Read Buku Loyera - Chichewa 2 Mbi. 11 Bible Online

2 Mbi. 11 - Buku Loyera - Chichewa bible

2 Mbi. 11

¹Rehobowamu atafika ku Yerusalemu, adasonkhanitsa ankhondo osankhidwa okwanira 180,000, afuko la Yuda ndi la Benjamini, ndi cholinga akamenyane nkhondo ndi anthu a ku Israele, kuti choncho ambwezere Rehobowamu ufumu wake.

²Koma Chauta adadza kwa Semaya, m'meneri wake, namlamula kuti,

³“Ukauze Rehobowamu, mwana wa Solomoni, mfumu ya ku Yuda, ndi Aisraele onse a ku Yuda ndi a ku Benjamini kuti,

⁴‘Ine Chauta ndikuti, Musapite kukamenyana ndi abale anu. Aliyense abwerere kwao, poti zimene zachitikazi zachokera kwa Ine.’ ” Anthuwo adamvera mau a Chauta, nadabwerera osapita kukamenyana ndi Yerobowamu.

⁵Rehobowamu ankakhala ku Yerusalemu, ndipo adamanga mizinda yamalinga ku Yuda.

⁶Adamanga Betelehemu, Etamu, Tekowa,

⁷Betezuri, Soko, Adulamu,

⁸Gati, Maresa, Zifi,

⁹Adoraimu, Lakisi, Azeka,

¹⁰Zora, Aiyaloni ndi Hebroni. Mizinda yamalinga yonseyo inali ku Yuda ndi ku Benjamini.

¹¹Malinga ake adamanga olimba, ndipo adaikamo atsogoleri a nkhondo. Adaikamonso chakudya, mafuta ndi vinyo.

¹²Adaikamo zishango ndi mikondo, ndipo adaitchinjiriza kwambiri mizindayo. Choncho ankalamulira anthu a ku Yuda ndi a ku Benjamini.

¹³Ansembe pamodzi ndi Alevi amene anali m'dziko lonse la Israele adatsata Rehobowamu, kuchoka konse kumene ankakhala.

¹⁴Alevi adasiya mabusa ao ndi maiko ao, ndipo adapita ku Yuda ndi ku Yerusalemu, chifukwa chakuti Yerobowamu ndi ana ake anali ataŵachotsa pa ntchito zao zaunsembe zomatumikira Chauta.

¹⁵ Yerobowamu adaadzisankhira ansembe ake, kuti azitumikira ku kachisi ku zitunda, kupembedza mizimu yoipa ndi mafano a atonde ndi a anaang'ombe amene adaŵapanga.

¹⁶Tsono anthu amene adatsimikiza mumtima mwao kuti azitumikira Chauta, Mulungu wa Israele, ankatsatira ansembe ndi Alevi aja, kuchoka ku mafuko a ku Israele, kupita ku Yerusalemu kukapereka nsembe kwa Chauta, Mulungu wa makolo ao.

¹⁷Iwowo adalimbitsa ufumu wa Yuda, ndipo adamsunga Rehobowamu mwana wa Solomoni zaka zitatu, chifukwa chakuti pa zaka zitatuzo ankatsata chitsanzo cha Davide ndi cha Solomoni.

¹⁸Rehobowamu adakwatira Mahalati, amene bambo wake anali Yerimoti, mwana wa Davide, ndipo mai wake anali Abihaili mwana wa Eliyabu mwana wa Yese.

¹⁹Mkaziyo adambalira ana aŵa: Yeusi, Semariya ndi Zahamu.

²⁰Adakwatiranso Maaka mwana wa Abisalomu, ndipo adambalira Abiya, Atai, Ziza ndi Selomiti.

²¹Rehobowamu ankakonda Maaka mwana wa Abisalomu kupambana akazi ake onse, kupambananso azikazi ake. (Adakwatira akazi 18, ndipo anali ndi azikazi okwanira 60, ndipo anali ndi ana aamuna 28, ana aakazi 60.)

²²Rehobowamu adasankha Abiya, mwana wa Maaka, kuti akhale mtsogoleri pakati pa abale ake, poti ankafuna kuti amlonge ufumu iyeyo.

²³Tsono mwanzeru adaika ena mwa ana ake aamuna m'zigawo zonse za ku Yuda ndi za ku Benjamini, ku mizinda yonse yamalinga. Ankaŵapatsa chakudya chambiri ndi kuŵafunira akazi ochuluka.