Read Buku Loyera - Chichewa Yud. 6 Bible Online

Yud. 6 - Buku Loyera - Chichewa bible

Yud. 6

¹Pamene phokoso la anthu ozungulira hema lija lidaleka, Holofernesi, mtsogoleri wamkulu wa ankhondo a Aasiriya, adalankhula ndi Akiyore ndi Amowabu onse pamaso pa magulu onse a ankhondo achilendo.

²Adati, “Ndiwe yani iwe Akiyore, ndinu yani inu aganyu a ku Efuremu, kuti nkumalosa zinthu pakati pathu, monga mwachitira leromu? Ndinu yani kuti mungatiletse kukamenya nkhondo ndi Aisraele? Mukuti Mulungu wao adzaŵateteza? Kodi pali mulungu wina woposa Nebukadinezara? Nebukadinezara adzatumiza gulu lake lankhondo kukapha Aisraele onse. Mulungu waoyo sangathe konse kuŵapulumutsa.

³Ife amene timatumikira Nebukadinezara, tidzaŵapha onse ngati ndi munthu mmodzi chabe. Sangathe kupambana mphamvu za ankhondo athu okwera pa akavalo.

⁴Tidzaŵatentha, ndipo mapiri ao adzanyowa ndi magazi ao, ndipo zigwa zao zidzadzaza ndi mitembo yao. Sadzatha kutichita kanthu, onsewo adzatheratu. Limeneli ndilo lamulo la mfumu Nebukadinezara, mbuye wa dziko lonse lapansi. Adalankhula ndipo mau ake sadzapita padera.

⁵“Koma iwe Akiyore, iwe Mwamoni waganyu chabe, mau amene walankhulaŵa lero ngaupandu. Kuyambira lero sudzandiwonanso mpaka nditalipsira gulu lonselo la anthu amene adathaŵa ku Ejipito.

⁶Tsono nditabwereranso, iweyo ankhondo anga adzakubaya m'nthiti mwako ndi lupanga ndi mkondo, choncho udzakhala mmodzi mwa ovulala.

⁷Tsopano anthu anga akutenga kupita nawe ku mapiri kukakusiya mu mzinda wina kumeneko.

⁸Koma sudzafa mpaka pamene anthu akumeneko adzaonongedwe onse.

⁹Ngati ukhulupirira kuti sitidzaŵagonjetsa, usaoneke wankhaŵa chonchi. Ndalankhula, ndipo mau anga sadzapita padera.”

¹⁰Tsono Holofernesi adalamula anthu a m'hema mwake kuti agwire Akiyore, apite naye ku Betuliya, ndipo akampereke kwa Aisraele.

¹¹Motero adamgwira namtulutsa m'hema nkupita naye ku chigwa. Kuchokera kumeneko adapita naye ku dziko lamapiri, mpaka adakafika ku akasupe a kunsi kwa Betuliya.

¹²Anthu amumzindamo ataŵaona, adatenga zida zao, natuluka mu mzinda kupita pamwamba pa phiri. Paphiripo onse oponya miyala adayamba kuŵaponya miyala adaniwo kuti asakwere.

¹³Koma Aasiriya adabisala m'munsi mwa phiri nakamangirira Akiyore ndi kumsiya patsinde pa phiri, iwowo nkubwerera kwa mbuye wao.

¹⁴Aisraele ena adatuluka mu mzinda natsikira kumene kunali Akiyore. Atammasula, adaloŵa naye mu mzinda nafika naye pamaso pa akuluakulu.

¹⁵Masiku amenewo akuluakuluwo anali aŵa: Uziya, mwana wa Mika wa fuko la Simeoni, Kabrisi mwana wa Gotoniele, ndi Karmisi mwana wa Melekiele.

¹⁶Akuluakuluwo adasonkhanitsa atsogoleri onse amumzindamo; anyamata ndi akazi onse adathamangira kumeneko. Adakhazika Akiyore pakati pa anthupo, kenaka Uziya adayamba kumfunsa zimene zidachitika.

¹⁷Iye poyankha adaŵauza zonse zimene zidachitika ku msonkhano wa Holofernesi, zimene iye adaanena pamaso pa atsogoleri ankhondo a Aasiriya, ndi za m'mene Holofernesi adaadzitukumulira pa zimene ankati aŵachite Aisraele.

¹⁸Anthuwo atamva zimenezi, adadzigwetsa pansi napembedza Mulungu, ndipo adalira kwa Iye.

¹⁹Adati, “Inu Ambuye, Mulungu Wakumwamba, onani m'mene adani athu onyadaŵa apeputsira anthu anu. Mutimvere chifundo ndi kutithandiza.”

²⁰Pambuyo pake adamtonthoza mtima Akiyore namuyamika chifukwa cha zonse zimene adachita.

²¹Msonkhano utatha, Uziya adatenga Akiyore kupita naye kwao, kumene adakonzera akuluakulu phwando. Usiku wonsewo adapemphera kwa Mulungu wa Israele kuti aŵathandize.