Read Buku Loyera - Chichewa Eks. 25 Bible Online

Eks. 25 - Buku Loyera - Chichewa bible

Eks. 25

¹Chauta adauza Mose kuti,

²“Uza Aisraele apereke zopereka zao kwa Ine. Tsono iwe ulandire zoperekazo kwa munthu aliyense wa mtima wofuna kupereka.

³Zopereka zimene ulandirezo ndi izi: golide, siliva, mkuŵa,

⁴nsalu zobiriŵira, zofiirira ndi zofiira, nsalu zokoma zathonje, nsalu zopangidwa ndi ubweya wambuzi,

⁵zikopa zankhosa zonyika mu utoto wofiira, zikopa zofeŵa, matabwa a mtengo wa kasiya,

⁶mafuta a nyale, zonunkhira za mafuta odzozera, ndiponso lubani wa fungo lokoma.

⁷Ulandirenso miyala yokoma ya onikisi, ndiponso miyala ina yoti uike pa chovala chaunsembe cha efodi, ndi pa chovala chapachifuwa.

⁸Ndipo andipangire chihema chopatulika kuti Ine ndidzakhale pakati pao.

⁹Umange chihemacho monga m'mene ndidzakulangizire mapangidwe ake ndiponso mapangidwe a katundu yense wam'menemo.

¹⁰“Ndipo apange bokosi la matabwa a mtengo wa kasiya. Kutalika kwake kukhale masentimita 114, muufupi mwake masentimita 69, msinkhu wake masentimita 69.

¹¹Ulikute ndi golide wabwino kwambiri m'kati mwake ndi kunja komwe. Upange mkombero wagolide kuzungulira bokosi lonselo.

¹²Upange mphete zinai zagolide zonyamulira bokosilo, ndi kumangirira mphetezo ku miyendo yake inai, uku ziŵiri uku ziŵiri.

¹³Upangenso mphiko zakasiya, ndipo mphikozo uzikute ndi golide.

¹⁴Mphiko zimenezo udzazilonge m'mphetezo pa mbali ziŵiri za bokosilo, kuti azinyamulira.

¹⁵Mphikozo zidzangokhala m'mphetezo osazitulutsanso.

¹⁶M'bokosimo udzaikemo miyala iŵiri yolembedwapo Malamulo imene ndidzakupatse.

¹⁷ “Upange ndi golide wabwino kwambiri chivundikiro cha bokosi, kutalika kwake masentimita 114, kupingasa kwake masentimita 69.

¹⁸Pa mbali ziŵiri za chivundikirocho, m'mphepete mwake, upange akerubi aŵiri, agolide, osula ndi nyundo,

¹⁹wina uku wina uku. Akerubiwo uŵalumikize ndi chivundikiro.

²⁰Mapiko a akerubiwo adzatambasukire pamwamba pa chivundikirocho, kuti adzachiphimbe. Akerubi adzakhale choyang'anana, aliyense kumayang'ana chivundikirocho.

²¹Chivundikiro cha bokosicho udzachiike pamwamba pa bokosilo, ndipo m'bokosimo udzaikemo miyala iŵiri ija ya Malamulo imene ndidzakupatse.

²²Ndizidzakumana nawe kumeneko, ndipo kuchokera pamwamba pa chivundikirocho, pakati pa akerubi ali pamwamba pa bokosiwo, ndidzakuuza malamulo okhudza anthu anga Aisraele.

²³“Upange tebulo la matabwa a mtengo wa kasiya, kutalika kwake masentimita 91, muufupi mwake masentimita 46, msinkhu wake masentimita 69.

²⁴Tsono ulikute ndi golide wabwino kwambiri ndipo pozungulira pake ponse upange mkombero wagolide.

²⁵Upange fulemu lozungulira tebulo, muufupi mwake kuyesa chikhatho, ndipo upange mkombero wagolide wozungulira fulemulo.

²⁶Upange mphete zinai zagolide, ndipo uzilumikize ku ngodya zinai za ku miyendo yake inai.

²⁷Mphete zopisamo mphiko zonyamulira tebulolo ziikidwe pafupi ndi fulemu lija.

²⁸Upange mphiko zonyamulira za mtengo wa kasiya, ndipo uzikute ndi golide.

²⁹Upange mbale ndi zipande zofunika popereka lubani, ndiponso mitsuko ndi mabeseni ofunika pa zopereka za chakumwa. Zonsezi zikhale za golide wabwino kwambiri.

³⁰ Patebulopo uziikapo buledi woperekedwa kosalekeza, kuti azikhala pamaso panga nthaŵi zonse.

³¹“Upange choikaponyale cha golide wabwino kwambiri. Tsinde lake ndi thunthu lake zikhale zagolide, ndipo uchisule ndi nyundo. Zikho zake, ndiye kuti nkhunje ndi maluŵa ake, zonsezo zipangidwire kumodzi.

³²Pa mbali zake pakhale mphanda zisanu ndi imodzi, zitatu pa mbali iliyonse.

³³Mphanda yoyamba ikhale ndi zikho zitatu zopangidwa ngati maluŵa amtowo, nkhunje ndi duŵa. Ku mphanda ina kukhalenso zikho zitatu zonga maluŵa amtowo, nkhunje ndi duŵa. Zikhale momwemo mphanda zonse zisanu ndi imodzi zotuluka m'choikaponyalecho.

³⁴Pa choikaponyalecho padzakhale maluŵa anai a maonekedwe onga maluŵa amtowo, okhala ndi nkhunje ndi maluŵa ake.

³⁵Padzakhale nkhunje imodzi m'munsi mwake mwa magulu atatu a mphanda zija, utazipatula ziŵiriziŵiri.

³⁶Nkhunjezo pamodzi ndi mphandazo zidzapangidwire kumodzi ndi choikaponyalecho. Chonsecho chidzangokhala chimodzi, chopangidwa ndi golide, chosula ndi nyundo.

³⁷Upange nyale zisanu ndi ziŵiri, ndipo uziike pa choikaponyale chija, kuti ziziwunikira kutsogolo.

³⁸Mbano zogwirira, pamodzi ndi timbale take tomwe, zikhale za golide wabwino kwambiri.

³⁹Choikaponyalecho ndi zipangizo zonse uzipange ndi golide wolemera makilogaramu 34.

⁴⁰ Usamale kuti upange zimenezi monga momwe ndikukuwonetsera paphiri pano.