Read Buku Loyera - Chichewa Tob. 9 Bible Online

Tob. 9 - Buku Loyera - Chichewa bible

Tob. 9

¹Tsono Tobiyasi adaitana mngelo Rafaele, namuuza kuti,

²“Azariyasi, mbale wanga, tenga antchito anai ndi ngamira ziŵiri, upite ku Ragesi kwa Gabaele. Ukamupatse kalata yachipangano yakeyi.

³Ukatenge ndalama zija, kenaka ubwere naye ku phwando la ukwati wanga.

⁴Kumbukira kuti bambo wanga wakhala akuŵerenga masiku, ndiye ndikati ndichedwe ngakhale tsiku limodzi, ndidzamuvutitsa. Komabe malumbiro amene Raguele wachita sindingathe kuŵaswa.”

⁵Motero Rafaele adapita ndi antchito anaiwo ndi ngamira ziŵirizo ku Ragesi, ku dziko la Mediya, nakagona kwa Gabaele. Adamupatsa kalata yake ija, namudziŵitsa kuti Tobiyasi, mwana wa Tobiti, wakwatira, ndipo kuti akumuitana ku phwando laukwati. Pamenepo Gabaele adamuŵerengera matumba a ndalama zija ali ndi zimatiro zosasweka, naŵasenzetsa ngamira zija.

⁶Ndipo aŵiriwo adanyamuka m'maŵa, napita ku phwando laukwati. Adaloŵa kunyumba kwa Raguele, napeza Tobiyasi atakhala podyera. Iye adadzuka naŵalonjera. Gabaele adalira misozi, nayamika Mulungu. Adati, “Ndiwe mnyamata wabwino kwambiri, mwana wa munthu wolungama ndi wokoma mtima, ndi wothandiza osauka. Ambuye akupatse madalitso akumwamba iwe ndi mkazi wako, atate ako ndi apongozi wako. Atamandike Mulungu chifukwa poona iweyo, ndikuchita ngati ndikuwona msuweni wanga Tobiti.”