Read Buku Loyera - Chichewa 1 Mbi. 27 Bible Online

1 Mbi. 27 - Buku Loyera - Chichewa bible

1 Mbi. 27

¹Nawu mndandanda wa atsogoleri a mabanja a Aisraele olamulira ankhondo zikwi ndiponso ankhondo mazana, pamodzi ndi akulu ao amene ankatumikira mfumu. Ankasinthanasinthana mwezi ndi mwezi pa chaka chilichonse, gulu lililonse linali ndi anthu okwanira 24,000.

²Yosobeamu mwana wa Zabidiele ankayang'anira gulu loyamba pa mwezi woyamba. Pa gulu lake panali asilikali 24,000.

³Iyeyu anali mdzukulu wa Perezi, ndipo ndiye anali mkulu wa atsogoleri onse ankhondo mwezi woyamba.

⁴Dodai Mwahohi anali woyang'anira gulu la mwezi wachiŵiri. Mtsogoleri wa gulu limeneli anali Mikiloti. Pa gulu lake panali asilikali 24,000.

⁵Mtsogoleri wa ankhondo pa mwezi wachitatu anali Benaya, mwana wa Yehoyada mkulu wa ansembe. Pa gulu lake panali asilikali 24,000.

⁶Benaya ameneyu ndiye amene ankatsogolera anthu makumi atatu aja. Amizabadi mwana wake ndiye amene ankatsatana naye polamulira gulu lakelo.

⁷Asahele, mbale wake wa Yowabu, anali mtsogoleri pa mwezi wachinai, ndipo mwana wake Zebadiya adaloŵa m'malo mwake. Pa gulu lake panali asilikali 24,000.

⁸Mtsogoleri pa mwezi wachisanu anali Samuti mdzukulu wa Izara. Pa gulu lake panali asilikali 24,000.

⁹Mtsogoleri pa mwezi wachisanu ndi chimodzi anali Ira, mwana wa Ikesi Mtekowa. Pa gulu lake panali asilikali 24,000.

¹⁰Mtsogoleri pa mwezi wa chisanu ndi chiŵiri anali Helezi Mpeloni, mmodzi mwa zidzukulu za Efuremu. Pa gulu lake panali asilikali 24,000.

¹¹Mtsogoleri pa mwezi wachisanu ndi chitatu anali Sibekai Muhusa, wa m'banja la Zera. Pa gulu lake panali asilikali 24,000.

¹²Mtsogoleri pa mwezi wachisanu ndi chinai anali Abiyezere, mmodzi mwa Aanetoti, Mbenjamini. Pa gulu lake panali asilikali 24,000.

¹³Mtsogoleri pa mwezi wachikhumi anali Maharai, wa ku Netofa, wa m'banja la Zera. Pa gulu lake panali asilikali 24,000.

¹⁴Mtsogoleri pa mwezi wa 11 anali Benaya wa ku Piratoni, mmodzi wa fuko la Efuremu. Pa gulu lake panali asilikali 24,000.

¹⁵Mtsogoleri pa mwezi wa 12 anali Helidai Mnetofa, mdzukulu wa Otiniyele. Pa gulu lake panali asilikali 24,000.

¹⁶Atsogoleri amene ankayang'anira mafuko a Aisraele anali aŵa: Mtsogoleri wa Arubeni anali Eliyezere, mwana wa Zikiri. Mtsogoleri wa Asimeoni anali Sefatiya, mwana wa Maaka.

¹⁷Mtsogoleri wa Alevi anali Hasabiya, mwana wa Kemuwele. Mtsogoleri wa Aaroni anali Zadoki.

¹⁸Mtsogoleri wa Ayuda anali Elihu, mmodzi mwa abale a Davide. Mtsogoleri wa Aisakara anali Omuri, mwana wa Mikaele.

¹⁹Mtsogoleri wa Azebuloni anali Isimaya, mwana wa Obadiya. Mtsogoleri wa Anafutali anali Yeremoti, mwana wa Aziriele.

²⁰Mtsogoleri wa Aefuremu anali Hoseya, mwana wa Azaziya. Mtsogoleri wa fuko lahafu la Manase lakuzambwe anali Yowele, mwana wa Pedaya.

²¹Mtsogoleri wa fuko lahafu la Manase lakuvuma, dera la Giliyadi anali Ido, mwana wa Zekariya. Mtsogoleri wa Abenjamini anali Yasiyele, mwana wa Abinere.

²²Mtsogoleri wa Adani anali Azarele, mwana wa Yerohamu. Ameneŵa ndiwo amene anali atsogoleri a mafuko a Aisraele.

²³ Davide sadaŵerengere kumodzi anthu osafika zaka 20 zakubadwa, pakuti Chauta adaalonjeza kuti Aisraele adzachuluka ngati nyenyezi zakumwamba.

²⁴ Yowabu mwana wa Zeruya adayambapo kuŵerenga, koma sadatsirize ai. Mkwiyo wa Chauta udaŵagwera Aisraele chifukwa cha zimenezi, ndipo chiŵerengerocho sadachiloŵetse m'buku la mbiri ya mfumu Davide.

²⁵Azimaveti mwana wa Adiyele ankayang'anira chuma cha mfumu. Yonatani mwana wa Uziya ankayang'anira chuma cham'miraga, cham'mizinda, cham'midzi ndi cha m'nyumba zankhondo.

²⁶Eziri mwana wa Kelubi ankayang'anira anthu ogwira ntchito zolima ku minda.

²⁷Simei wa ku Rama ankayang'anira minda yamphesa. Zabidi wa ku Sifamu ankayang'anira vinyo kuti asungike bwino mosungira mwake.

²⁸Baala-Hanani wa ku Gederi anali woyang'anira mitengo ya olivi ndi ya mikuyu ku Sefera. Yowasi ankayang'anira mosungira mafuta.

²⁹Sitirai wa ku Saroni ankayang'anira ziŵeto za ku busa la ku Saroni. Safati, mwana wa Adilai, ankayang'anira ziŵeto zakuzigwa.

³⁰Obili Mwismaele ankayang'anira ngamira. Yedeiya Mmeronoti ankayang'anira abulu. Yazizi Muhagiri ankayang'anira nkhosa ndi mbuzi.

³¹Onseŵa ndiwo amene anali akulu oyang'anira chuma cha mfumu Davide.

³²Yonatani, mtsibweni wake wa Davide, anali phungu wake, popeza kuti anali munthu womvetsa zinthu, ndiponso wophunzira bwino. Iyeyo pamodzi ndi Yehiyele mwana wa Hakimoni, ankaphunzitsa ana a mfumu.

³³Ahitofele anali phungu wa mfumu, ndipo Husai Mwariki anali bwenzi la mfumu.

³⁴Ahitofele atamwalira, m'malo mwake mudaloŵa Yehoyada, mwana wa Benaya, ndiponso Abiyatara. Yowabu ndiye anali mtsogoleri wa gulu lankhondo la mfumu.