Read Buku Loyera - Chichewa Yob. 13 Bible Online

Yob. 13 - Buku Loyera - Chichewa bible

Yob. 13

¹“Zonse mukunenazi ndidaziwona ndi maso, ndidazimva ndi makutu anga, ndipo ndidazimvetsa.

²Zimene inu mumadziŵa, inenso ndimazidziŵa. Inu simundipambana ai.

³Koma ine ndikadakonda kulankhula ndi Mphambe, ndikadakonda kukamba naye Mulungu za mlandu wanga pamasompamaso.

⁴Inuyo ndinu okometsa zinthu ndi mabodza. Nonsenu muli ngati asing'anga apakamwa chabe.

⁵Achikhala munangokhala chete, apo mukadachita zanzeru

⁶Tsono mumve zimene nditi ndinene, mumvere mau anga ofotokoza za mlandu wanga.

⁷Kodi chifukwa chiyani mukunama potchula Mulungu? Chifukwa chiyani mukunena mabodza m'dzina lake?

⁸Kodi mukuti mukondere Mulungu? Kodi mukuti muteteze Mulungu pa mlandu wake?

⁹Mulungu atayang'anitsitsa inu, kodi nkukupezani kuti ndinu osalakwa? Kodi mungathe kumnyenga monga m'mene munthu anganyengere munthu mnzake?

¹⁰Ndithudi, adzakudzudzulani, mukamachita zokondera m'seri.

¹¹Kodi ulamuliro wake sungakuwopseni? Kodi mphamvu zake sizingakuchititseni mantha?

¹²Miyambi yanuyi ndi yopandapake ngati phulusa. Zimene mukulankhula kuti mudzitchinjirize nazo zili ngati dothi.

¹³“Mukhale chete, ineyo ndilankhule, ndipo zimene zichitike, zichitike.

¹⁴Ndili wokonzeka kuika moyo wanga pa chiswe, kaya nkufa, ndife basi.

¹⁵Ngakhale Mulungu andiphe, ndidzamkhulupirirabe, ndipo ndidzafotokoza mlandu wanga pamaso pake.

¹⁶Kulimba mtima kwanga ndiye kudzandipulumutse, poti munthu woipa sangafike pamaso pa Mulungu.

¹⁷Mumvetsere mau anga mosamala, mutchere khutu zolankhula zanga.

¹⁸Mlandu wanga ndaukonza, ndikudziŵa kuti sadzandipeza wolakwa.

¹⁹Kodi pali yani amene angatsutsane nane? Ngati zili choncho, ndidakangokhala chete, nkufa basi.

²⁰Inu Mulungu, ndikukupemphani zinthu ziŵiri zokha, sindidzayesa kukubisalirani.

²¹Muleke kundilanga, kuwopa Inu kusandidetse nkhaŵa.

²²Mundiitane tsono ndipo ndidzayankha. Kapena mundilole kuti ndilankhule ndine, Inuyo mundiyankhe.

²³“Kodi zolakwa zanga nzingati, ndipo machimo anga ndangati? Mundidziŵitse kulakwa kwanga ndi kuchimwa kwanga.

²⁴Chifukwa chiyani mukundifulatira? Bwanji mukundiyesa mdani wanu?

²⁵Kodi mukufuna kuwopsa ine, tsamba louluka ndi mphepone? Kapena mukuti mundithamangitse, ine mungu woumane?

²⁶Inu mukundizenga zinthu zondiŵaŵa, umafukula ngakhale zolakwa za pa ubwana wanga.

²⁷ Inu mumamanga miyendo yanga ndi matangadza, mumalonda mayendedwe anga onse, mumazonda ndi poponda mapazi anga pomwe.

²⁸Motero munthu amatha ngati chinthu chofumbwa, ngati chovala chodyewa ndi njenjete.”