Read Buku Loyera - Chichewa 1 Mbi. 14 Bible Online

1 Mbi. 14 - Buku Loyera - Chichewa bible

1 Mbi. 14

¹Hiramu, mfumu ya ku Tiro, adatuma amithenga kwa Davide, pamodzi ndi mitengo ya mkungudza ndiponso amisiri odziŵa kumanga ndi miyala ndi amisiri a matabwa, kuti akammangire nyumba Davideyo.

²Motero Davide adazindikira kuti Chauta wamkhazikitsa kuti akhale mfumu yolamulira Aisraele, ndiponso kuti wakweza ufumu wake chifukwa cha Aisraele, anthu ake.

³Davide adakwatira akazi ena ku Yerusalemu, ndipo adabereka ana enanso aamuna ndi aakazi.

⁴Ana amene Davide adaberekera ku Yerusalemu ndi aŵa: Samuwa, Sobabu, Natani, Solomoni,

⁵Ibara, Elisuwa, Elipeleti,

⁶Noga, Nefegi, Yafiya,

⁷Elisama, Beeliyada, ndi Elifeleti.

⁸Afilisti atamva kuti Davide wadzozedwa kukhala mfumu yolamulira dziko lonse la Aisraele, adapita onse kukamfunafuna. Davide atamva zimenezo, adatuluka kukamenyana nawo nkhondo.

⁹Tsono Afilisti adafika nayamba kufunkha m'chigwa cha Refaimu.

¹⁰Pamenepo Davide adafunsa kwa Mulungu kuti, “Kodi ndipite kukamenyana nawo nkhondo Afilistiwo? Kodi mudzaŵapereka m'manja mwanga?” Chauta adamuuza kuti, “Inde, pita. Ndidzaŵaperekadi m'manja mwako.”

¹¹Pamenepo Davide adapita ku Baala-Perazimu, ndipo adagonjetsa Afilistiwo kumeneko. Tsono adati, “Ndi dzanja langa Mulungu waŵang'amba pakati adani anga ngati madzi a chigumula.” Nchifukwa chake malo amenewo amatchedwa kuti Baala-Perazimu.[12]

¹²Afilistiwo adasiya milungu yao kumeneko ndipo Davide adalamula kuti aiyatse moto, ndipo adaitenthadi.

¹³Nthaŵi ina Afilistiwo adabweranso naloŵa m'chigwa mom'muja.

¹⁴Davide atafunsanso Mulungu, Mulungu adamuuza kuti, “Usati uŵalondole. Uchite moŵazungulira, uŵadzere cha kumbuyo, uŵathire nkhondo pa malo oyang'anana ndi mitengo ya mkandankhuku ija.

¹⁵Tsono ukakamva phokoso pa nsonga za mitengo ya mkandankhukuyo, pamenepo utuluke kukamenyana nawo. Pakuti Mulungu wakutsogolera kuti ukakanthe gulu lankhondo la Afilistiwo.”

¹⁶Davide adachitadi monga momwe Mulungu adaamlamulira, ndipo adagonjetsa gulu lankhondo la Afilistilo kuyambira ku Gibiyoni mpaka ku Gezere.

¹⁷Ndipo mbiri ya Davide idawanda ku maiko onse, ndipo Ambuye adachititsa mantha anthu a mitundu yonse kuti azimuwopa Davideyo.