Read Buku Loyera - Chichewa Tob. 1 Bible Online

Tob. 1 - Buku Loyera - Chichewa bible

Tob. 1

¹Ili ndi buku losimba za Tobiti, mwana wa Tobiele, mwana wa Ananiyele, mwana wa Aduwele, mwana wa Gabaele, mwana wa Rafaele, mwana wa Raguele, wa banja la Asiyele ndi wa fuko la Nafutali.

²Tobiti adaatengedwa ukapolo kupita ku dziko lachilendo, nthaŵi ya Salimanezere, mfumu ya ku Asiriya. Adaamugwira ku Tisibe chakumwera kwa Kedezi-Nafutali ku Galileya wakumpoto, kumpoto kwa dziko la Hazori koma chakuzambwe, ndiponso kumpoto kwa Fogori.

³Ine Tobiti ndidayenda m'njira ya choona ndipo ndidagwira ntchito zolungama masiku onse a moyo wanga. Ndidapereka zabwino zambiri zothandiza abale anga ndi anthu a mtundu wanga, amene adatengedwa ukapolo pamodzi nane kupita ku Ninive, ku dziko la Asiriya.

⁴Pa nthaŵi ya unyamata wanga, ndikali kwathu ku dziko la Israele, fuko lonse la Nafutali, kholo langa, lidapatukana ndi banja la Davide ndi mzinda wa Yerusalemu. Koma tsono mzinda umenewu Mulungu adaausankhula mwa mafuko onse a Israele, kuti aziperekerako nsembe mafuko onse a Israele. Mzindawo ndi umene adaupatula ndi kumangamo Nyumba yachipembedzo yokhalamo Mulungu, imene adaikhazikitsira mibadwo yonse yakutsogolo.

⁵Koma abale anga ndi onse a m'fuko la Nafutali, kholo langa, iwo ankapereka nsembe kwa mwanawang'ombe amene Yerobowamu, mfumu ya ku Israele, adaapanga ku Dani. Ankapereka nsembezo pa mapiri onse a ku Galileya.

⁶Ine ndekha ndinkapita ku Yerusalemu pa masiku achikondwerero, potsata lamulo lokhalira Aisraele onse kwamuyaya. Ndinkathamangira ku Yerusalemu ndi zokolola zoyamba, ana amphongo oyamba a ziŵeto, chachikhumi cha ziŵeto zanga, ndiponso ubweya woyamba wa nkhosa zanga.

⁷Ndinkazitula kwa ansembe, ana a Aroni, kuti zikhale zopereka za pa guwa lansembe. Ana a Levi ogwira ntchito ku Yerusalemu, ndinkaŵapatsa chachikhumi cha tirigu, cha vinyo, cha mafuta, cha makangaza, cha nkhuyu ndi cha zipatso zina zonse. Pa zaka zisanu ndi chimodzi[1] ndinkagulitsa chachikhumi chachiŵiri cha zinthu zanga, ndalama zake nkukazitula ku ntchito za ku Yerusalemu.

⁸Chachikhumi chachitatu ndinkachipereka kwa ana ndi kwa akazi amasiye, ndiponso kwa alendo amene ankakhala pakati pa Aisraele. Ndinkagaŵa zoperekazo chaka chachitatu chilichonse. Pakudya zimenezo tinkatsata malamulo a Mose ndi malangizo amene Debora, amai a Ananiyele, kholo lathu, adandisiyira, poti ine bambo wanga anali atamwalira, kundisiya wamasiye.

⁹Nditakula, ndidakwatira mkazi wa mtundu wanga, dzina lake Hana. Adandibalira mwana wamwamuna amene ndidamutcha dzina loti Tobiyasi.

¹⁰Titatengedwa ukapolo kupita ku Asiriya, tidafika ku Ninive. Abale anga onse ndi onse a mtundu wanga ankadya chakudya cha anthu akunjawo.

¹¹Koma ine ndekha sindinkadya nawo chakudyacho.

¹²Tsono popeza kuti ndinali wokhulupirika kwa Mulungu wanga ndi mtima wanga wonse,

¹³Wopambanazonse adandipezetsa kuyanja pamaso pa mfumu Salimanezere. Motero iye adandipatsa udindo wogula zonse zimene iyeyo ankafuna.

¹⁴Ndinkapitapita ku Mediya, ndipo kumeneko ndinkamugulira zonse mpaka nthaŵi ya kufa kwake. Tsiku lina Gabaele, mbale wa Gabriyasi, wa ku Ragesi, ku Mediya komweko, ndidamusungiza matumba a ndalama zasiliva zopitirira makilogramu 340.

¹⁵Salimanezere atafa, ndipo mwana wake Senakeribu ataloŵa ufumu, njira zopita ku Mediya zidatsekeka, choncho sindidathe kupitakonso.

¹⁶Pa nthaŵi ya Salimanezere, ndinkapereka ndalama zothandiza abale anga, anthu a mtundu wanga. Anthu anjala ndinkaŵapatsa chakudya, ndipo anthu ausiŵa ndinkaŵapatsa zovala.

¹⁷Tsono ndikaona kuti mmodzi mwa abale anga wafa, ndipo mtembo wake angouti chi kuseri kwa linga la Ninive, ndinkauika m'manda.

¹⁸Ndinkaŵaikanso, koma mobisa, onse amene Senakeribu ankaŵapha, pa nthaŵi imene iyeyo ankathaŵa ku Yudeya. Paja nthaŵi imeneyo Mulungu, Mfumu ya Kumwamba, adaamulanga chifukwa cha mau ake achipongwe omnyoza Iyeyo. Motero Senakeribu adaapsa mtima, napha Aisraele ambiri. Mitembo yao ine ndinkaiba nkumaikwirira. Pamene Senakeribu adaifunafuna, sadaipeze.

¹⁹Tsono munthu wina wa ku Ninive ndiye adapita kukaulula kwa mfumu kuti ndine amene ndinkaika malirowo mobisa. Ndiye ine nditadziŵa kuti mfumu yamva zonse za ine, ndipo ikundifunafuna kuti indiphe, ndidachita mantha nkuthaŵa kukabisala.

²⁰Adandilanda katundu wanga yense, osandisiyira kanthu, ndipo zonse adakaziika m'nyumba ya chuma cha mfumu. Ndidangotsala ndi mkazi wanga Hana, ndi mwana wanga Tobiyasi.

²¹Patangopita pafupi masiku makumi anai, mfumu Senakeribu adaphedwa ndi ana ake aŵiri, iwowo nkuthaŵira ku mapiri a Ararati. Asaradoni, mwana wake, adaloŵa ufumu m'malo mwake. Adasankha Ahikare, mwana wa mbale wanga Anaele, kuti akhale nduna yazachuma m'dzikolo, ndipo adampatsa udindo woyendetsa zinthu zonse.

²²Tsono Ahikare adandinenerako kwa mfumu, ndipo ndidabwerera ku Ninive. Pa nthaŵi ya Senakeribu ija Ahikare anali kapitao wamkulu woyang'anira zopereka vinyo, analinso mlonda wosunga chidindo chosindikizira cha mfumu. Ankayang'anira zonse za boma, ndipo anali msungachuma wa mfumu ya ku Asiriya. Tsono Asaradoni adamsunga m'maudindo omwewo. Ahikareyo anali wa m'banja langa, mwana wa mbale wanga.