Read Buku Loyera - Chichewa Eks. 40 Bible Online

Eks. 40 - Buku Loyera - Chichewa bible

Eks. 40

¹Tsono Chauta adauza Mose kuti,

²“Pa tsiku loyamba la mwezi woyamba, uutse chihema chamsonkhano.

³Bokosi m'mene muli miyala yaumboni uliike m'menemo, ndipo bokosilo uliphimbe ndi nsalu kuti ulichinge.

⁴Ukhazikemonso tebulo, pamwamba pake uikepo zipangizo zake, ndipo uikemo choikaponyale ndi nyale zake.

⁵Tsono uike guwa lagolide lofukizirapo lubani patsogolo pa bokosi laumboni. Pa chipata cha Nyumba ya Mulungu utsekepo ndi nsalu zochinga.

⁶Uike guwa lootcherapo nsembe patsogolo pa chihema chamsonkhanocho.

⁷Beseni uliike pakati pa chihema chamsonkhano ndi guwa, ndipo uthiremo madzi.

⁸Upange bwalo kuzungulira chihemacho, ndi kukoloŵeka nsalu zochingira pa chipata chake cha bwalolo.

⁹“Pambuyo pake utenge mafuta odzozera aja, udzoze Nyumba ya Mulungu ndi zonse za m'menemo. Uipereke kwa Mulungu Nyumbayo, pamodzi ndi zipangizo zake zonse, kuti idzakhale yoyera.

¹⁰Tsono udzozenso guwa loperekapo nsembe zopsereza, pamodzi ndi zipangizo zake zomwe. Guwalo ulipereke kwa Mulungu, kuti likhale loyera ndipo lidzakhaladi loyera kopambana.

¹¹Udzoze beseni losambira, pamodzi ndi phaka lake lomwe, ndipo ulipereke kwa Mulungu, kuti likhale loyera.

¹²“Pambuyo pake ubwere ndi Aroni ku chipata cha chihema chamsonkhano, pamodzi ndi ana ake omwe, ndipo onsewo asambe kumeneko.

¹³Aroniyo umuveke zovala zopatulika. Umdzoze, ndipo umpatule kuti akhale wansembe wonditumikira Ine.

¹⁴Ana ake abwerenso, ndipo uŵaveke miinjiro.

¹⁵Tsono uŵadzoze monga momwe udadzozera bambo wao, kuti akhale ansembe onditumikira Ine. Kudzozedwako kudzaŵasandutsa ansembe pa mibabwo ndi mibadwo.”

¹⁶Mose adachita zonse, monga momwe Chauta adamlamulira.

¹⁷Motero pa tsiku loyamba la mwezi woyamba chaka chachiŵiri, malo opatulika adautsidwa.

¹⁸Poutsa malowo, Mose adakhazika masinde ake pansi, ndipo adautsa mafulemu ake, nalumikiza mitanda yake, nautsanso nsanamira zake zija.

¹⁹Pambuyo pake adautsa chihema pamwamba pa malo opatulikawo, nachiphimba ndi chophimbira chake cha chihema, monga momwe Chauta adamlamulira.

²⁰Tsono adatenga miyala yaumboni ija naiika m'bokosi muja. Adapisa mphiko zija m'mphete za bokosilo, naika chivundikiro pamwamba pake.

²¹Kenaka adaika bokosilo m'malo opatulika, ndipo adaika nsalu zochingira. Motero adachinga bokosi laumboni, monga momwe Chauta adamlamulira.

²²Tsono m'chihema chamsonkhanomo adaikamo tebulo, chakumpoto kwa malo opatulika, kunja kwa nsalu yochinga ija,

²³ndipo pamwamba pa tebulolo adaikapo buledi, monga momwe Chauta adamlamulira.

²⁴M'chihema chamsonkanomo adaikamo choikaponyale mopenyana ndi tebulo chakumwera kwake kwa malo opatulika.

²⁵Tsono pa choikaponyalecho adaikapo nyale, kuti zikhale pamaso pa Chauta, monga momwe Iye adalamulira Mose.

²⁶M'chihema chamsonkhanomo adaikamo guwa lagolide patsogolo pa nsalu yochinga.

²⁷Adafukiza lubani wa fungo lokoma paguwapo, monga momwe Chauta adamlamulira.

²⁸Pa khomo la malo opatulika adaikapo nsalu yochinga.

²⁹Ndipo adaika guwa la nsembe zopsereza pa khomo la chihema chamsonkhano. Pa guwa limenelo adaperekapo nsembe zopsereza ndiponso chopereka cha chakudya, monga momwe Chauta adamlamulira.

³⁰Kenaka adaika beseni losambira lija pakati pa chihema chamsonkano ndi guwa, nathiramo madzi osamba.

³¹Apo Mose, Aroni ndi ana ake adasamba m'manja natsuka mapazi ao.

³²Nthaŵi zonse akaloŵa m'chihema chamsonkhanomo, kapena kusendera ku guwalo, ankasamba, monga momwe Chauta adalamulira Mose.

³³Adamanga bwalo lonse lozungulira chihema chija ndi guwa. Adaikanso nsalu yochinga pa chipata cha bwalolo. Motero Mose adamaliza ntchito yonseyo.

³⁴ Mtambo udaphimba chihema chamsonkhanocho, ndipo ulemerero wa Chauta udachidzaza

³⁵Mose sadathe kuloŵa m'chihema chamsonkhanocho chifukwa mtambo unali momwemo, ndipo ulemerero wa Chauta udaadzaza chihema chake.

³⁶Pa maulendo ao onse, mtambo ukachoka pachihemapo, Aisraelewo ankachoka pamene analiripo.

³⁷Koma mtambowo ukapanda kuchoka, Aisraele sankachokanso pachigonopo. Ankadikira tsiku lakuti mtambo wachokapo.

³⁸Unkakhala pachihemapo masana, usiku mumtambomo munkayaka moto, ndipo Aisraele onse ankatha kuupenya. Zinkatero pa ulendo wao wonse.