Read Buku Loyera - Chichewa Yud. 14 Bible Online

Yud. 14 - Buku Loyera - Chichewa bible

Yud. 14

¹Yuditi adaŵauza kuti, “Mverani, abale anga. Tengani mutuwu, mukaupachike pamwamba pa linga lanu.

²Tsono kukangocha, dzuŵa likutuluka, anthu nonse amphamvu mutenge zida zanu, mutuluke mu mzinda. Muike mtsogoleri patsogolo panu kuchita ngati mukufuna kutsikira ku chigwa kukamenyana nkhondo ndi Aasiriya, koma musapiteko.

³Apo Aasiriya atenga zida zao zankhondo nkupita ku zithando kukadzutsa atsogoleri ao ankhondo. Iwowo athamangira ku hema la Holofernesi, koma sakampeza. Onsewo adzachita mantha nkuthaŵa.

⁴Ndiye inuyo ndi onse okhala m'malire a Israele, muŵathamangitse ndipo muŵaphe akuthaŵa.

⁵Koma muyambe mwaitana Akiyore, Mwamoni uja, kuti abwere kuno, adzaone ndi kuzindikira mutu wa munthu amene ankanyoza Israele, natuma iyeyo kwa ife poganiza kuti adzafera kuno pamodzi ndi ife.”

⁶Motero adamuitana Akiyore ku nyumba ya Uziya. Atabwera nkuwona mutu wa Holofernesi uli m'manja mwa munthu wina pakati pa anthupo, adagwa pansi, nakomoka.

⁷Atamuutsa, iye adagwada ku mapazi a Yuditi nati, “Akuimbireni nyimbo zokutamandani ku zithando zonse za Yuda. Pakati pa mitundu ina ya anthu, onse amene adzamva dzina lanu adzadzidzimuka.

⁸Tsopano mundisimbire zonse zimene mwachita masiku apitaŵa.” Apo Yuditi adamuuza zonse kuchokera tsiku limene adachoka mpaka nthaŵi imeneyo, anthu onse alikumva.

⁹Atangomaliza kufotokoza, anthu adayamba kufuula kwambiri, ndipo mzindawo udadzaza ndi phokoso lachimwemwe.

¹⁰Akiyore atamva zonse zimene Mulungu wa Israele adachita, adakhulupirira Mulungu kotheratu. Tsono adaumbalidwa nasanduka Mwisraele. Ndipo adzukulu ake ali nafe mpaka lero lino.

¹¹Kutacha, adapachika mutu wa Holofernesi pa linga. Tsono anthu onse adatenga zida zankhondo, napita m'magulumagulu ku mipata ya m'mapiri.

¹²Aasiriya ataŵaona, adatumiza uthenga kwa atsogoleri ao. Iwowo adapita kwa olamulira ankhondo, nduna zao ndi akuluakulu onse.

¹³Adapita ku hema la Holofernesi nauza kapitao wake kuti, “Kamdzutse mbuye wathu. Akapolo aja akufuna kutithira nkhondo, akungofuna pofera.”

¹⁴Bagowasi adapita naomba m'manja ali pafupi ndi nsalu yotsekera pa hema la m'kati. Ankaganiza kuti Holofernesi akugona ndi Yuditi.

¹⁵Ataona kuti sakuyankha, adakankha nsaluyo naloŵa m'chipinda chogona. Adangoona chithupi chokha chitagwera pansi, chopanda mutu, mutuwonso palibe.

¹⁶Adayamba kufuula ndi kulira kwamphamvu, nang'amba zovala zake.

¹⁷Kenaka adakaloŵa m'hema la Yuditi. Ataona kuti mulibe, adathamangira kumene kunali anthu nati,

¹⁸“Akapolo aja atigwira m'maso. Mkazi mmodzi Wachihebri wachititsa manyazi ufumu wa Nebukadinezara. Onani Holofernesi wafa, ndipo wamdula mutu.”

¹⁹Mau akewo adatayitsa mtima akuluakulu ankhondo a ku Asiriya. Adang'amba zovala zao, ndipo mudachitika phokoso loopsa m'zithandomo.