Read Buku Loyera - Chichewa Yob. 1 Bible Online

Yob. 1 - Buku Loyera - Chichewa bible

Yob. 1

¹Kudaali munthu wina, dzina lake Yobe, amene ankakhala m'dziko la Uzi. Munthu ameneyo anali wosalakwa ndiponso wolungama. Ankaopa Mulungu namapewa zoipa.

²Anali ndi ana aamuna asanu ndi aŵiri, ndi ana aakazi atatu.

³Anali ndi nkhosa 7,000, ngamira 3,000, ng'ombe zantchito 1,000 ndi abulu aakazi 500. Anali ndi antchito ambiri, choncho anali munthu wotchuka koposa anthu onse a m'maiko akuvuma.

⁴Ana ake aamuna ankachita phwando mosinthana, tsiku lina kwa wina, tsiku lina kwa wina. Ndipo ankaitana alongo ao atatu aja ku maphwando aowo.

⁵Tsono masiku a phwandowo akatha, Yobe ankadzuka m'mamaŵa napereka nsembe, kuperekera mwana aliyense, kuti anawo ayeretsedwe potsata malamulo a chipembedzo. Yobeyo ankati, “Mwina mwake, wina mwa ana angaŵa adachimwa, adatukwana Mulungu mumtima mwake.” Umu ndimo m'mene ankachitira Yobe nthaŵi zonse.

⁶ Tsiku lina pamene angelo a Mulungu ankabwera kudzadziwonetsa pamaso pa Chauta, nayenso Satana adafika nawo limodzi.

⁷Pamenepo Chauta adafunsa Satanayo kuti, “Nanganso iwe Satana, kutereku ukuchokera kuti?” Iye adayankha kuti, “Ndakhala ndikungoyendayenda ndi kumangozungulira dzikoli.”

⁸Chauta adamufunsanso kuti, “Kodi wazindikirapo mtumiki wanga Yobe, kuti safanafana ndi wina aliyense pa dziko lapansi? Iye uja ndi munthu wosalakwa ndi wolungama. Amandimvera Ine Mulungu, ndipo amapewa zoipa.”

⁹ Satana adafunsa Chauta kuti, “Kani mwayesa Yobe uja amangokumverani pachabe?

¹⁰Suja Inu mwakhala mukumteteza ponseponse iye uja, pamodzi ndi banja lake ndi zinthu zake zonse zimene ali nazo. Mudamdalitsanso pa ntchito zimene amachita, ndipo chuma chake nchochuluka kwambiri m'dzikomo.

¹¹Koma tsopano tangoyesani kumchotsera zonse zimene ali nazo, muwona, adzakutukwanirani pamaso.”

¹²Chauta adauza Satana kuti, “Chabwino, zonse zimene Yobe ali nazo ndaziika m'manja mwako. Koma iye yekhayo usamkhudze.” Pamenepo Satanayo adachoka, kumsiya Chauta.

¹³Tsiku lina ana aamuna ndi ana aakazi a Yobe ankachita phwando m'nyumba mwa mkulu wao.

¹⁴Ndiye kudafika wamthenga kwa Yobe kudzamuuza kuti, “Ng'ombe zinalikulima, ndipo abulu analikudya pafupi pomwepo.

¹⁵Mwadzidzidzi nkubwera Aseba kudzatithira nkhondo nalanda ng'ombezo ndi abulu omwe. Ndipo apha antchito onse, koma ine ndekha ndiye ndapulumuka kuti ndidzakuuzeni.”

¹⁶Iyeyo akulankhulabe, padafikanso wina, nati, “Kunagwa mphezi ndipo yapsereza nkhosa zonse pamodzi ndi abusa omwe, onse psiti. Ine ndekha ndiye ndapulumuka kuti ndidzakuuzeni.”

¹⁷Ameneyu asanatsirize kulankhula, padafikanso wina, nati, “Kunafika magulu atatu a Akaldeya kudzatithira nkhondo. Atilanda ngamira zonse, ndipo apha antchito onse. Ndapulumukapo ndine ndekha kuti ndidzakuuzeni.”

¹⁸Iyeyo mau akali m'kamwa, padafikanso wina, nati, “Ana anu onse anali pa phwando m'nyumba ya mkulu wao.

¹⁹Mwadzidzidzi chayamba chimphepo champhamvu chochokera ku chipululu, nkudzaomba nyumbayo mbali zonse. Motero yagwa ndi kuŵapsinja anawo. Onse aphedwa, ndapulumukapo ndine ndekha kuti ndidzakuuzeni.”

²⁰Yobe atamva zimenezo, adadzambatuka, nkung'amba zovala zake. Adameta tsitsi, ndipo adadzigwetsa pansi napembedza Mulungu.

²¹Adati, “M'mimba mwa amai ndidatulukamo maliseche, namonso m'manda ndidzaloŵamo maliseche, Chauta ndiye adapatsa, Chauta ndiyenso walanda. Litamandike dzina la Chauta.”

²²Ngakhale zidaayenda motero, Yobe sadachimwe kapena kunena kuti, “Mulungu walakwa.”