Read Buku Loyera - Chichewa 1 Mbi. 22 Bible Online

1 Mbi. 22 - Buku Loyera - Chichewa bible

1 Mbi. 22

¹Davide adati, “Pano ndipo pamene padzakhale Nyumba ya Mulungu, ndiponso pano mpamene padzakhale guwa la nsembe zopsereza zimene Aisraele azidzapereka.”

²Davide adalamula kuti asonkhanitse alendo amene anali m'dziko la Israele. Tsono pakati pao adasankhula anthu oti aseme miyala yomangira Nyumba ya Chauta.

³Davide adaperekanso zitsulo zochuluka zopangira misumali ya zitseko zapamakomo ndi nsimbi zomangira. Adaperekanso mkuŵa wochuluka, wokanika kuuyesa.

⁴Adaperekanso matabwa osaŵerengeka a mtengo wa mkungudza, chifukwa anthu a ku Sidoni ndi a ku Tiro adaabwera ndi mikungudza yambiri kwa Davide.

⁵Davide ankati, “Mwana wanga Solomoni akali wamng'ono, wosadziŵa zinthu, ndipo nyumba imene akudzamangira Chauta iyenera kukhala nyumba yaulemerero kwambiri, yomveka ndiponso yoyenera kuichitira ulemu anthu a ku maiko onse. Nchifukwa chake ine ndikuti ndikonzeretu zambiri.” Motero Davide adapezeratu zipangizo zambiri asanamwalire.

⁶Tsono adaitana Solomoni mwana wake, ndipo adamlamula kuti amangire nyumba Chauta, Mulungu wa Israele.

⁷ Davide adauza Solomoni kuti, “Mwana wanga, ine ndinkaganiza zakuti ndimangire nyumba Chauta, Mulungu wanga.

⁸Koma Chauta adandiwuza kuti, ‘Iwe udapha anthu ambiri ndipo udamenya nkhondo zikuluzikulu. Chifukwa cha zimenezi, sindiwe amene udzandimangire nyumba ai.

⁹Udzabereka mwana wamwamuna. Iyeyo adzakhala munthu wamtendere. Ine ndidzamkhalitsa mwamtendere pakati pa adani ake onse omzungulira. Dzina lake adzatchedwa Solomoni, popeza kuti ndidzabweretsa bata ndi mtendere m'dziko lonse la Israele pa moyo wake wonse.

¹⁰Iyeyo ndiye adzandimangire nyumba. Adzakhala mwana wanga, Ine ndidzakhala bambo wake, ndipo ndidzakhazikitsa mpando wake waufumu m'dziko la Israele mpaka muyaya.’ ”

¹¹Davide adaonjeza kuti, “Tsono mwana wanga, Chauta Mulungu wako akhale nawe, kuti udzathe kummangira nyumba monga m'mene wanenera.

¹²Komabe Chauta akuninkhe nzeru ndi luntha, kuti akadzakupatsa ulamuliro woyang'anira Israele, udzasunge malamulo a Chauta Mulungu wako.

¹³ Ukadzamvera mosamala malamulo ndi malangizo amene Chauta adalamula Mose kuti auze Aisraele, ndiye kuti zinthu zidzakuyendera bwino. Khala wamphamvu, limba mtima, usati uziwopa, usatinso ude nkhaŵa.

¹⁴Movutikira kwambiri ine ndaperekera Nyumba ya Chauta matani 3,400 a golide, matani 34,000 a siliva, ndiponso mkuŵa ndi chitsulo zosadziŵika kulemera kwake, poti zinali zochuluka kwambiri. Ndasonkhanitsanso matabwa ndi miyala. Pa zimenezi uwonjezeponso.

¹⁵Uli nawo anthu antchito ambirimbiri: amisiri a miyala, amisiri a matabwa, ndiponso anthu a nzeru zosiyanasiyana osaŵerengeka, aluso pa ntchito zao

¹⁶za golide, siliva, mkuŵa ndiponso chitsulo. Tiyeko uyambepo ntchito zimenezo. Chauta akhale nawe.”

¹⁷Davide adalamulanso atsogoleri onse a ku Israele kuti azithandizana ndi Solomoni mwana wake, adati,

¹⁸“Pajatu Chauta Mulungu wanu ali nanu, ndipo adakupatsani mtendere ku mbali zonse. Iye wapereka kwa ine nzika zonse zam'dzikomu, mwakuti zagonjera Chauta ndi inu anthu ake.

¹⁹Tsono ikani nzeru zanu ndi mtima wanu pa kutumikira Chauta Mulungu wanu. Muyambepo tsopano kumanga Nyumba ya Chauta kuti muikemo Bokosi lachipangano la Chauta ndiponso ziŵiya zonse zofunikira pa chipembedzo.”