Read Buku Loyera - Chichewa Eks. 26 Bible Online

Eks. 26 - Buku Loyera - Chichewa bible

Eks. 26

¹“Upange chihema chamapemphero ndi nsalu khumi za bafuta wosalala ndi wopikidwa bwino, ndiponso ndi nsalu zobiriŵira, zofiirira ndi zofiira. Nsalu zimenezi uzipete bwino ndi zithunzi za akerubi.

²Muutali nsalu iliyonse ikhale mamita 13, ndipo muufupi mwake ikhale pafupi mamita aŵiri. Zonsezo zikhale zofanana.

³Usoke nsalu zisanu kuti zikhale nsalu imodzi, ndipo uchitenso chimodzimodzi ndi nsalu zisanu zinazo.

⁴Upange timagonga ta nsalu yobiriŵira m'mbali mwake mwa nsalu imodzi kumapeto kwake. Uchitenso chimodzimodzi ndi nsalu inzakeyo.

⁵Kenaka upange timagonga makumi asanu pa nsalu yoyambayo, ndipo timagonga tinanso makumi asanu pa nsalu yachiŵiriyo, kuti timagongato tiyang'anane.

⁶Tsono upange ngoŵe zagolide makumi asanu, zolumikizira nsalu ziŵirizo, kuti chipangike chihema chimodzi.

⁷“Uwombenso nsalu khumi ndi imodzi za ubweya wambuzi kuti zikhale lona lophimba pamwamba pa chihemacho.

⁸Muutali mwake nsalu iliyonse ikhale mamita 14, ndipo muufupi mwake pafupi mamita aŵiri. Zonsezo zikhale zofanana.

⁹Usoke nsalu zisanu kuti zikhale nsalu imodzi, ndipo zisanu ndi imodzi zinazo zikhalenso nsalu imodzi. Tsono upinde nsalu yachisanu ndi chimodziyo mophatikiza patsogolo pa chihema.

¹⁰Upangenso magonga makumi asanu m'mbali mwake mwa nsalu yotsirizira ya chinsalu chimodzi, ndiponso magonga makumi asanu pa nsalu yotsiriza inayo.

¹¹“Upange zomangira makumi asanu zamkuŵa, ndipo uziike m'magongamo. Choncho uphatikize pamodzi nsalu ziŵirizo, kuti pakhale chihema chimodzi.

¹²Theka la nsalu yotsalira ija idzalendeŵera kumbuyo kwa chihemacho.

¹³“Ndipo nsalu ya masentimita 46 yotsalira m'litali mwake pa mbali ziŵiri, izidzalendeŵera ndi kuphimba mbali ziŵirizo.

¹⁴Lona lija ulipangire chophimbira chake chofiira cha chikopa cha nkhosa zamphongo. Pambuyo pake upangenso chophimbira chotsiriza cha zikopa zofeŵa chodzayala pamwamba pa zonse.

¹⁵“Upange mafulemu a chihemacho ndi matabwa oimirira bwino a mtengo wa kasiya.

¹⁶Muutali mwake fulemu lililonse likhale mamita anai ndi theka, ndipo muufupi mwake masentimita 69.

¹⁷Thabwa lililonse likhale ndi zolumikizira ziŵiri, ndipo mafulemu onse a chihemacho apangidwe ndi matabwa otere.

¹⁸Popanga mafulemuwo, ku mbali yakumwera, upange makumi aŵiri.

¹⁹Ndipo upange masinde makumi anai asiliva pansi pa mafulemu makumi aŵiriwo. Pansi pa fulemu lililonse pakhale masinde aŵiri ogwirizira zolumikizira ziŵiri zija.

²⁰Ndipo kumpoto kwa chihemacho upangenso mafulemu makumi aŵiri,

²¹ndi masinde makumi anai asiliva, aŵiri pa fulemu lililonse.

²²Kumbuyo kwake kwa chihemacho, chakuzambwe, upange mafulemu asanu ndi limodzi.

²³Kumbuyo kwa chihema konko, pangodya pakhale mafulemu aŵiri.

²⁴Mafulemu ameneŵa apangodya azilumikizidwa kuyambira pansi mpaka pa chigwinjiri chapamwamba. Umu ndimo m'mene akhalire mafulemu aŵiri amene akupanga ngodya ziŵiri.

²⁵Motero padzakhala mafulemu asanu ndi atatu okhala ndi masinde ake 16 asiliva, aŵiri pansi pa fulemu lililonse.

²⁶“Upange mitanda ya mtengo wa kasiya, isanu pa mafulemu a mbali ina ya chihema,

²⁷ndi isanu inanso pa mafulemu a mbali ina. Pakhalenso mitanda isanu pa mafulemu akuzambwe chakumbuyo.

²⁸Mtanda wa pakati penipeni pa mafulemuwo ugwire mafulemu onse, kuyambira ku mapeto mpaka ku mapeto.

²⁹Mafulemuwo uŵakute ndi golide, ndi kulonganso mphete zagolide m'mafulemuwo kuti agwirizire mitanda ija, ndipo mitandayo ikhale yokutidwa ndi golide.

³⁰Motero upange chihema changa monga momwe ndikukulangizira paphiri pano.

³¹“Usoke nsalu yotchingira yobiriŵira, yofiirira ndi yofiira, ndiponso ya bafuta wosalala ndi wopikidwa bwino. Ndipo nsaluyo uipete ndi zithunzi za akerubi.

³²Uikoloŵeke pa nsanamira zinai zakasiya zokutidwa ndi golide, zokhala ndi ngoŵe zagolide ndi zokhazikika pa masinde anai asiliva.

³³ Ukoloŵeke nsalu yochingayo ku ngoŵezo ndipo uike bokosi lachipangano lija m'kati momwemo, kuseri kwa nsalu yochingayo. Nsalu yochingayo idzalekanitsa malo opatulika ndi malo opatulika kopambana.

³⁴Uike chivundikiro chija pa bokosi lachipangano ku malo opatulika kopambanawo.

³⁵Tebulo lija uliike kunja kwa nsalu yochingayo. Choikaponyale chija uchiike chakumwera kwake kwa chihemacho, mopenyana ndi tebulolo, limene likhale mbali yakumpoto.

³⁶“Pa chipata choloŵera m'chihemamo, uikepo nsalu yochingira yobiriŵira, yofiirira ndi yofiira, ndi ya bafuta wosalala, wopikidwa bwino ndi wopetedwa mwaluso.

³⁷Upange nsanamira zisanu zakasiya zimene akoloŵekepo nsalu yochingayo. Zikutidwe ndi golide, ndipo ngoŵe zake zokoloŵekapo zikhalenso zagolide, ndiponso upange masinde asanu amkuŵa a nsanamira zimenezo.