Read Buku Loyera - Chichewa 2 Maf. 16 Bible Online

2 Maf. 16 - Buku Loyera - Chichewa bible

2 Maf. 16

¹Chaka cha 17 cha ufumu wa Peka mwana wa Remaliya, Ahazi mwana wa Yotamu mfumu ya ku Yuda, adaloŵa ufumu.

²Ahazi anali wa zaka 20 pamene adaloŵa ufumu ndipo adalamulira zaka 16 ku Yerusalemu. Iyeyo sadachite zolungama pamaso pa Chauta monga m'mene Davide kholo lake ankachitira.

³ Koma adatsata zitsanzo zoipa za mafumu a ku Israele. Adapereka mwana wake wamwamuna ngati nsembe yopsereza potsatira miyambo yonyansa ya anthu a mitundu ina imene Chauta adaaipirikitsa m'dzikomo pamene ankafika Aisraele.

⁴Ndipo ankapereka nsembe ndi namafukiza lubani ku akachisi opembedzerako mafano, pa mapiri ndi patsinde pa mtengo uliwonse wogudira.

⁵ Tsono Rezini mfumu ya ku Siriya ndi Peka mwana wa Remaliya mfumu ya ku Israele adabwera kudzathira nkhondo Yerusalemu namzinga Ahazi ndi zithando zankhondo, koma sadathe kumgonjetsa.

⁶Nthaŵi imeneyo Rezini mfumu ya ku Edomu[8] adapirikitsa Ayuda ku Elati, nalanda mzindawo, kuubwezera kwa Aedomu, ndipo iwo adakhala kumeneko mpaka lero lino.

⁷Pamenepo Ahazi adatuma amithenga kwa Tigilati-Pilesere mfumu ya ku Asiriya kukanena kuti, “Ine ndine mwana wanu ndiponso mtumiki wanu. Bwerani mudzandipulumutse kwa mfumu ya ku Siriya ndi kwa mfumu ya ku Israele, amene akundithira nkhondo.”

⁸Ndipo Ahazi adatenga siliva ndi golide amene adampeza m'Nyumba ya Chauta ndi mosungira chuma cha ku nyumba ya mfumu, namtumiza kwa mfumu ya ku Asiriya kuti zikhale ngati mphatso.

⁹Tsono mfumu ya ku Asiriya idamvera Ahazi ndipo idakathira nkhondo Damasiko nilanda mzindawo ndi kupha Rezini. Anthu ake idaŵatenga ukapolo kupita nawo ku Kiri.

¹⁰Pamene mfumu Ahazi adapita ku Damasiko kuti akakumane ndi Tigilati-Pilesere mfumu ya ku Asiriya, adaonako guwa kumeneko. Tsono adatumizira wansembe Uriya chitsanzo chake cha guwalo ndi maonekedwe ake, osasiyapo nkanthu komwe.

¹¹Ndiye wansembe Uriya adamanga guwalo, Mfumu Ahazi asanafike kuchokera ku Damasiko. Adalimanga potsata chitsanzo chimene Ahazi adaatumiza kuchokera ku Damasiko.

¹²Mfumu itabwera kuchokera ku Damasiko, nipenya guwa lija, idasendera pafupi ndi guwalo ndi kukwera kuguwako.

¹³Tsono mfumuyo idapereka nsembe yopsereza ndi chopereka cha chakudya. Idathiranso nsembe yake yachakumwa, ndipo idawaza magazi a nsembe yake yamtendere paguwapo.

¹⁴ Kenaka mfumu Ahazi adachotsa guwa lamkuŵa limene linali lomangira Chauta, pakati pa guwa lake ndi Nyumba ya Chauta, ndipo adalisuntha nakalikhazika chakumpoto kwa guwa lakelo.

¹⁵Kenaka mfumuyo idalamula wansembe kuti, “Pa guwa lalikululo uperekepo nsembe zopsereza zam'maŵa, ndiponso chopereka chamadzulo cha chakudya. Uziperekanso nsembe zopsereza ndi nsembe zaufa za mfumu, ndiponso za anthu a m'dziko monsemo, pamodzi ndi zopereka za chakumwa. Ndipo pa nsembezo uwazepo magazi onse a nsembe zopsereza ndi a nsembe zonse. Koma guwa lamkuŵalo ndidzaligwiritsa ntchito poombeza.”

¹⁶Tsono wansembe Uriya adachita zonsezo, monga momwe mfumu Ahazi adaalamulira.

¹⁷Pambuyo pake mfumu Ahazi adamasula mafulemu a maphaka, nachotsapo beseni. Ndipo chimbiya chimene chinali pamwamba pa ng'ombe zamkuŵa adachitsitsa ndi kuchikhazika pa maziko amiyala.

¹⁸Ndipo chifukwa chofuna kukondweretsa mfumu ya ku Asiriya, adachotsa kadenga ka pamwamba pa mpando waufumu kamene anali atakamanga m'kati mwa Nyumba ya Chauta, ndiponso adatseka khomo la panja pamene mfumu inkaloŵera m'Nyumbamo.

¹⁹Tsono ntchito zina za Ahazi pamodzi ndi zonse zimene adazichita zidalembedwa m'buku la Mbiri ya Mafumu a ku Yuda.

²⁰ Ahazi adamwalira, naikidwa m'manda mu mzinda wa Davide. Ndipo Hezekiya mwana wake adaloŵa ufumu m'malo mwake.