Read Buku Loyera - Chichewa Yud. 12 Bible Online

Yud. 12 - Buku Loyera - Chichewa bible

Yud. 12

¹Pamenepo Holofernesi adalamula atumiki ake kuti aloŵetse Yuditi m'hema m'mene munali mbale zake zasiliva. Tsono adaitanitsa chakudya cha m'hema mwake, pamodzi ndi vinyo kuti apatse Yuditi.

²Koma Yuditi adati, “Chakudya chimenechi sindidya, chifukwa ndikuwopa kuphwanya malamulo athu.

³Chakudya chimene ndabwera nacho chindikwanira.” Holofernesi adamuuza kuti, “Ukadya chakudya chonse chimene uli nacho, nanga china tikupezera kuti? Pakati pathu pano palibe wina wa mtundu wako.”

⁴Yuditi adayankha kuti, “Pepani, pali inu mbuye wanga, chakudya chimene ndili nacho sichitha, Ambuye asanachite zimene akufuna kuchita kudzera mwa ine.”

⁵Atumiki a Holofernesi adamloŵetsa m'hema, ndipo Yuditi adagona mpaka pakati pa usiku.

⁶M'maŵa kusanache adadzuka natumiza uthenga kwa Holofernesi kuti, “Mbuye wanga, ndapota nanu, mundilole ndituluke tsopano, ndikapemphere.”

⁷Holofernesi adalamula alonda ake kuti alole Yuditi kutuluka. Motero adakhala masiku atatu m'mahemamo, namatuluka usiku uliwonse kumapita ku chigwa cha Betuliya, kukasamba ku kasupe.

⁸Ankati akabwera kuchokera kumadziko, ankapemphera kwa Ambuye, Mulungu wa Israele, kuti adalitse ntchito yake yopulumutsa anthu ake.

⁹Choncho ankabwerera ku zithando ali woyeretsedwa pa za chipembedzo, ndipo ankakhala m'hemamo mpaka nthaŵi yakudya chakudya chamadzulo.

¹⁰Pa tsiku lachinai lake Holofernesi adakonzera phwando atumiki ake akuluakulu okhaokha, osaitana ndi mmodzi yemwe mwa atsogoleri ake ena ankhondo.

¹¹Adauza Bagowasi, mdindo wofulidwa woyang'anira zinthu zake zonse kuti, “Pita kwa mkazi Wachihebri uja amene umamsamala, ukamnyengerere kuti abwere adzadye ndi kumwa nafe.

¹²Nzochititsa manyazi kuti mai wotereyu nkupanda kukhala naye malo amodzi. Ndikalephera kumkumbatira, adzandiseka.”

¹³Bagowasi adachoka pamaso pa Holofernesi, napita kwa Yuditi kukamuuza kuti, “Iwo achiphadzuŵa asachite manyazi, abwere kwa mbuye wanga, ndi kudzalandira ulemu pokhala nawo pa phwando. Adzamwe nafe ndi kusangalala. Ndipo lero akhale ngati mmodzi mwa akazi a ku Asiriya, amene amatumikira ku nyumba ya Nebukadinezara.”

¹⁴Yuditi adayankha kuti, “Ndine yani ine, kuti ndingamkanire mbuye wanga? Ndidzachita zonse zimene iye akufuna, ndipo zidzandipatsa chimwemwe mpaka tsiku la kufa kwanga.”

¹⁵Atatero Yuditi adavala zovala zake zokongola. Mdzakazi wake adatsogolako, ndipo zikopa zankhosa zimene Bagowasi adampatsa kuti azipumulirapo tsiku ndi tsiku, adakaziyala pamaso pa Holofernesi, kuti Yuditi akhalepo pakudya.

¹⁶Yuditi ataloŵa, nakhala pamalo pake, Holofernesi adatengeka mtima pomuwona. Adanyamuka mtima mpaka kuyamba kulakalaka kwambiri kuti amnyenge. Ndithudi, ankafunitsa kumnyenga kuyambira tsiku limene adamuwona koyamba.

¹⁷Motero adamuuza kuti “Imwa ndipo usangalale nafe.”

¹⁸Yuditi adayankha kuti, “Chabwino, mbuye wanga, ndimwa ndi kusangalala nanu. Lero ndi tsiku lalikulu kwambiri pa moyo wanga.”

¹⁹Tsono adatenga zimene mdzakazi wake adakonza, ndipo adadya ndi kumwa zomwezo pamaso pake.

²⁰Holofernesi adasangalala kwambiri pompenya, ndipo adamwa vinyo kupambana tsiku lina lililonse pa moyo wake.