Read Buku Loyera - Chichewa Eza. 8 Bible Online

Eza. 8 - Buku Loyera - Chichewa bible

Eza. 8

¹Nawu mndandanda wa maina a atsogoleri a mabanja amene adabwera nane kuchokera ku Babiloni, pa nthaŵi ya ufumu wa Arita-kisereksesi:

²Geresomo, wa fuko la Finehasi. Daniele, wa fuko la Itamara.

³Hatusi, mwana wa Sekaniya, wa fuko la Davide. Zekariya, wa fuko la Parosi. Iyeyu adalembedwa pamodzi ndi anthu ena okwanira 150.

⁴Eliehoenai, mwana wa Zerahiya, wa fuko la Pahatimowabu. Pamodzi ndi iyeyo panali anthu 200.

⁵Sekaniya, mwana wa Yahaziele, wa fuko la Zatu. Pamodzi ndi iyeyo panali anthu 300.

⁶Ebedi, mwana wa Yonatani, wa fuko la Adini. Pamodzi ndi iyeyo panali anthu 50.

⁷Yesaya, mwana wa Ataliya, wa fuko la Elamu. Pamodzi ndi iyeyo panali anthu 70.

⁸Zebadiya, mwana wa Mikaele, wa fuko la Sefatiya. Pamodzi ndi iyeyo panali anthu 80.

⁹Obadiya, mwana wa Yehiyele, wa fuko la Yowabu. Pamodzi ndi iyeyo panali anthu 218.

¹⁰Selomiti, mwana wa Yosofiya, wa fuko la Bani. Pamodzi ndi iyeyo panali anthu 160.

¹¹Zekariya, mwana wa Bebai, wa fuko la Bebai. Pamodzi ndi iyeyo panali anthu 28.

¹²Yohanani, mwana wa Hakatani, wa fuko la Azigadi. Pamodzi ndi iyeyo panali anthu 110.

¹³Atsogoleri a fuko la Adonikamu, anthu amene adabwera pambuyo pake, anali Elifeleti, Yeiyele ndi Semaya, ndipo pamodzi ndi iwowo panali anthu 60.

¹⁴Atsogoleri a fuko la Bigivai anali Utai ndi Zakuri, ndipo pamodzi ndi iwowo panali anthu 70.

¹⁵Anthu onsewo ndidaŵasonkhanitsa ku mtsinje umene umafika mpaka ku mudzi wa Ahava, ndipo kumeneko tidagona m'zithando masiku atatu. Pamene ndinkayang'ana anthu ndi ansembe, ndidapeza kuti ana a Levi palibe.

¹⁶Tsono ndidaitana atsogoleri aŵa, Eliyezere, Ariyele, Semaya, Elinatani, Yaribu, Elinatani, Natani, Zekariya ndi Mesulamu, pamodzi ndi aphunzitsi aŵiri, Yoyaribu ndi Elinatani.

¹⁷Ndipo ndidaŵatuma kwa Ido, mtsogoleri wa malo otchedwa Kasifiya. Ndidaŵauza zoti akanene kwa Ido ndi kwa abale ake, ogwira ntchito ku Nyumba ya Mulungu ku Kasifiyako, kuti atitumizire anthu odzatumikira ku Nyumba ya Mulungu wathu.

¹⁸Chifukwa cha kutikomera mtima Mulungu wathu, Ido adatitumizira munthu wanzeru, mwana wa fuko la Mahili, mwana wa Levi, mwana wa Israele, dzina lake Serebiya, pamodzi ndi ana ake aamuna ndi achibale ake, anthu 18 pamodzi.

¹⁹Adatitumiziranso Hasabiya ndi Yeshaiya wa fuko la Merari, kudzanso achibale ake ndiponso ana ao, anthu makumi aŵiri.

²⁰Panalinso atumiki a ku Nyumba ya Mulungu okwanira 220, amene Davide ndi nduna zake adaaŵasankha kuti azitumikira Alevi. Anthu onseŵa adalembedwa potsata maina ao.

²¹Ku mtsinje wa Ahavako, ndidalengeza kuti anthu onse asale zakudya, adzichepetse pamaso pa Mulungu wathu ndi kumpempha kuti atitsogolere ife ndi ana athu, ndiponso kuti ateteze katundu wathu pa ulendo wathu.

²²Ndinali ndi manyazi kupempha mfumu kuti itipatse gulu la asilikali, ena oyenda pansi ndi ena okwera pa akavalo, oti atiteteze kwa adani athu pa njira. Tinali titauza mfumuyo kuti, “Mulungu wathu amaŵadalitsa onse okhulupirira Iye, koma amaŵakwiyira amene salabadako za Iye.”

²³Choncho tidasala zakudya ndi kupemphera kwa Mulungu wathu kuti atiteteze, ndipo Iye adamva kupempha kwathu.

²⁴Tsono ndidasankha atsogoleri a ansembe khumi ndi aŵiri aŵa, Serebiya ndi Hasabiya, pamodzi ndi abale ao khumi.

²⁵Ndipo ndidaŵayesera siliva ndi golide, ndiponso ziŵiya ndi zopereka za ku Nyumba ya Mulungu wathu zimene mfumu ndi aphungu ake ndi akalonga ake ndi Aisraele onse amene anali kumeneko, adaazipereka.

²⁶Nditaziyesa zonse, ndidaŵapatsa m'manja mwao siliva wa matani 22, ziŵiya zasiliva za makilogaramu 70, ndiponso golide wa makilogaramu 3,400,

²⁷mbale zagolide makumi aŵiri zolemera makilogaramu pafupi 8 ndi theka, ndiponso ziŵiya ziŵiri za mkuŵa wosalala wonyezemira bwino, zamtengowapatali wonga wa golide.

²⁸Kenaka ndidaŵauza kuti, “Inu ndinu opatulika a Chauta, ndiponso mphatso zonsezi nzopatulika. Siliva ndi golideyu nzopereka zaufulu kwa Chauta, Mulungu wa makolo anu.

²⁹Muzisamale ndi kuzisunga mpaka mutaziyesa pamaso pa akulu a ansembe, ndi Alevi, ndi akulu a mabanja a Aisraele, m'zipinda za m'Nyumba ya Chauta ku Yerusalemu.”

³⁰Motero ansembe ndi Alevi adalandira siliva, golide ndi ziŵiya zoyesedwa zija, kuti apite nazo ku Yerusalemu ku Nyumba ya Mulungu wathu.

³¹Tsono tidachoka ku mtsinje wa Ahava pa tsiku la 12, pa mwezi woyamba, kupita ku Yerusalemu. Mulungu wathu anali nafe ndipo adatipulumutsa kwa adani athu, makamaka kwa anthu otibisalira pa njira.

³²Tidafika ku Yerusalemu, ndipo tidatandala masiku atatu kumeneko.

³³Pa tsiku lachinai lake, m'Nyumba ya Mulungu wathu momwemo, adayesa siliva ndi golide ndi ziŵiya zija, nkuzipereka m'manja mwa wansembe Meremoti, mwana wa Uriya. Pamodzi ndi iyeyo panali Eleazara mwana wa Finehasi, ndiponso Alevi aŵa: Yozabadi mwana wa Yesuwa, ndi Nowadiya mwana wa Biruyi.

³⁴Zonsezo adaziŵerenga ndi kuziyesa ndipo adalemba kulemera kwa chinthu chilichonse.

³⁵Nthaŵi imeneyo anthu amene adabwerako ku ukapolo, onse amene adaatengedwa aja, adapereka nsembe zopsereza kwa Mulungu wa Israele, ng'ombe zamphongo khumi ndi ziŵiri, kuperekera Aisraele onse, nkhosa zamphongo 96, anaankhosa 77, ndiponso atonde 12, ngati nsembe yopepesera machimo ao. Zonsezo zinali nsembe zopsereza zopereka kwa Chauta.

³⁶Iwowo adaperekanso chidziŵitso cha mfumu chija kwa akalonga a mfumu ndi kwa akazembe a m'dera la Patsidya pa Yufurate. Pamenepo iwowo adathandiza Ayuda ndiponso ntchito za pa Nyumba ya Mulungu.