Read Buku Loyera - Chichewa Yud. 2 Bible Online

Yud. 2 - Buku Loyera - Chichewa bible

Yud. 2

¹Chaka cha 18 cha ufumu wa Nebukadinezara, mfumu ya Aasiriya, tsiku la 22 la mwezi woyamba, a m'nyumba ya mfumu adamvana zoti athire msimsi pa dera lonselo, monga adaalumbirira muja.

²Mwiniwakeyo adasonkhanitsa akulu onse ndi nduna zonse za ankhondo ake, nachita nawo upo wachinsinsi. Adaŵauza cholinga chake chofuna kugonjetseratu dziko lonse lapansi, malinga nkukula kwa chipongwe chimene anthu onse aja adaachita.

³Tsono adagamula kuti aliyense amene sadamvere mau ake aphedwe.

⁴Atatsiriza kufotokoza zolinga zake, Nebukadinezara adaitana Holofernesi, mtsogoleri wamkulu wa ankhondo ake, wachiŵiri kwa mfumu, namuuza kuti,

⁵“Ine Nebukadinezara, mfumu yaikulu, mbuye wa dziko lonse lapansi, ndikukulamula kuti ukangochoka pano, utenge asilikali odziŵa kumenya nkhondo 120,000 oyenda pansi ndi 12,000 okwera pa akavalo.

⁶Ukamenyane ndi anthu a ku maiko onse akuzambwe amene sadamvere lamulo langa.

⁷Uŵauze kuti akonzeretu dothi ndi madzi[1], chifukwa ndikubwera ndi ukali kudzaŵaononga. Mapazi a ankhondo anga adzapondaponda pa dziko lao lonse, ndipo ndidzalipereka kwa ankhondo omwewo kuti alifunkhe.

⁸Zigwa zao zidzadzaza ndi ovulala ao, mitsinje yonse yaing'ono ndi yaikulu yomwe idzadzaza ndi mitembo mpaka kusefukira.

⁹Tsono otsala ndidzaŵatumiza ku ukapolo mpaka ku malire a dziko lapansi.

¹⁰“Iwe pita tsopano, ukandigonjetsere maiko ao onse ine ndisanafike. Akakugonjera, uŵasunge mpaka nthaŵi itafika yoti ndidzaŵalange.

¹¹Koma akakachita mnjunju, usakaŵachitire chifundo, ukaŵaphe ndi kufunkha dziko lonselo.

¹²Ndikulumbira pali moyo wanga ndi mphamvu zanga, kuti zimene ndanenazi ndidzazichitadi monga momwe ndalumbiriramu.

¹³Tsono iwe usaphwanye ndi limodzi lomwe mwa malamulo a ine mbuye wako. Utsate mokhulupirika zonse zimene ndakulamula, ndipo usachedwe.”

¹⁴Atalekana ndi mfumu, Holofernesi adaitana olamulira ankhondo, atsogoleri ndi akuluakulu a ankhondo a Aasiriya.

¹⁵Adaŵauza kuti asonkhanitse anthu osankhidwa, monga mfumu idaalamulira, oyenda pansi 120,000 ndi 12,000 oponya mivi okwera pa akavalo.

¹⁶Adaŵandandika pa mizere yankhondo, monga amachitira atsogoleri ankhondo.

¹⁷Adatenganso gulu lalikulu la ngamira, abulu ndi nyulu zonyamula katundu, ndiponso nkhosa, mbuzi ndi ng'ombe zosaŵerengeka zoti ankhondo azikadya.

¹⁸Adatenganso zofunika zina zonse za ankhondo akewo, ndiponso golide wambiri ndi siliva kuchokera ku nyumba ya mfumu.

¹⁹Tsono onsewo adanyamuka, iye ndi gulu lake lonse lankhondo, gululo lili patsogolo pa mfumu Nebukadinezara. Adafuna kuti likaphimbe dziko lonse lakuzambwe ndi magaleta ankhondo ndi anthu okwera akavalo ndi oyenda pansi.

²⁰Pamodzi ndi iwowo kudapitanso chigulu cha anthu ochuluka ngati dzombe kapena ngati mchenga wa pa dziko lapansi. Unalidi unyinji wa anthu osaŵerengeka.

²¹Atachoka ku Ninive, adayenda masiku atatu nkukafika ku chigwa cha Bektileti. Kumeneko adamanga zithando zankhondo pafupi ndi phiri la kumpoto kwa Silisiya.

²²Kuchokera kumeneko Holofernesi adapita ku dziko lamapiri ndi ankhondo ake onse, apansi, apakavalo ndi am'magaleta.

²³Adaononga Puti ndi Ludi, nafunkha katundu wa anthu onse a ku Rasisi ndi wa Aismaele okhala m'mphepete mwa chipululu, kumwera kwa dziko la Akelea.

²⁴Pambuyo pake adaoloka Yufurate nabzola dziko la Mesopotamiya. Adaononga mizinda yonse yamalinga ya m'mbali mwa mtsinje wa Abironi mpaka ku nyanja yamchere.

²⁵Adagonjetsa dziko lonse la Silisiya napha anthu onse okana kumgonjera. Motero adafika ku malire akumwera a dera la Yafeti kuyang'anana ndi dziko la Arabiya.

²⁶Adazinga Amidiyani natentha mahema ao, nkulanda nkhosa zao.

²⁷Pa nthaŵi yodula tirigu, adatsikira ku chigwa cha Damasiko, nakatentha dzinthu dzao, nkuwononga ziŵeto zao. Kenaka adapasula mizinda yao ndi dziko lao lomwe, napha achinyamata ao onse ndi lupanga.

²⁸Nchifukwa chake anthu onse a m'mbali mwa nyanja adayamba kuchita naye mantha. Anthu okhala ku Tiro ndi ku Sidoni, ku Suri ndi ku Okina ndi ku Yaminiya, mpaka ku Azote ndi ku Askaloni, onsewo adachita naye mantha kwambiri.