Read Buku Loyera - Chichewa 1 Mbi. 21 Bible Online

1 Mbi. 21 - Buku Loyera - Chichewa bible

1 Mbi. 21

¹Nthaŵi ina Satana adafuna kuvutitsa Aisraele, nanyenga Davide kuti aŵerenge Aisraele.

²Choncho Davide adauza Yowabu mtsogoleri wa ankhondo kuti, “Pita, ukaŵerenge Aisraele kuyambira ku Beereseba mpaka ku Dani, ndipo udzandiwuze, kuti ndidziŵe chiŵerengero chao.”

³Koma Yowabu adati, “Chauta achulukitse pa chiwerengero anthu ake makumi khumi kupambana m'mene alirimu. Kodi anthu onseŵa mbuyanga mfumu si atumiki anu? Nanga chifukwa chiyani mbuyanga akufuna zimenezi? Chifukwa chiyani akufuna kuchimwitsa Aisraele?”

⁴Koma mfumu idamkakamiza Yowabuyo. Motero Yowabu adachoka nayendera dziko lonse la Israele, pambuyo pake anabwerera ku Yerusalemu.

⁵Adapereka chiŵerengero cha anthu onse kwa Davide. Ku dziko lonse la Israele kunali anthu 1,100,000 otha kumenya nkhondo, ndipo ku Yuda kunali 470,000 otha kumenya nkhondo.

⁶Koma Yowabuyo sadaphatikizepo dera la Levi ndi la Benjamini poŵerengapo, poti lamulo la mfumulo lidaamuipira.

⁷Mulungu nayenso sadakondwere nako kuŵerengako, choncho adaŵakantha Aisraelewo.

⁸Pamenepo Davide adayamba kupemphera kwa Mulungu, adati, “Ndachimwa kwambiri ine pazimene ndachitazi. Koma tsopano ndikukupemphani kuti mundikhululukire tchimo langa ine mtumiki wanu, popeza kuti ndachita zopusa kwambiri.”

⁹Tsono Chauta adauza Gadi, mneneri wa Davide, kuti,

¹⁰“Pita ukamuuze Davide kuti, Ine Chauta ndikunena kuti, ‘Ndikuika pamaso pako zinthu zitatu zoti ndikuchite. Tsono usankhepo chimodzi ndipo ndidzakuchita.’ ”

¹¹Gadi adapita kwa Davide nakamuuza kuti, “Chauta akunena kuti, ‘Musankhepo chimene mukufuna:

¹²kodi pabwere zaka zitatu za njala, kapena inu mukhale miyezi itatu akukukanthani adani anu namakukugonjetsani pa nkhondo, kapena pagwe mliri wa masiku atatu m'dzikomo pamene Chauta adzakukanthani ndi lupanga, ndipo mngelo wa Chauta adzawononga zinthu m'dziko lonse la Israele.’ Tsono tsimikizani choti ndikamuyankhe amene adanditumayo.”

¹³Apo Davide adauza Gadi kuti, “Ine pamenepa ine ndavutika kwambiri mu mtima. Makamaka ndigwe m'manja mwa Chauta, popeza kuti chifundo chake nchachikulu. Koma chonde ndisagwe m'manja mwa anthu ayi.”

¹⁴Motero Chauta adatumiza mliri pa Aisraele, mwakuti adafapo Aisraele okwanira 70,000.

¹⁵Ndipo Mulungu adamtumadi mngelo uja kukaononga Yerusalemu. Koma pamene ankati aziwononga kumene, Chauta adaona namva chisoni, osafunanso kuchita choipacho. Choncho adauza mngelo woonongayo kuti, “Iyai, basi tsopano! Kwakwanira, bweza dzanja lakolo.” Nthaŵi imeneyo nkuti mngelo wa Chauta uja ataima pa malo opunthira tirigu a Orinani Myebusi.

¹⁶Davide adakweza maso ake naona mngelo wa Chautayo ataimirira pakati pa dziko lapansi ndi dziko lakumwamba, m'manja mwake ali ndi lupanga lotambalitsa kuloza ku Yerusalemu. Tsono Davide, pamodzi ndi akuluakulu omwe, atavala ziguduli, adadzigwetsa choŵerama pansi.

¹⁷Ndipo Davide adalankhula ndi Mulungu nati, “Kodi sindine amene ndidalamula kuti akaŵerenge anthu? Ndachimwa ndine, ndipo ndachita choipa. Koma nkhosa izi, kodi zachita chiyani? Inu Chauta Mulungu wanga, dzanja lanu likanthe ine pamodzi ndi banja la bambo wanga. Koma lisati likanthe anthu anuŵa.”

¹⁸Apo mngelo wa Chauta adalamula Gadi kuti, “Kauze Davide kuti akamangire Chauta guwa pa malo opunthira tirigu a Orinani Myebusi uja.”

¹⁹Motero Davide adapita, atamva mau amene Chauta adaalankhula kudzera mwa Gadi.

²⁰M'menemo nkuti Orinani akupuntha tirigu. Atacheuka adaona mngeloyo, koma ana ake aamuna anai amene anali naye, adaabisala.

²¹Pamene Davide adafika kwa Orinani, Orinaniyo adayang'ana, naona Davide, ndipo adatuluka ku malo opunthira tiriguko, nalambira Davide moŵeramitsa nkhope pansi.

²²Davide adauza Orinani kuti, “Undipatse malo opunthira tiriguŵa, kuti ndimangirepo Chauta guwa, kuti mliriwu uŵachoke anthu. Undigulitse pa mtengo wake ndithu.”

²³Tsono Orinani adauza Davide kuti, “Iyai, ingotengani, ndipo mbuyanga mfumu achite zimene zimkomere. Ndikupereka ng'ombe kuti zikhale nsembe yopsereza, mitengo yopunthira kuti ikhale nkhuni, ndiponso tirigu kuti akhale chopereka cha chakudya. Zonsezi ndikuzipereka.”

²⁴Koma mfumu Davide adauza Orinani kuti, “Iyai, koma ndichita chogula ndi ndalama ndithu pa mtengo wake wathunthu. Sindingatenge chinthu chako kuti ndichipereke kwa Chauta, kupereka ngati nsembe yopsereza chinthu chimene sindidachigule.”

²⁵Motero Davide adalipira Orinani masekeli agolide 600 chifukwa cha malowo.

²⁶Ndipo adamangira Chauta guwa kumeneko, napereka nsembe zopsereza ndi nsembe zachiyanjano. Adatama Chauta mopemba, ndipo Chautayo adamuyankha potumiza moto wakumwamba, nugwera pa guwa la nsembe zopsereza.

²⁷Tsono Chauta adalamula mngelo wake, iye nabwezera lupanga m'chimake.

²⁸Nthaŵi imeneyo Davide ataona kuti Chauta wamuyankha ku malo opunthira tirigu a Orinani Myebusi uja, adapereka nsembe zake kumeneko.

²⁹Chihema cha Chauta chimene adachipanga Mose kuchipululu kuja ndiponso guwa la nsembe zopsereza, zonsezo zinali ku kachisi wa ku Gibiyoni pa nthaŵi imeneyo.

³⁰Koma Davide sadathe kupitako kukapempha nzeru kwa Mulungu, poti ankachita mantha ndi lupanga la mngelo wa Chauta uja.