Read Buku Loyera - Chichewa 2 Mbi. 12 Bible Online

2 Mbi. 12 - Buku Loyera - Chichewa bible

2 Mbi. 12

¹Rehobowamu atangokhazikitsa ulamuliro wake ndi kuulimbitsa, iyeyo pamodzi ndi Aisraele onse adayamba kusiya malamulo a Chauta.

²Chaka chachisanu cha ufumu wa Rehobowamu, Sisake mfumu ya ku Ejipito adathira nkhondo mzinda wa Yerusalemu chifukwa chakuti Aisraele adaakhala osakhulupirika kwa Chauta.

³Sisakeyo adabwera ndi magaleta ankhondo okwanira 1,200 ndi anthu okwera pa akavalo 60,000. Anthu ake anali osaŵerengeka amene adadza nawo kuchokera ku Ejipito, Libiya, Sukimu ndi Etiopiya.

⁴Adalanda mizinda yamalinga ya ku Yuda, nakafika mpaka ku Yerusalemu.

⁵Tsono mneneri Semaya adadza kwa Rehobowamu ndi kwa atsogoleri a ku Yuda, amene anali atasonkhana ku Yerusalemu chifukwa cha Sisake, ndipo adaŵauza kuti, “Chauta akunena kuti, ‘Inu mwandisiya Ine, ndiye nanenso ndakusiyani ndi kukuperekani kwa Sisake.’ ”

⁶Apo atsogoleri a Aisraele pamodzi ndi mfumu yomwe adadzichepetsa, nati, “Chauta ndi wolungama.”

⁷Tsono Chauta ataona kuti anthuwo adzichepetsa, adauzanso Semaya kuti, “Anthuŵa adzichepetsa, sindidzaŵaononga ai, koma ndidzaŵapulumutsa. Sindidzaukwiyira mzinda wa Yerusalemu, motero Sisake sadzauwononga konse.

⁸Komabe adzakhala akapolo a Sisakeyo, kuti anthuwo adziŵe kusiyanitsa pakati pa kutumikira Ine ndi kutumikira mafumu a maiko achilendo.”

⁹ Tsono Sisake, mfumu ya ku Ejipito, adabwera kudzathira Yerusalemu nkhondo. Adalanda chuma cha ku Nyumba ya Chauta pamodzi ndi chuma cha ku nyumba ya mfumu. Adatenga zonse, ngakhalenso zishango zomwe zagolide zimene Solomoni adaapanga.

¹⁰Pambuyo pake mfumu Rehobowamu adapanga zishango zamkuŵa m'malo mwake, nazipereka kwa m'manja mwa akapitao a alonda amene ankalonda pakhomo pa nyumba ya mfumu.

¹¹Tsono nthaŵi zonse mfumu ikamaloŵa m'Nyumba ya Chauta, alondawo ankatenga zishango, kenaka nkumazibwezera ku chipinda cha alonda.

¹²Tsono mfumuyo itadzichepetsa, Chauta adaleka kufuna kuŵaononga kwathunthu. Motero zinthu zinkayenda bwino ku Yuda.

¹³Mfumu Rehobowamu adakhazikitsa ufumu wake ku Yerusalemu. Anali wa zaka 41 nthaŵi imene ankayamba kulamulira. Adalamulira zaka 17 ku Yerusalemu, mzinda umene Chauta adausankha pakati pa mafuko onse a Israele kuti azimpembedza kumeneko. Mai wake anali Naama, Mwamoni.

¹⁴Koma Rehobowamuyo adachita zoipa, popeza kuti mtima wake sudafunitsitse Chauta.

¹⁵Tsono ntchito za Rehobowamu kuyambira poyamba mpaka pomaliza, paja zidalembedwa m'buku la mbiri ya mneneri Semaya ndiponso m'buku la mbiri ya mneneri Ido. Panali nkhondo zosakata pakati pa Rehobowamu ndi Yerobowamu.

¹⁶Rehobowamu adamwalira, naikidwa m'manda mu mzinda wa Davide. Tsono Abiya mwana wake adaloŵa ufumu m'malo mwake.