Read Buku Loyera - Chichewa Yob. 12 Bible Online

Yob. 12 - Buku Loyera - Chichewa bible

Yob. 12

¹Yobe adayankha kuti,

²“Inunso ndinu anthu, ndipo mukafa, nzeru zanu zidzafera nanu pamodzi.

³Koma inenso ndili nazo nzeru ngati inu nomwe. Inu simundipambana, ai. Aliyense amadziŵa zonse mwanenazi.

⁴Ine ndine chinthu choseketsa kwa abwenzi anga. Ine amene ndinkapemphera kwa Mulungu, Iye nkundiyankha, ine munthu wolungama ndi wopanda mlandu, tsopano ndine chinthu chochiseka.

⁵Munthu amene ali pabwino amanyoza mnzake amene ali pa tsoka. Tsokalo limagwa pa amene wayamba kale kugwa.

⁶Achifwamba ndiwo amakhala pa mtendere, amene amaputa Mulungu ndiwo amakhala pabwino. Anthuwo amadalira nyonga zao ngati ndiye Mulungu wao.

⁷“Koma ufunse kwa nyama zakuthengo, zidzakuphunzitsa. Ufunse mbalame zamumlengalenga, zidzakuuza.

⁸Upemphe nzeru kwa zolengedwa za dziko lapansi, zidzakuphunzitsa, ngakhale nsomba zam'nyanja zidzakufotokozera.

⁹Kodi mwa zonsezo nchiti chimene sichidziŵa kuti zonsezi adachita ndi Chauta?

¹⁰M'manja mwake ndimo muli zamoyo zonse, mulinso moyo wa anthu a mitundu yonse.

¹¹Kodi suja khutu ndiye limamva mau, monga m'mene lilime ndiye limalaŵa chakudya?

¹²Inde anthu okalamba ali ndi nzeru, anthu amvulazakale ndi omvetsa zinthu.

¹³“Koma Mulungu ali ndi nzeru ndi mphamvu zopambana. Ali ndi uphungu wabwino, ndi kumvetsa zinthu zonse.

¹⁴Akapasula, palibe woti nkumanganso. Akatsekera munthu m'ndende, palibe woti nkumtsekulira.

¹⁵Akamanga mvula, dziko limauma, Akaimasula, madzi amasefukira pa dziko lonse.

¹⁶Iye ali ndi mphamvu, ndiponso ali ndi nzeru zonse. Anthu opusitsidwa, ndiponso opusitsa anzao, onsewo ali mu ulamuliro wake.

¹⁷Iye amalanda aphungu nzeru zao, ndipo amapusitsa aweruzi.

¹⁸Amamasula am'ndende a mafumu, ndipo amaŵamanga mafumuwo.

¹⁹Amasokeza ansembe ataŵalanda nzeru zao, ndipo amatsitsa atsogoleri amphamvu.

²⁰Amakhalitsa chete aphungu okhulupirika, ndipo akuluakulu amaŵalanda luntha.

²¹Amanyoza anthu otchuka, ndipo anthu anyonga amaŵatha mphamvu.

²²Amavundukula zamumdima, ndipo mdimawo amausandutsa kuŵala.

²³Amakuza mitundu ina ya anthu, koma inanso amaiwononga. Amachulukitsa mafuko, nkuŵamwazanso.

²⁴Amasandutsa atsogoleri kuti akhale zitsiru, ndi kumaŵayendetsa m'thengo mopanda njira.

²⁵Iwowo amanka nafufuza njira mumdima mopanda kuŵala, nkumayenda ali dzandidzandi ngati oledzera.”