona kuti mwana wake wafa, adanyamuka nakaononga onse a pa banja laufumu.

²Koma Yehoseba, mwana wamkazi wa mfumu Yehoramu, mlongo wake wa Ahaziya, adatenga Yowasi, mwana wa Ahaziya. Adachita momuba, kumchotsa pakati pa ana aamuna a mfumu amene ankati aŵaphewo. Adamuika m'chipinda china chogona cha m'Nyumba ya Chauta pamodzi ndi mlezi wake. Motero adamubisa mwanayo, kubisira Ataliya, kotero kuti sadaphedwe.

³Mwanayo adakhala ndi mlezi wake zaka zisanu ndi chimodzi akubisala m'Nyumba ya Chauta, pamene Ataliya ankalamulira dzikolo.

⁴Koma chaka chachisanu ndi chiŵiri, wansembe Yehoyada adatumiza mau kukaitana atsogoleri a asilikali olonda mfumu ndipo a alonda a nyumba yaufumu. Adabwera nawo kwa Yehoyada ku Nyumba ya Chauta. Tsono adapangana nawo chipangano ndipo adaŵalumbiritsa m'Nyumba ya Chauta. Kenaka adaŵaonetsa mwana wamwamuna wa mfumu uja,

⁵naŵalamula kuti, “Zimene mudzachite ndi izi: Inu a m'chigaŵo chija choyamba, amene mukudzatumikira pa Sabata, mugaŵikane patatu: gulu limodzi lidzalonde ku nyumba ya mfumu;

⁶gulu lachiŵiri lidzalonde pa Chipata cha Suri, gulu lachitatu lidzalonde pa chipata cha kumbuyo kwa asilikali, azilonda pa zipata zoloŵera ku Nyumba ya Chauta.

⁷Tsono enawo a m'zigawo ziŵiri zija odzaŵeruka ntchito pa Sabata, iwo adzalonde ku Nyumba ya Chauta, kuti aziteteza mfumu.

⁸Mudzazungulire mfumuyo, aliyense atatenga zida m'manja. Wina aliyense amene at ayandikire pafupi, aphedwe. Muzikhala nayo mfumu kulikonse kumene iziyenda.”

⁹Atsogoleriwo adachitadi zonse monga m'mene wansembe Yehoyada adaŵalamulira. Aliyense adabwera ndi anthu ake amene ankadzayamba ntchito yao pa Sabata, pamodzinso ndi anthu amene ankasiya ntchito yao kulonda pa Sabata. Onsewo adafika kwa Yehoyada wansembe uja.

¹⁰Wansembeyo adapatsa atsogoleri aja mikondo ndi zishango, zimene zidaali za mfumu Davide. Zimenezi zinkasungidwa m'Nyumba ya Chauta.

¹¹Tsono adandanditsa asilikaliwo kuti aziteteza mfumu, aliyense ali ndi zida m'manja mwake, kuzungulira guwalo ndiponso Nyumbayo.

¹²Kenaka adaŵatulutsira mwana wa mfumu, namuveka chisoti chaufumu, nkumupatsa buku la malamulo, ndipo adamdzoza namlonga ufumu. Anthu adamuwombera m'manja nkunena mofuula kuti, “Amfumu akhale ndi moyo wautali.”

¹³Tsono mfumukazi Ataliya, atamva phokoso la asilikali ndi la anthu, adapita ku Nyumba ya Chauta.

¹⁴ Atayang'ana, adaona mfumu itaima pa nsanja yake potsata mwambo wachifumu, atsogoleri ndi anthu oimba malipenga ali pafupi ndi mfumuyo. Anthu onse am'deralo ankakondwa, namaimba malipenga. Pamenepo Ataliyayo adang'amba zovala zake, ndipo mofuula adati, “Akundiwukira! Akundiwukira!”

¹⁵Tsono wansembe Yehoyada adalamula atsogoleri a gulu lankhondo aja kuti, “Mtulutseni ameneyu pakati pa mizere mwandandayo. Ndipo aliyense amene amtsate, mumuphe ndi lupanga.” Wansembeyo adaanenadi kuti, “Musamphere m'Nyumba ya Chauta ai.”

¹⁶Choncho anthuwo adamgwira Ataliya uja, ndipo atafika naye ku nyumba ya mfumu, pakhomo lotchedwa la Akavalo, adamuphera pamenepo.

¹⁷Tsono Yehoyada adachititsa chipangano pakati pa Chauta ndi mfumu pamodzi ndi anthu ake, kuti iwowo akhale anthu akeake a Chauta. Anthuwo adachitanso chipangano ndi mfumu,

¹⁸Choncho anthu onse a m'dzikomo adapita ku nyumba ya Baala nakaigwetsa. Maguwa ake ndi mafano ake adaŵaphwanyaphwanya. Kenako adapha Matani wansembe wa Baala patsogolo pa maguwa pomwepo. Tsono wansembe Yehoyada adaika alonda ku Nyumba ya Chauta.

¹⁹Pambuyo pake iyeyo adandanditsa atsogoleri a ankhondo, asilikali olonda mfumu, alonda a nyumba ya mfumu, ndi anthu onse a m'dzikomo. Onsewo adaperekeza mfumu kuchokera ku Nyumba ya Chauta, nadzera ku chipata cha alonda mpaka kukafika ku nyumba ya mfumu. Pomwepo Yowasi adakhala pa mpando waufumu.

²⁰Motero anthu am'dzikomo adakondwa. Ndipo mumzindamo mudakhala bata, Ataliya ataphedwa ku nyumba ya mfumu.

²¹Yowasiyo anali wa zaka zisanu ndi ziŵiri pamene adaloŵa ufumu.