Read Buku Loyera - Chichewa Tob. 8 Bible Online

Tob. 8 - Buku Loyera - Chichewa bible

Tob. 8

¹Atatha kudya ndi kumwa, adafuna kugona. Adaperekeza mnyamatayo m'chipinda muja.

²Tsono Tobiyasi adakumbukira mau a Rafaele aja. Adatulutsa m'thumba muja chiŵindi cha nsomba chija pamodzi ndi mtima wake uja, naziika pa moto wa lubani.

³Fungo la nsomba lidaopseza demoni uja ndipo adathaŵira ku maiko a kumpoto kwa Ejipito[3]. Rafaele adamutsatira komweko, ndipo atamupeza adamukwidzinga ndi unyolo.

⁴Tobiyasi ndi Sara atakhala okha ndipo atatseka pakhomo pa chipinda, Tobiyasi adadzuka m'bedi, nauza Sara kuti, “Mlongo wanga, dzuka, tiyambe tapemphera ndi kupembedza Ambuye, kuti atichitire chifundo ndi kutiteteza.”

⁵Sara adadzuka, ndipo onse aŵiri adayamba kupemphera kuti Ambuye aŵateteze. Tobiyasi adati, “Tikukutamandani, Inu Mulungu wa makolo athu, dzina lanu litamandike pa mibadwo yonse. Zakumwamba zikuyamikeni, zonse zimene mudazilenga zikuyamikeni mpaka muyaya.

⁶“Ndinu mudalenga Adamu, ndinunso mudalenga Heva mkazi wake kuti azimuthandiza ndi kumuchirikiza. Ndipo mwa aŵiriwo mudafumira mtundu wonse wa anthu. Ndinu mudaanena kuti, ‘Sibwino kuti munthuyu akhale yekha, tiyeni timupangire mthandizi wake wofanafana naye.’

⁷“Tsopano ndikumtenga mlongo wangayu osati chifukwa cholakalaka chisangalatso chabe, koma kuti ndichite ukwati weniweni. Choncho mutichitire chifundo, ine ndi iyeyu, kuti aŵirife tidzakalambire pamodzi.”

⁸Tsono aŵiriwo adati, “Amen, Amen,”

⁹nkupita kukagona usikuwo. Usiku womwewo Raguele adadzuka, naitana akapolo ake, kuti akamthandize kukumba manda.

¹⁰Mumtima mwake ankaganiza kuti, “Mwina Tobiyasiyunso afa, ndiye anthu ena adzatiseka ndi kutinyoza.”

¹¹Atatha kukumba mandawo, Raguele adabwerera kunyumba. Adaitana mkazi wake nati,

¹²“Tumiza mdzakazi mmodzi kuchipindako, akaone ngati Tobiyasi ali moyobe. Ngati wafa, timuikiretu asanadziŵe ndi munthu mmodzi yemwe.”

¹³Adamutumizadi mdzakaziyo. Iye adayatsa nyale, nakatsekula pa khomo. Adaloŵa, naŵapeza ali m'tulo, atagona pamodzi.

¹⁴Mdzakaziyo adatuluka, nadzaŵanong'oneza iwo aja kuti, “Ai, ali moyo, ali bwinobwino ndithu.”

¹⁵Apo iwowo adayamika Mulungu wakumwamba, nati, “Tikukutamandani, Inu Mulungu, ndi chiyamiko chonse changwiro. Mutamandike mpaka muyaya.

¹⁶“Mulemekezeke chifukwa chondikondwetsa. Zimene ndinkaopa sizidachitike. M'malo mwake mwatiwonetsa kuti muli ndi chifundo chosaneneka.

¹⁷“Mutamandike chifukwa cha chifundo chimene mwaŵaonetsa ana athu aŵiriŵa, amene aliyense ndi mmodzi yekha m'banja mwao. Muŵakomere mtima ndi kuŵatchinjiriza, Inu Ambuye, pa moyo wao wonse adzapeze chimwemwe ndi chifundo.”

¹⁸Tsono Tobiti adalamula akapolo ake kuti akafotsere dzenje lija kusanache.

¹⁹Pambuyo pake adauza mkazi wake kuti aphike buledi wambiri. Adapita ku khola kukatenga ng'ombe ziŵiri ndi nkhosa zinai. Adalamula kuti azikonze, ndipo adayambadi kuziphika.

²⁰Adaitana Tobiyasi namuuza kuti, “Pa milungu iŵiri usachoke kuno, ubakhala konkuno, kuti udye nafe ndi kumwa, ndipo uzisangalatsa mtima wa mwana wanga amene wakhala akuvutika ndi chisoni.

²¹Ulandire theka la chuma changa, ndipo ubwerere uli moyo kwa atate ako. Theka lina, tikadzafa ine ndi mkazi wanga, lidzakhalanso lako. Limba mtima, mwana wanga! Ndine bambo wako, Edina ndi mai wako. Ndife makolo ako mpaka m'tsogolo, monga m'mene takhalira makolo a mkazi wako tsopano ndi nthaŵi zonse. Limba mtima, mwana wanga.”