Read Buku Loyera - Chichewa Eza. 10 Bible Online

Eza. 10 - Buku Loyera - Chichewa bible

Eza. 10

¹Pamene Ezara ankapemphera ndi kulapa, alikulira ndipo atadzigwetsa pansi ku Nyumba ya Mulungu, chinamtindi cha anthu chidabwera kwa iye kudzasonkhana. Panali amuna, akazi ndi ana, kuchokera m'dziko lonse la Israele, ndipo ankalira koopsa.

²Tsono Sekaniya, mwana wa Yehiyele, wa fuko la Elamu, adauza Ezara kuti, “Ife takhala osakhulupirika kwa Mulungu wathu, ndipo takhala tikukwatira akazi achilendo a mitundu ya m'maiko akunoŵa. Koma ngakhale zili choncho, chikhulupiriro chilipobe pakati pa Aisraele.

³Tiyeni tsono tichite naye chipangano Mulungu wathu, kuti ifeyo tilekane nawo akazi ameneŵa pamodzi ndi ana ao, potsata uphungu wa inu mbuyanga ndi wa anthu amene amaopa malamulo a Mulungu wathu. Ndipo tidzazichitadi potsata malamulowo.

⁴Ndiye inu dzukani, imeneyi ndi ntchito yanu, ndipo ife tili nanu. Valani dzilimbe ndipo muigwire ntchitoyo.”

⁵Choncho Ezara adanyamuka ndipo adalumbiritsa akulu a ansembe, Alevi ndi Aisraele onse, kuti adzachitedi monga m'mene Sekaniya adaanenera. Tsono onsewo adalumbira.

⁶Pambuyo pake Ezara adachokako ku Nyumba ya Mulungu napita ku chipinda cha Yehohanani, mwana wa Eliyasibu, kumene adakachezera usikuwo. Sadadye buledi kapena kumwa madzi. Nthaŵi yonseyo adakhalira kulira chifukwa cha kusakhulupirika kwa anthu obwerako ku ukapolo aja.

⁷Tsono anthu adalengeza m'dziko lonse la Yuda ndi mu mzinda wa Yerusalemu, kwa onse ochokera ku ukapolo aja, kuti asonkhane ku Yerusalemu.

⁸Adanena kuti, “Wina aliyense akapanda kufika asanathe masiku atatu, ndiye kuti potsata lamulo la atsogoleri ndi la akulu, adzayenera kumlanda katundu wake yense, ndipo adzachotsedwe m'gulu la anthu obwerako ku ukapolo aja.”

⁹Choncho anthu onse a m'dziko la Yuda ndi a m'dziko la Benjamini adasonkhana ku Yerusalemu asanathe masiku atatu. Limeneli linali tsiku la 20 la mwezi wachisanu ndi chinai. Ndipo anthu onse adakhala pansi pa bwalo la Nyumba ya Mulungu, ali njenjenje chifukwa cha nkhani imeneyi ndiponso chifukwa cha mvula yambiri imene inkagwa.

¹⁰Tsono wansembe Ezara adaimirira nati, “Mudachimwa pomakwatira akazi achikunja, ndipo mudaonjezera tchimo la Israele.

¹¹Lapani tsopano kwa Chauta, Mulungu wa makolo anu, ndipo muchite zimene Iye akufuna. Dzichotseni pakati pa mitundu ya anthu a m'maiko enaŵa, ndi pa akazi achilendowo.”

¹²Chitamva mau amenewo, chinantindi chonse chapamsonkhanopo chidayankha mokweza mau kuti, “Ndi chonchodi, tiyenera kuchitadi monga mwaneneramo.

¹³Koma anthu ali panoŵa ngambiri, ndipo mvula ikugwa kwamphamvu, sitingathe kukaima pa mtetete. Chinanso nchakuti ntchitoyi si ya tsiku limodzi kapena masiku aŵiri, pakuti tidachimwa kwambiri pa nkhani imeneyi.

¹⁴Tsono atsogoleri athu aimirire m'malo mwa msonkhano wonse. Anthu onse a m'mizinda yathu amene adakwatira akazi achilendo abwere pa nthaŵi imene inu munene, ndipo abwere pamodzi ndi akulu ndi aweruzi a mzinda uliwonse. Motero mkwiyo woopsa wa Mulungu wathu pa nkhani imeneyi udzachoka.”

¹⁵Yonatani yekha, mwana wa Asahele, ndiponso Yahazeiya, mwana wa Tikiwa, ndi amene adatsutsapo pa zimenezi, ndipo Mesulamu pamodzi ndi Mlevi Sabetai, adaŵavomereza.

¹⁶Choncho anthu obwerako ku ukapolo aja, adachitadi momwemo. Wansembe Ezara adasankha anthu, akulu a mabanja potsata mafuko ao, aliyense kuchita kumlemba dzina. Pa tsiku loyamba la mwezi wakhumi, adayambapo kuifufuza nkhani imeneyi.

¹⁷Ndipo pa tsiku loyamba la mwezi woyamba, anali atathana nawo anthu amene adaakwatira akazi achilendo aja.

¹⁸Nawu mndandanda wa ansembe amene adaakwatira akazi achilendo: Pa banja la Yesuwa ndi abale ake, ana a Yozadaki, panali aŵa: Maaseiya, Eliyezere, Yaribu ndi Gedaliya.

¹⁹Iwo adatsimikiza zochotsa akazi ao, ndipo adapereka nkhosa yamphongo yopepesera machimo ao.

²⁰Pa banja la Imara panali Hanani ndi Zebadiya.

²¹Pa banja la Harimu panali Maaseiya, Eliya, Semaya, Yehiyele ndi Uziya.

²²Pa banja la Pasuri panali Eliyoenai, Maaseiya, Ismaele, Netanele, Yozabadi ndi Elasa.

²³Pakati pa Alevi panali aŵa: Yosabadi, Simei, Kelaya (amene ankatchedwanso Kelita), Petahiya, Yuda ndi Eliyezere.

²⁴Pakati pa oimba nyimbo, panali Eliyasibu. Pakati pa alonda a ku Nyumba ya Mulungu panali Salumu, Telemu ndi Uri.

²⁵Pakati pa Israele: a fuko la Parosi anali Ramiya, Iziya, Malikiya, Miyamini, Eleazara, Hasabiya ndi Benaya.

²⁶A fuko la Elamu anali Mataniya, Zekariya, Yehiyele, Abidi, Yeremoti ndi Eliya.

²⁷A fuko la Zatu anali Eliyoenai, Eliyasibu, Mataniya, Yeremoti, Zabadi, ndi Aziza.

²⁸A fuko la Bebai anali Yehohanani, Hananiya, Zabibai ndi Atilai.

²⁹A fuko la Bani anali Mesulamu, Malaki, Adaya, Yasubu, Seyala ndi Yeremoti.

³⁰A fuko la Pahatimowabu anali Adina, Kelali, Benaya, Maaseiya, Mataniya, Bezalele, Binuyi ndi Manase.

³¹A fuko la Harimu anali Eliyezere, Isiya, Malikiya, Semaya, Simeoni

³²Benjamini, Maluki ndi Semariya.

³³A fuko la Hasumu anali Matenai, Matata, Zebadi, Elifeleti, Yeremai, Manase ndi Simei.

³⁴A fuko la Bani anali Maadai, Amuramu, Uwele,

³⁵Benaya, Bedeiya, Keluhu,

³⁶Vaniya, Meremoti, Eliyasibu,

³⁷Mataniya, Metenai, ndi Yasu.

³⁸A fuko la Binuyi anali Simei,

³⁹Selemiya, Natani, Adaya,

⁴⁰Makinadebai, Sasai, Sarai,

⁴¹Azarele, Seremiya, Semariya,

⁴²Salumu, Amariya ndi Yosefe.

⁴³A fuko la Nebo anali Yeiyele, Matitiya, Zabadi, Zebina, Yadai, Yowele ndi Benaya.

⁴⁴Onseŵa adaakwatira akazi achilendo. Tsono adaŵasudzula akaziwo pamodzi ndi ana ao omwe.