Read Buku Loyera - Chichewa 2 Mbi. 17 Bible Online

2 Mbi. 17 - Buku Loyera - Chichewa bible

2 Mbi. 17

¹Yehosafati, mwana wa Asa, adaloŵa ufumu m'malo mwa bambo wake, ndipo adadzilimbitsa pofuna kulimbana ndi Aisraele.

²Adaika magulu ankhondo ku mizinda yonse yamalinga ya ku Yuda, ndipo adamanga maboma ankhondo ku dziko la Yuda ndi ku mizinda ya ku Efuremu, imene Asa bambo wake adailanda.

³Chauta anali naye Yehosafati, chifukwa chakuti ankatsata makhalidwe oyambayamba aja a Asa bambo wake. Sadatsate Abaala,

⁴koma ankatsata Mulungu wa atate ake, ndipo ankasunga malamulo ake, osatsata makhalidwe a Aisraele.

⁵Nchifukwa chake Chauta adaukhazikitsa ufumuwo m'manja mwake. Anthu onse a ku Yuda ankakhoma msonkho kwa iyeyo. Choncho anali nacho chuma chambiri ndiponso ulemu.

⁶Iyeyo adalimba mtima pa zinthu za Chauta. Kuwonjezera pamenepo, adathetsa akachisi ndiponso mafano a Aserimu ku Yuda.

⁷Pa chaka chachitatu cha ufumu wake, Yehosafati adatuma nduna zake, Benihali, Obadiya, Zekariya, Netanele ndi Mikaya, kuti akaphunzitse ku mizinda ya ku Yuda.

⁸Adapita ndi Alevi aŵa: Semaya, Netaniya, Zebadiya, Asahele, Semiramoti, Yohonatani, Adoniya, Tobiya ndi Tobadoniya. Alevi ameneŵa anali pamodzi ndi ansembe aŵa: Elisama ndi Yehoramu.

⁹Ankaphunzitsa ku Yuda, ali ndi buku la malamulo a Chauta. Ndipo adayendera mizinda yonse ya ku Yuda, namaphunzitsa pakati pa anthu.

¹⁰Maufumu onse a m'maiko ozungulira Yuda ankaopa Chauta, ndipo sadachitenso nkhondo ndi Yehosafati.

¹¹Afilisti ena adabwera ndi mphatso kwa Yehosafatiyo, pamodzi ndi siliva wa msonkho. Arabu nawonso adabwera ndi nkhosa zamphongo 7,700 ndi atonde 7,700.

¹²Ndipo mphamvu za Yehosafati zidanka zikulirakulira. Ku Yuda adamanga malinga ndi mizinda yosungirako zinthu.

¹³Choncho anali ndi nyumba zikuluzikulu zosungiramo zinthu ku mizinda ya ku Yuda. Ku Yerusalemu anali ndi ankhondo, anthu amphamvu ndi olimba mtima.

¹⁴Chiŵerengero chao potsata mabanja ao chinali chotere: Ku Yuda, atsogoleri a zikwi anali aŵa: Adina amene anali ndi anthu amphamvu ndi olimba mtima 300,000.

¹⁵Yehohanani, mtsogoleri wotsatana ndi iyeyo, anali ndi anthu 280,000.

¹⁶Amasiya mwana wa Zikiri, mtsogoleri wotsatana naye, amene adaadzipereka mwaufulu ku ntchito ya Chauta, anali ndi anthu amphamvu ndi olimba mtima 200,000. (Amasiya adadzipereka kutumikira Ambuye.)

¹⁷Ku Benjamini, Eliyada munthu wolimba mtima, anali ndi anthu 200,000 amauta ndi azishango.

¹⁸Yehozabadi anali mtsogoleri wotsatana ndi iyeyo, ndipo anali ndi anthu okonzekera nkhondo 180,000.

¹⁹Ameneŵa ndiwo ankatumikira mfumu, pamodzi ndi ena amene mfumu idaŵaika ku mizinda yamalinga ku dziko lonse la Yuda.