Read Buku Loyera - Chichewa Yob. 11 Bible Online

Yob. 11 - Buku Loyera - Chichewa bible

Yob. 11

¹Tsono Zofari wa ku Naama adayankha kuti,

²“Kodi mau ambirimbiriŵa nkukhala osaŵayankha? Kodi kulongolola nkumulungamitsa munthu?

³Iwe Yobe, kodi anthu nkukhala chete atamva kubwebweta kwakoku? Kodi ukamanyodola, sadzakhalapo wina aliyense wokudzudzula?

⁴Iwe umati mau akowo ndi oona, ukuti ndiwe wangwiro pamaso pa Mulungu.

⁵Koma ha, achikhala Mulungu adaalankhula, achikhala adaakudzudzula,

⁶achikhala adaakuululira zinsinsi za nzeru! Paja Iye uja nzeru zake ndi zozama zedi. Udziŵe tsono kuti Mulungu akukulanga pang'ono, mosalingana nkuchuluka kwa zolakwa zako.

⁷“Kodi iwe ungathe kumvetsa zinsinsi za Mulungu? Kodi ungathe kudziŵa kukula kwa nzeru za Mphambe?

⁸Malire a nzeru zake ali kutali kuposa mlengalenga. Nanga iwe ungachitepo chiyani? Malire a nzeru zake ndi ozama kupitirira dziko la anthu akufa. Nanga iwe ungathe kudziŵapo chiyani?

⁹Muyeso wa nzeru zake ndi wautali kupambana kutalika kwa dziko lapansi, ndi kupingasa kwa nyanja zamchere.

¹⁰Mulungu akabwera nakutsekera m'ndende, ndipo akakutulutsira ku bwalo la milandu, ndani angathe kumuletsa?

¹¹Mulungu amazindikira anthu abodza. Pamene pali zolakwa, Iye uja nkupanda kudziŵa?

¹²Paja amati, Chitsiru nchitsiru ndithu, ndipo nyama ndi nyama ndithu.

¹³“Iwe Yobe, mumtima mwako ukhale wolungama, upemphe chifundo kwa Mulungu.

¹⁴Ngati mumtima mwako muli cholakwa, uchichotse, choipa chilichonse chisakhale m'moyo mwako.

¹⁵Ukatero, ndiye kuti manyazi ako onse adzatha, sudzazyolikanso pamaso pa anthu. Mtima wako udzakhazikika, ndipo sudzaopa kalikonse.

¹⁶Zoŵaŵa zakozi udzaziiŵala, zidzakhala ngati madzi amene apita kale.

¹⁷Pamenepo moyo wako udzaŵala kupambana dzuŵa. Usiku udzakhala ngati usana kwa iwe.

¹⁸Udzalimba mtima poti chikhulupiriro chilipo. Mulungu adzakutchinjiriza, ndipo udzapumula mwamtendere.

¹⁹Nthaŵi yogona palibe amene adzakuwopse. Ambiri adzakupempha kuti uŵachitire zabwino.

²⁰Anthu oipa nawonso adzafunafuna thandizo, koma sadzaona njira yopulumukira, chiyembekezo chao ndi imfa basi.” Yobe