Read Buku Loyera - Chichewa Yob. 14 Bible Online

Yob. 14 - Buku Loyera - Chichewa bible

Yob. 14

¹ “Munthu wobadwa mwa mkazi amakhala masiku oŵerengeka, komanso masiku ake ndi amavuto okhaokha.

²Amaphuka ngati duŵa, kenaka nkufota. Sakhalitsa, amathaŵa ngati mthunzi.

³Kodi Inu Mulungu, mungamtuzulire maso woteroyo? Kodi mungamzenge mlandu?

⁴Ndani angatulutse chabwino m'choipa? Palibe ndi mmodzi yemwe.

⁵Masiku a munthu ndi oŵerengeka, chiŵerengero cha miyezi yake mumachidziŵa ndinu. Inu mudamulembera malire ake, sangathe kuŵalumpha.

⁶Mumleke tsono kuti apumule, akondweko, akondwerere moyo wake monga amachitira waganyu poweruka.

⁷“Mtengo chiyembekezo chake nchakuti akaudula udzaphukanso, nthambi zake sizidzaleka kuphuka.

⁸Ngakhale mizu yake ikalambe m'nthaka, ndipo chitsa chake chiwole,

⁹komabe chinyontho chikafika, udzaphukira, udzaphukadi nthambi ngati mtengo wanthete.

¹⁰Koma munthu akafa, kutha kwake nkomweko. Kodi munthuyo akafa, amapita kuti?

¹¹Monga madzi amaphwa m'nyanja, monganso mtsinje umaphwa nuuma,

¹²momwemonso munthu amagona pansi osadzukanso. Mpaka zamumlengalenga zidzatha, iyeyo sadzadzuka. Palibe aliyense angamdzutse kutulo kwake.

¹³Ha! Achikhala mudaangondibisa ku manda, kuti ndisaoneke mpaka mkwiyo wanu utapita. Achikhala mudaangondiikira nthaŵi, kuti pambuyo pake mundikumbukirenso.

¹⁴Kodi munthu atafa, nkudzakhalanso ndi moyo? Koma masiku onse a moyo wanga wovutikawu, ndidzadikira mpaka kumasulidwa kwanga kutafika.

¹⁵Inu mudzandiitana, ine nkukuyankhani. Mudzafunitsitsanso kuwona ine, ntchito ya manja anune.

¹⁶Nthaŵiyo mudzayang'ana mayendedwe anga onse, koma simudzalondoloza machimo anga.

¹⁷Zolakwa zanga zidzakhululukidwa, Inu mudzafafaniza machimo anga onse.

¹⁸“Komabe monga phiri limagwa nkuswekasweka, ndipo thanthwe limasendezeka kuchoka pamalo pake,

¹⁹monganso madzi oyenda amaperesa miyala, ndipo madzi othamanga amakokolola nthaka, momwemonso Inu mumaononga chiyembekezo cha munthu.

²⁰Mumamtswanya munthu kamodzinkamodzi, iye nkufafanizika kotheratu. Mumasintha maonekedwe a nkhope yake, nkumtaya kutali.

²¹Ana ake akamalemekezedwa, iye sadziŵako, akamachititsidwa manyazi, iye saziwona.

²²Amangomva zoŵaŵa za m'thupi mwake zokha, amangodzilira yekha mwiniwakeyo.” Elifazi