Read Buku Loyera - Chichewa 1 Mbi. 5 Bible Online

1 Mbi. 5 - Buku Loyera - Chichewa bible

1 Mbi. 5

¹ Naŵa ana a Rubeni, mwana wachisamba wa Israele. Inde Rubeni analidi mwana wachisamba, koma chifukwa adaagona ndi mkazi wina wamng'ono wa bambo wake, uchisamba wakewo udapatsidwa kwa Yosefe, mng'ono wake. Motero Rubeniyo saoneka pa mndandanda wa maina potsata za kubadwa.

² Koma a fuko la Yuda anali amphamvu pakati pa mafuko a Israele, ndipo mfumu idachokera kwa iwowo, ngakhale kuti ukulu wa uchisamba unali wa Yosefe.

³Tsono ana a Rubeni naŵa: Hanoki, Palu, Hezironi ndi Karimi.

⁴Ana a Yowele naŵa: Semaya, Gogi, Simei,

⁵Mika, Reaya, Baala,

⁶ndi Beera amene Tigilati-Pilesere, mfumu ya ku Asiriya, idamtenga ukapolo. Iyeyo anali mmodzi mwa atsogoleri a Arubeni.

⁷Akuluakulu a fuko la Rubeni, potsata mndandanda wa maina ao, naŵa: mtsogoleri Yeiyele, Zekariya,

⁸ndiponso Bela mwana wa Azazi, mwana wa Sema, wa banja la Yowele. Onsewo ankakhala ku Aroere mpaka kukafika ku Nebo ndi ku Baala-Meoni.

⁹Iwowo adakhala kuvuma mpaka kukafika poloŵera m'chipululu cha mbali ina ya Yufurate, chifukwa chakuti ng'ombe zao zinali zitaswana kwambiri m'dziko la Giliyadi.

¹⁰Pa nthaŵi ya Saulo, Arubeni adathira nkhondo Ahagiri ndi kuŵagonjetsa, kenaka adakhala m'mahema mwao m'dziko lonselo kuvuma kwa Giliyadi.

¹¹Ana a Gadi adakhala kumpoto kwa Arubeni m'dziko la Basani mpaka kukafika ndithu kuvuma ku Saleka.

¹²Mkulu wao anali Yowele, ndipo wachiŵiri wake anali Safani. Panalinso Yanai, ndi Safati ku Basani.

¹³Abale ao, potsata mabanja a makolo ao, naŵa: Mikaele, Mesulamu, Sheba, Yorai, Yakani, Ziya ndiponso Eberi, asanu ndi aŵiri.

¹⁴Ameneŵa ndiwo anali ana a Abihaili, mwana wa Huri, mwana wa Yarowa, mwana wa Giliyadi, mwana wa Mikaele, mwana wa Yesisai, mwana wa Yado, mwana wa Buzi.

¹⁵Ahi, mwana wa Abidiyele, mwana wa Guni, ndiye amene anali mfumu ya mabanja a makolo ao.

¹⁶Iwowo adakhala m'midzi ya ku Giliyadi ndi ku Basani ndiponso ku mabusa onse a m'maiko a Saroni mpaka ku mapeto ake.

¹⁷Onseŵa adalembedwa potsata mibadwo yao pa nthaŵi ya Yotamu mfumu ya ku Yuda, ndiponso pa nthaŵi ya Yerobowamu mfumu ya ku Israele.

¹⁸Arubeni, Agadi ndiponso theka la fuko la Manase anali ndi anthu olimba mtima odziŵa kumenya nkhondo ndi zishango, malupanga ndi mauta. Onse pamodzi anali 44,760, okonzekeratu kukamenya nkhondo.

¹⁹Adathira nkhondo Ahagiri, Yeturi, Nafisi, ndiponso Nodabu.

²⁰Mulungu adaŵathandiza pomenya nkhondoyo, ndipo Ahagiriwo pamodzi ndi onse amene adaaphatikana nawo, adaperekedwa m'manja mwao. Ankalira kwa Mulungu pomenya nkhondoyo, tsono Mulungu adaŵapatsa zimene ankapemphazo, popeza kuti adaamkhulupirira.

²¹Adaŵalanda ziŵeto zao monga izi: ngamira zokwanira 50,000, nkhosa zokwanira 250,000, abulu okwanira 2,000. Adagwiranso anthu amoyo okwanira 100,000.

²²Adani ena ambiri adaphedwa, pakuti Mulungu ankaŵathandiza pa nkhondoyo. Choncho anthuwo adakhala bwino kumeneko mpaka nthaŵi yotengedwa ukapolo[4] ija.

²³Theka la fuko la Manase linkakhala m'dziko lakuvuma kuyambira ku Basani mpaka ku Baala-Heremoni, Seniri ndiponso ku phiri la Heremoni. Anthuwo anali ochuluka.

²⁴Atsogoleri a mabanja a makolo ao anali aŵa: Efere, Isi, Eliyele, Aziriele, Yeremiya, Hodaviya ndiponso Yadiyele. Ameneŵa anali ankhondo amphamvu, anthu omveka, atsogoleri a mabanja a makolo ao.

²⁵Koma anthu aja adachimwira Mulungu wa makolo ao, nadzipereka kwa milungu ya anthu am'dzikomo amene Mulungu adaŵaononga iwowo akufika.

²⁶Motero Mulungu wa Israele adautsa mtima wa Pulo mfumu ya ku Asiriya, amene dzina lake lina linali Tigilati-Pilesere, ndipo adaŵatenga Arubeni, Agadi ndiponso theka la fuko la Manase, napita nawo ku Hala, Habori, Hara ndi ku mtsinje wa Gozani, ndipo akukhala kumeneko mpaka lero lino.