Read Buku Loyera - Chichewa Yob. 10 Bible Online

Yob. 10 - Buku Loyera - Chichewa bible

Yob. 10

¹“Ndithudi, ndatopa nawo moyo wanga, choncho ndidzalankhula zodandaula zanga momasuka. Ndidzaulula zoŵaŵa zonse zamumtima.

²Ndidzauza Mulungu kuti, Inu Mulungu, musandiweruze kuti ndine wolakwa. Koma mundidziŵitse chifukwa chimene mukukanganirana nane.

³Kodi inu zikukukomerani kuti mundizunze ndi kundinyoza ine, ntchito ya manja anune, chonsecho mukukondera upo wa anthu oipa?

⁴Kodi maso anu ali ngati a munthu? Kodi mumaona zinthu monga m'mene amaziwonera munthu?

⁵Kodi masiku anu ndi aafupi monga m'mene aliri masiku a munthu? Kodi zaka zanu zili ngati zaka za munthu?

⁶Chifukwa chiyani tsono mukufufuza zolakwa zanga? Chifukwa chiyani mukufuna kundipeza mlandu?

⁷Koma chonsecho mukudziŵa bwino lomwe kuti ine ndine wosalakwa, kuti palibe ndi mmodzi yemwe amene angandipulumutse m'manja mwanu.

⁸“Mudandiwumba ndi kundipanga ndi manja anu. Koma tsopano mukufuna kundiwononga ndi manja anu omwewo.

⁹Musaiŵale kuti paja mudandipanga ndi dothi. Kodi mukufuna kundibwezeranso kufumbi komweko?

¹⁰ Suja mudapatsa bambo wanga mphamvu zoti andibale, suja mudandikuza bwino m'mimba mwa mai wanga?

¹¹Mudandikuta ndi khungu ndi mnofu, mudalumikiza mafupa anga ndi mitsempha.

¹²Mudandipatsa moyo mwa chikondi chanu chosasinthika, mudandisamala bwino kuti moyo wanga ulimbike.

¹³Nthaŵi yonseyo munkabisa zolinga zanu. Koma tsopano ndikuŵadziŵa maganizo anu.

¹⁴Munkapenyetsetsa kuti muwone ngati nditi ndichimwe. Munali wosafuna kukhululukira tchimo langa lililonse.

¹⁵Mukandipeza wolakwa, tsoka langa! Ngakhale mundipeze wosalakwa, ndigwetsabe nkhope, pakuti ndagwidwa ndi manyazi, poona mavuto angaŵa.

¹⁶Ndikadzilimbitsa mtima, mumakhala ngati mkango wondisaka, mumafuna kundiwopsa ndi mphamvu zanu.

¹⁷Mumandiikiranso mboni zondineneza, mkwiyo wanu umanka nukulirakulira. Magulu anu olimbana nane akunka nachulukirachulukira.

¹⁸“Inu Mulungu, chifukwa chiyani mudandibadwitsa ineyo? Achikhala ndidaangofa, wina aliyense asanandiwone.

¹⁹Achikhala ndidaachita ngati mtayo basi, akadanditenga pobadwapo nkupita nane ku manda.

²⁰Kodi masiku a moyo wanga si oŵerengeka chabe? Ingondilekani kuti ndipumuleko pang'ono,

²¹ndisanapite kumene sindidzabwerako, dziko la imfa, kumene kuli mdima wandiweyani,

²²ku dziko lamdimatu ndi lachisokonezo, kumene ngakhale kuŵala kudasanduka mdima.” Zofari