Read Buku Loyera - Chichewa 1 Mbi. 15 Bible Online

1 Mbi. 15 - Buku Loyera - Chichewa bible

1 Mbi. 15

¹Davide adadzimangira nyumba zina mu mzinda wa Davide.[13] Adakonza malo a Bokosi lachipangano la Chauta, namanga hema loikamo Bokosilo.

² Tsono Davide adati, “Alevi okha ndiwo amene asenze Bokosi lachipangano la Mulungu, wina aliyense ai, pakuti Chauta adasankhula Aleviwo kuti azisenza Bokosilo ndiponso kuti azimtumikira mpaka muyaya.”

³Kenaka Davide adasonkhanitsa Aisraele onse ku Yerusalemu, kuti akatenge Bokosi lachipangano la Chauta ndi kubwera nalo ku malo ake amene Davideyo adalikonzera.

⁴Tsono Davide adasonkhanitsa zidzukulu za Aroni ndi Alevi enanso.

⁵Mwa ana a Kohati, Uriyele ndiye anali mtsogoleri, ndipo iye ndi abale ake, onse analipo 120.

⁶Mwa ana a Merari, Asaya ndiye anali mtsogoleri, ndipo iye ndi abale ake, onse analipo 220.

⁷Mwa ana a Geresomo, Yowele ndiye anali mtsogoleri, ndipo iye ndi abale ake, onse analipo 130.

⁸Mwa ana a Elizafani, Semaya ndiye anali mtsogoleri, ndipo iye ndi abale ake, onse analipo 200.

⁹Mwa ana a Hebroni, Eliyele ndiye anali mtsogoleri, ndipo iye ndi abale ake, onse analipo 80.

¹⁰Mwa ana a Uziyele, Aminadabu ndiye anali mtsogoleri, ndipo iye ndi abale ake, onse analipo 112.

¹¹Tsono Davide adaitana ansembe aŵa Zadoki ndi Abiyatara, kudzanso Alevi aŵa, Uriyele, Asaya, Yowele, Semaya, Eliyele ndi Aminadabu.

¹²Ndipo adaŵauza kuti, “Inuyo ndinu atsogoleri a mabanja a makolo a Alevi. Mudzipatule eniakenu ndi abale anu omwe, kuti musenze Bokosi lachipangano la Chauta, Mulungu wa Aisraele, ndipo mukaliike ku malo amene ndidalikonzera.

¹³Popeza kuti simudalinyamule ndinu poyamba paja, Chauta adatikantha, chifukwa choti sitidasamale mwambo wake polinyamula.”

¹⁴Motero ansembe ndi Alevi aja adadzipatula kuti akanyamule Bokosi lachipangano la Chauta, Mulungu wa Aisraele.

¹⁵Ndipo Alevi adanyamula ndi mphiko Bokosilo pamapuzi pao, monga momwe Mose adaalamulira potsata mau a Chauta.

¹⁶Pambuyo pake Davide adalamulanso atsogoleri a Alevi kuti asankhe ena mwa abale ao, kuti aziimba ndi kuliza mwamphamvu zipangizo zoimbira monga azeze, apangwe, ndiponso ziwaya zamalipenga, kuti mau achimwemwe amveke bwino.

¹⁷Motero Alevi adasankha Hemani mwana wa Yowele, ndipo mwa abale ake adasankha Asafu mwana wa Berekiya. Mwa ana a Merari, abale ao, adasankha Etani mwana wa Kusaya.

¹⁸Pamodzi ndi iwowo, otsatana nawo osankhidwanso anali Zekariya, Yaaziyele, Semiramoti, Yehiyele, Uni, Eliyabu, Benaya, Maaseiya, Matitiya, Elifelehu ndiponso Mikineya, kudzanso alonda apamakomo, Obededomu ndi Yeiyele.

¹⁹Anthu oimba aja, Hemani, Asafu ndi Etani ndiwo amene ankaimba ziwaya zamalipenga zamkuŵa.

²⁰Zekariya, Aziyele, Semarimoti, Yehiyele, Uni, Eliyabu, Maaseiya ndi Benaya ndiwo amene ankaimba azeze a liwu lapamwamba.

²¹Koma Matitiya, Elibelehu, Mikineya, Obededomu, Yeiyele ndiponso Azaziya ndiwo amene ankatsogolera, namaimba apangwe a liwu lapansi.

²²Kenaniya, mtsogoleri wa Alevi poimba nyimbo, ndiye amene ankatsogolera kuimbako, poti anali katswiri.

²³Benekiya ndi Elikana ndiwo adasankhidwa kuti akhale alonda apakhomo olonda Bokosilo.

²⁴Ansembe aŵa, Sebaniya, Yosafati, Netanele, Amasai, Zekariya, Benaya ndi Eliyezere ndiwo ankayenera kuliza malipenga patsogolo pa Bokosi lachipangano la Mulungu. Obededomu ndi Yehiya nawonso anali alonda apakhomo a Bokosilo.

²⁵Motero Davide pamodzi ndi akuluakulu a Aisraele ndiponso atsogoleri a ankhondo zikwi-zikwi, adapita mokondwera kuti akatenge Bokosi lachipangano la Chauta kunyumba kwa Obededomu.

²⁶Pofuna kuti Mulungu aŵathandize Alevi amene ankanyamula Bokosilo, anthuwo adaperekera nsembe ng'ombe zamphongo zisanu ndi ziŵiri ndi nkhosa zamphongo zisanu ndi ziŵiri.

²⁷Davide anali atavala mkanjo wabafuta wa thonje losalala, monga momwe adavalira Alevi amene ankanyamula Bokosi lachipangano, kudzanso anthu oimba ndiponso Kenaniya mtsogoleri wa anthu oimba nyimbo. Koma Davide adaavalanso efodi.

²⁸Motero Aisraele onse adabwera nalo Bokosi lachipangano la Chauta akufuula ndi kuimba mbetete, malipenga ndi ziwaya zamalipenga. Ankalizanso azeze ndi apangwe mokweza.

²⁹Pamene Bokosi lachipangano lija lidadza ku mzinda wa Davide, Mikala mwana wamkazi wa Saulo, adasuzumira pa windo, naona mfumu Davide akulumphalumpha ndi kuvina. Pamenepo mkaziyo adayamba kunyoza Davide mumtima mwake.