Read Buku Loyera - Chichewa 2 Mbi. 16 Bible Online

2 Mbi. 16 - Buku Loyera - Chichewa bible

2 Mbi. 16

¹Pa chaka cha 36 cha ufumu wa Asa, Baasa mfumu ya ku Israele, adapita kukathira nkhondo dziko la Yuda. Adamangira linga mzinda wa Rama kuti aziletsa anthu kuloŵa kapena kutuluka m'dziko la Asa, mfumu ya ku Yuda.

²Tsono Asa adatenga siliva ndi golide ku malo osungira chuma cha ku Nyumba ya Chauta ndiponso ku nyumba ya mfumu, nazitumiza kwa Benihadadi, mfumu ya ku Siriya, amene ankakhala ku Damasiko. Mau a Asa anali akuti,

³“Tiye tigwirizane ine ndi iwe, monga m'mene ankachitira bambo wanga ndi bambo wako. Ona ndikukutumizira mphatso za siliva ndi golide. Pita ukaphwanye chigwirizano chako ndi Baasa, mfumu ya ku Israele, kuti asadzanditherenso nkhondo.”

⁴Benihadadi adamvera zimene adanena mfumu Asa zija, motero adatuma atsogoleri a magulu ake ankhondo kukathira nkhondo mizinda ya ku Israele. Adagonjetsa Iyoni, Dani, Abele-Maimu ndi mizinda yonse ya ku Nafutali yosungiramo zinthu.

⁵Tsono Baasa atazimva zimenezi, adaleka kumangira Rama linga ndipo ntchito yonseyo adaisiya.

⁶Apo mfumu Asa adabwera ndi Ayuda onse, ndipo adadzanyamula miyala ndi mitengo imene Baasa ankamangira linga la Rama. Zimenezi Asa adamangira linga la Geba ndi la Mizipa.

⁷Nthaŵi imeneyo mneneri Hanani adadza kwa Asa mfumu ya ku Yuda, namuuza kuti, “Chifukwa chakuti mudakhulupirira mfumu ya ku Siriya, osakhulupirira Chauta, Mulungu wanu, gulu lankhondo la mfumu ya ku Siriya lakuthaŵirani.

⁸Kodi Aetiopiya ndi Alibiya sanali gulu lalikulu lankhondo, lokhala ndi magaleta ochuluka ndiponso anthu ambirimbiri okwera pa akavalo? Komabe chifukwa chodalira Chauta, Chautayo adaŵapereka kwa inu.

⁹Paja maso a Chauta amayang'ana uku ndi uku pa dziko lonse lapansi, kuti aonetse mphamvu zake kwa anthu amene mtima wao uli wangwiro kwa Iyeyo. Inuyo mwachita zopusa pa zimenezi. Ndiye kuyambira tsopano lino, mpaka m'tsogolo muno, mudzakhala pa nkhondo.”

¹⁰Apo Asa adapsera mtima mneneriyo, ndipo adammanga namuika m'ndende, popeza kuti adaakwiya naye kwambiri chifukwa cha zimenezi. Kenaka Asayo adayamba kuchita zankhalwe pa anthu enanso nthaŵi yomweyo.

¹¹Tsono ntchito za Asa, kuyambira pa chiyambi mpaka pomaliza, zidalembedwa m'buku la Mafumu a ku Yuda ndi a ku Israele.

¹²Pa chaka cha 39 cha ufumu wake, Asa adayamba kudwala nthenda ya mapazi, ndipo nthendayo idakula kwambiri. Komabe ngakhale ankadwala choncho, sadapemphe chithandizo kwa Chauta, koma kwa asing'anga.

¹³Tsono adamwalira, pa chaka cha 41 cha ufumu wake.

¹⁴Adamuika m'manda amene iyeyo adaadzisemera mu mzinda wa Davide. Adagoneka mtembo wake pa chithatha chimene adaikapo zonunkhira zamitundumitundu zimene anthu opanga zonunkhira adazikonza. Ndipo adasonkha chimoto chachikulu kwambiri chomchitira ulemu.