Read Buku Loyera - Chichewa Yud. 3 Bible Online

Yud. 3 - Buku Loyera - Chichewa bible

Yud. 3

¹Tsono anthu onsewo adatuma amithenga okakamba za mtendere kwa Holofernesi.

²Iwo adamuuza kuti, “Ife ndife atumiki a Nebukadinezara, Mfumu yaikulu ija. Tikudzigwetsa chafufumimba pamaso panu. Muchite nafe monga momwe mukufunira.

³Nyumba zathu, dziko lathu lonse, minda yathu yonse ya tirigu, ziŵeto zathu zonse, pamodzi ndi makola athu omwe ndiponso mahema athu, zonse ndithu zili m'manja mwanu. Muchite nazo monga momwe mukufunira.

⁴Mizinda yathunso ndi anthu ake omwe, onse ndi akapolo anu. Bwerani, mudzachite nawo monga momwe mukufunira.”

⁵Anthu a Holofernesi adakamuuza mau amenewo.

⁶Pamenepo iye adatsikira ku mbali ya nyanja, naika asilikali m'mizinda yonse yamalinga, nkutengamo anthu osankhidwa bwino kuti amthandize.

⁷Anthu akumeneko ndi a ku maiko onse ozungulira adamlandira, atavala nsangamutu zamasamba, namuvinira magule, ng'oma zili m'kati.

⁸Koma iyeyo adagumulabe nyumba zao zachipembedzo nagwetsa mitengo yao yopembedzerapo, chifukwa mfumu inali itamlamula kuti akaononge milungu yonse yam'dzikomo, ndi kukakamiza anthu a mitundu yonse kuti azipembedza Nebukadinezara yekha. Adafuna kuti anthu a mitundu yonse a zilankhulo zosiyanasiyana azimpembedza ngati mulungu.

⁹Pambuyo pake Holofernesi adapita ku Esdreloni, pafupi ndi Dotani, kuyang'anana ndi malire a Yudeya.

¹⁰Adakamanga zithando zankhondo pakati pa Geba ndi Sitopoli. Kumeneko adakhalako mwezi wathunthu akusonkhanitsa zofunika za gulu lake lankhondo.