Read Buku Loyera - Chichewa Eks. 37 Bible Online

Eks. 37 - Buku Loyera - Chichewa bible

Eks. 37

¹Pambuyo pake Bezalele adapanga bokosi lachipangano ndi matabwa a mtengo wa kasiya. Kutalika kwake kunali masentimita 114, muufupi mwake masentimita 69, msinkhu wake masentimita 69.

²Tsono lonselo adalikuta ndi golide m'kati mwake ndi kunja komwe, ndipo adalemba mkombero wagolide kuzungulira bokosi lonselo.

³Adapanga mphete zinai zagolide zonyamulira, nazimangirira ku ngodya zinai za bokosilo, uku ziŵiri uku ziŵiri.

⁴Adapanga mphiko zinai za matabwa a mtengo wa kasiya, nazikuta ndi golide,

⁵ndipo mphikozo adazipisa m'mphete zija pa mbali zonse ziŵiri za bokosilo, kuti azinyamulira.

⁶Kenaka adapanga chivundikiro cha golide wabwino kwambiri, kutalika kwake masentimita 114, muufupi wake masentimita 69.

⁷Pa nsonga zake ziŵiri za chivundikirocho, adazokotapo akerubi aŵiri a golide wosula ndi nyundo,

⁸wina uku wina uku. Adaŵapangira kumodzi ndi chivundikirocho.

⁹Mapiko a akerubiwo adaŵatambalitsa pamwamba, kuphimba chivundikiro chija. Adakhala choyang'anana, ndipo aliyense anali kuyang'anananso ndi chivundikirocho.

¹⁰Bezalele adapanganso tebulo la matabwa a mtengo wa kasiya, m'litali mwake masentimita 91, muufupi mwake masentimita 46, ndipo mumsinkhu mwake masentimita 69,

¹¹Tsono adalikuta ndi golide wabwino kwambiri, nalemba mkombelo wagolide kuzungulira tebulo lonselo.

¹²Adapanga fulemu lagolide pozungulira, muufupi mwake munali ngati kuyesa chikhatho, nalemba mkombero wagolide molizungulira.

¹³Kenaka adapanganso mphete zinai zagolide za tebulolo, naziika pa ngodya zinai ku miyendo ya tebulolo.

¹⁴Mphete zopisiramo mphiko ponyamula tebulolo, zinali pafupi ndi fulemu lija.

¹⁵Adapanga mphiko za matabwa a mtengo wa kasiya, nazikuta ndi golide.

¹⁶Adapanganso ziŵiya za golide wabwino kwambiri za pa tebulolo, monga mbale, zikho, mitsuko ndi mabeseni ogwiritsira ntchito pa zopereka zamadzi.

¹⁷Pambuyo pake adapanga choikaponyale cha golide wabwino kwambiri. Tsinde lake ndi thunthu lake zinali zagolide, ndipo zonse zinali zosula ndi nyundo. Zikho zake, ndiye kuti nkhunje ndi maluŵa ake, adazipangira kumodzi ndi choikaponyalecho.

¹⁸Pa mbali zake adapanga nthambi zisanu ndi imodzi, zitatu pa mbali iliyonse.

¹⁹Iliyonse mwa nthambizo inali ndi maluŵa atatu, opangidwa ngati maluŵa amtowo, okhala ndi nkhunje ndi maluŵa ake.

²⁰Pa thunthu lake la choikaponyalecho panali zikho zinai zonga maluŵa amtowo okhala ndi nkhunje zake ndi maluŵa ake.

²¹Panali nkhunje imodzi pansi pa magulu atatu a nthambi zija, zitapatulidwa ziŵiriziŵiri.

²²Nkhunjezo, pamodzi ndi nthambizo, zidapangidwira kumodzi ndi choikaponyale chija. Chonsecho chinali chinthu chimodzi chagolide, chosula ndi nyundo.

²³Ndipo adapanga nyale zisanu ndi ziŵiri za pa choikaponyalecho, napanganso mbanira ndiponso zoolera phulusa za golide wabwino kwambiri.

²⁴Popanga choikaponyalecho, pamodzi ndi zipangizo zake zonsezo, adagwiritsa ntchito makilogaramu 34 a golide wabwino kwambiri.

²⁵Guwa lofukizirapo lubani adalipanga ndi matabwa a mtengo wa kasiya. Linali lalibanda, muutalika mwake munali masentimita 46, muufupi mwake masentimita 46, msinkhu wake masentimita 91, ndipo nyanga zake zidapangidwira kumodzi ndi guwalo.

²⁶Adakuta guwa lonse ndi golide wabwino kwambiri pamwamba pake, pa mbali zake ndi pa nyanga zake zomwe. Kuzungulira guwa lonselo, adalemba mkombero wagolide.

²⁷Adapanga mphete ziŵiri zagolide zonyamulira guwalo, ndipo adazilumikiza ku mbali zonse ziŵiri za guwa, pansi pa mkombero uja, kuti apisemo mphiko zonyamulira.

²⁸Mphikozo adazipanga ndi matabwa a mtengo wa kasiya, naikuta ndi golide.

²⁹ Adapanganso mafuta oyera odzozera, ndiponso zofukizira za fungo lokoma. Mapangidwe ake adachita monga momwe ankachitira mmisiri wopanga zonunkhira.