Read Buku Loyera - Chichewa 2 Mbi. 33 Bible Online

2 Mbi. 33 - Buku Loyera - Chichewa bible

2 Mbi. 33

¹Manase anali wa zaka khumi ndi ziŵiri pamene adaloŵa ufumu, ndipo adalamulira zaka 55 ku Yerusalemu.

² Iyeyu adachita zoipa pamaso pa Chauta potsata ntchito zonyansa za anthu a mitundu ina, amene Chauta adaaŵapirikitsa pofika Aisraele.

³Adayambitsanso akachisi amene bambo wake Hezekiya adaaŵaononga. Adapanganso maguwa a Abaala ndiponso mafano, namapembedza zinthu zonse zamumlengalenga, ndi kumazitumikira.

⁴ Adamanga maguwa achikunja m'Nyumba ya Chauta imene Chauta mwini wake anali atanena kuti, “Dzina langa lidzakhala ku Yerusalemu mpaka muyaya.”

⁵Adamanga maguwa m'mabwalo aŵiri a Nyumba ya Chauta, kumangira zolengedwa zonse zamumlengalenga.

⁶Ndipo adapereka ana ake aamuna ngati nsembe yopsereza. Adachita zimenezi ku chigwa cha mwana wa Hinomu, ndipo ankachita zobwebwetetsa, namasamala zamalodza ndi zanyanga, nkumamvana ndi anthu olankhula ndi mizimu ndi anthu amatsenga. Adachita zoipa zambiri pamaso pa Chauta, naputa mkwiyo wake.

⁷ Tsono m'Nyumba ya Chauta adaikamo fano lopanga iyeyo, Nyumba imene Mulungu adaauza Davide ndi Solomoni mwana wake kuti, “M'nyumba imeneyi, mu Yerusalemu muno, malo amene ndaŵasankhula pakati pa mafuko onse a Aisraele, ndimo m'mene adzatamandira dzina langa mpaka muyaya.

⁸Ndipo sindidzachotsa phazi la Israele m'dziko limene ndidapatsa makolo anu, pokhapokha akamasamala ndi kuchita zonse zimene ndidaŵauza pakumvera malamulo ndi malangizo onse amene ndidaŵapatsa kudzera mwa Mose.”

⁹Manase adachimwitsa anthu a ku Yuda pamodzi ndi anthu okhala mu Yerusalemu. Ankachita zoipa zambiri kupambana anthu a mitundu ina amene Chauta adaŵaononga pofika Aisraele.

¹⁰Chauta adalankhula ndi Manase ndiponso ndi anthu ake, koma iwo sadasamaleko.

¹¹Nchifukwa chake Chautayo adaŵatumira atsogoleri ankhondo a mfumu ya ku Asiriya kudzamenyana naye Manase. Adamkoka ndi ngowe zachitsulo nammanga ndi maunyolo amkuŵa, nkupita naye ku Babiloni.

¹²Ndiye pamene anali pa mavuto, adapempha kuti Chauta, Mulungu wake, amkomere mtima, ndipo adadzichepetsa kwambiri pamaso pa Mulungu wa makolo ake.

¹³Atapemphera kwa Iye, Mulungu adamva kupempha kwake ndi kupemba kwake, ndipo adambwezanso ku Yerusalemu mu ufumu wake. Motero Manase adadziŵa kuti Chauta ndi Mulungu.

¹⁴Pambuyo pake adamanga khoma la kunja kwa mzinda wa Davide kuzambwe kwake kwa Gihoni, kuchokera ku chigwa mpaka poloŵera ku Chipata cha Nsomba. Ndipo adamanga khomalo kuzungulira Ofele nalikweza kwambiri. Adaikanso atsogoleri ankhondo ku mizinda yonse yamalinga ya ku Yuda.

¹⁵Adachotsa milungu yachilendo ndiponso fano m'Nyumba ya Mulungu. Adachotsa maguwa onse achikunja amene anali ataŵamanga pa phiri la Chauta ku Yerusalemu. Ndipo adaŵataya kunja kwa mzinda.

¹⁶Adamanganso guwa la Chauta, namaperekerapo nsembe zachiyanjano ndiponso nsembe zothokozera. Tsono adalamula anthu a ku Yuda kuti azitumikira Chauta Mulungu wa Israele.

¹⁷Anthuwo ankaperekabe nsembe ku akachisi, koma kwa Chauta, Mulungu wao yekha.

¹⁸Tsono ntchito zina zonse za Manase, pamodzi ndi pemphero lake kwa Mulungu wake, ndiponso mau a aneneri amene adalankhula naye m'dzina la Chauta, Mulungu wa Israele, zidalembedwa m'buku la mbiri ya mafumu a ku Israele.

¹⁹Ndipo pemphero lake ndi m'mene Mulungu adalilandirira pemphero lakelo, machimo ake onse, kusakhulupirika kwake, akachisi amene adayambitsa, m'mene adakhazikitsira mafano ndi zithunzi zina, asanadzichepetse paja, zonsezi zidalembedwa m'buku la mbiri ya aneneri.

²⁰Choncho Manase adamwalira, naikidwa m'nyumba mwake. Tsono Amoni mwana wake adaloŵa ufumu m'malo mwake.

²¹Amoni anali wa zaka 22 pamene adaloŵa ufumu, ndipo adalamulira zaka ziŵiri ku Yerusalemu.

²²Iyeyo adachita zoipa pamaso pa Chauta monga m'mene ankachitira Manase bambo wake. Amoniyo ankapereka nsembe kwa mafano onse amene bambo wake adaŵapanga, ndipo ankaŵatumikira.

²³Sadadzichepetse pamaso pa Chauta monga momwe Manase bambo wake adadzichepetsera. Koma Amoniyu ankadzipereka ku machimo kosalekeza.

²⁴Tsono anyamata ake adamchita chiwembu, namupha m'nyumba mwake.

²⁵Koma anthu am'dzikomo adapha onse aja amene adamchita chiwembu Amoniyo. Kenaka anthuwo adalonga Yosiya mwana wake kuti akhale mfumu m'malo mwake.