Read Buku Loyera - Chichewa 1 Mbi. 26 Bible Online

1 Mbi. 26 - Buku Loyera - Chichewa bible

1 Mbi. 26

¹Magulu a alonda odikira pa khomo naŵa: m'gulu la Akora munali Meselemiya, mwana wa Kore, mmodzi mwa ana a Asafu.

²Meselemiya anali ndi ana aŵa: wachisamba anali Zekariya, wachiŵiri Yediyale, wachitatu Zebadiya, wachinai Yatiniele,

³wachisanu Elamu, wachisanu ndi chimodzi Yehohanani ndipo wachisanu ndi chiŵiri Elihunai.

⁴ Obededomu Mulungu anali ndi ana aŵa: wachisamba anali Semaya, wachiŵiri Yehozabadi, wachitatu Yowa, wachinai Sakara, wachisanu Netanele,

⁵wachisanu ndi chimodzi Amiyele, wachisanu ndi chiŵiri Isakara ndipo wachisanu ndi chitatu Peuletai, (pakuti paja Mulungu adaamdalitsa Obededomuyo.)

⁶Semaya mwana wake nayenso anali ndi ana amene anali otchuka m'mabanja a makolo ao, makamaka aŵiri omariza.

⁷Ana a Semaya naŵa: Otini, Refaele, Obede ndi Elizabadi amene anali ndi abale ao amphamvu, Elihu ndi Semakiya.

⁸Kuchokera ku banja la Obededomu kudasankhidwa anthu 62, onsewo okhoza ntchito.

⁹Kuchokera ku banja la Meselemiya kudasankhidwa anthu aluso 18.

¹⁰Kuchokera ku banja la Merari kudasankhidwa Hosa amene anali ndi ana aŵa: Simiri mtsogoleri (iyeyu ngakhale sanali mwana wachisamba, atate ake adaamsankhula kuti akhale mtsogoleri.)

¹¹Wachiŵiri Hilikiya, wachitatu Tebaliya, wachinai anali Zekariya. Onse a m'banja la Hosa amene anali alonda analipo 13.

¹²Alonda a pa khomo la Nyumba ya Chauta adaŵaika m'magulu, potsata mabanja ao, ndipo adaŵapatsa ntchito zao zotumikira, monga momwe adachitira Alevi anzao.

¹³Iwonso adachita maere pa mabanja onse ang'onoang'ono ndi akuluakulu omwe, kuti apeze okalonda pa makomo.

¹⁴Selemiya adamsankha kuti azilonda pa khomo lakuvuma. Mwana wake Zekariya, phungu wanzeru, adamsankha kuti azilonda khomo lakumpoto.

¹⁵Obededomu adamsankha kuti azilonda khomo lakumwera, ndipo ana ake adaŵaika kuti azilonda nyumba ya katundu.

¹⁶Supimu ndi Hosa adaŵasankha kuti azilonda kuzambwe ku khomo la Saleketi, pa mseu wokwera. Maulonda ankakhala otsatanatsatana.

¹⁷Kuvuma kunkakhala alonda asanu ndi mmodzi tsiku lililonse. Kumpoto kunkakhala alonda anai tsiku lililonse, kumwera alonda anai tsiku lililonse, ndiponso alonda aŵiriaŵiri ku nyumba ya katundu.

¹⁸Ku bwalo lakuzambwe kunali alonda anai ku mseu ndiponso alonda aŵiri ku bwalo lenilenilo.

¹⁹Ameneŵa ndiwo amene anali magulu a alonda apamakomo, ochokera ku mabanja a Akora ndi a Merari.

²⁰Mwa Alevi, Ahiya ankayang'anira chuma cha ku Nyumba ya Chauta ndiponso zipinda zosungiramo zinthu zopatsidwa kwa Mulungu.

²¹Ladani, mmodzi mwa ana a Geresoni, adabereka ana ake amene ankakhala atsogoleri a mabanja, makamaka Ayehiyeli.

²²Ana ena a Ladani, Zetamu ndi Yowele mbale wake, nawonso ankayang'anira chuma cha ku Nyumba ya Chauta.

²³Ena mwa Aamuramu, Aizari, Ahebroni ndi Auziyele adalandira maudindo osiyanasiyana:

²⁴Sebuele mwana wa Geresomo, mwana wa Mose anali mkulu woyang'anira chuma.

²⁵Abale ake obadwa mwa Eliyezere anali Rehabiya mwana wake, Yesaiya, Yoramu, Zakiri ndiponso Selomoti.

²⁶Selomotiyu pamodzi ndi abale ake, ankasunga chuma cha mphatso zopatulika zimene mfumu Davide adazipereka, pamodzi ndi atsogoleri a mabanja, atsogoleri a anthu zikwi, atsogoleri a anthu mazana, ndiponso atsogoleri a magulu a ankhondo.

²⁷Pa zofunkha zotenga ku nkhondo, adapatulapo mphatso zina kuti zikhale zothandiza kusunga Nyumba ya Chauta.

²⁸Selomoti pamodzi ndi abale ake, ndiwo amene ankasamalira mphatso zonse zopatulika zoperekedwa ndi mneneri Samuele, ndi Saulo mwana wa Kisi, ndi Abinere mwana wa Nere, ndiponso ndi Yowabu mwana wa Zeruya, ndipo zinthu zina zonse zoperekedwa ndi munthu wina aliyense zinali m'manja mwa Selemoti ndi abale ake.

²⁹Mwa zidzukulu za Izara, Kenaniya ndi ana ake ndiwo adaŵaika kuti azigwirira Aisraele ntchito zoyang'anira zinthu, monga zolembalemba ndiponso kuweruza milandu.

³⁰Mwa Ahebroni, Hasabiya pamodzi ndi abale ake 1,700, anthu anzeru, ankayang'anira Aisraele chakuzambwe kwa Yordani, pa ntchito zonse za chipembedzo ndiponso za boma.

³¹Yeriya ndiye anali mtsogoleri wa Ahebroni potsata mndandanda wa mabanja a makolo. Pa chaka cha 40 cha ufumu wa Davide padachitika kafukufuku ndipo padapezeka kuti ena otchuka a m'banja la Yeriya ankakhala ku Yazere ku Giliyadi.

³²Mfumu Davide adasankha atsogoleri okwanira 2,700 a m'banja la Yeriyayo kuti aziyang'anira Arubeni, Agadi ndiponso fuko lahafu la Amanase pa zonse zokhudza chipembedzo ndiponso za boma.