Read Buku Loyera - Chichewa Yob. 15 Bible Online

Yob. 15 - Buku Loyera - Chichewa bible

Yob. 15

¹Apo Elifazi wa ku Temani adayankha kuti,

²“Kodi munthu wanzeru angalankhule zachabechabe motere? Kodi angathe kutulutsa mau opandapake ongouluka ngati mphepo?

³Kodi angathe kulankhula zinthu zopandapake, kapena kunena mau opanda phindu?

⁴Koma iwe ukufuna kuti anthu asamaope Mulungu, ukufuna kuti aleke kusinkhasinkha za Mulungu.

⁵Tchimo lako likuwonekera ndi kalankhulidwe kako, koma umafuna kudzilungamitsa ndi kuchenjera pakamwa kwako.

⁶Choncho ndi mau ako omwe amene akukutsutsa, osati ine. Pakamwa pako pomwe pakuchita umboni wokuzenga mlandu.

⁷“Kodi munthu woyamba kubadwa ndiwe? Kodi udaalipo pamene Mulungu ankalenga mapiri?

⁸Kodi uli m'gulu la alangizi a Mulungu? Kodi ukuyesa wanzeru ndiwe wekha?

⁹Kodi nchiyani chimene umadziŵa iwe, chosachidziŵa ife? Kodi chilipo chimene umamvetsa iwe, chosachimvetsa ife?

¹⁰Pakati pa ife pano tili ndi anthu aimvi ndi okalamba, amvulazakaletu kupambana bambo wako.

¹¹Kodi akukuchepera mau othuzitsa mtima ochokera kwa Mulunguŵa, kapena mau okulankhula mofatsaŵa?

¹²“Nanga chifukwa chiyani ukupsa mtima? Chifukwa chiyani ukutituzulira maso?

¹³Chifukwa chiyani ukufuna kulimbana ndi Mulungu? Chifukwa chiyani ukumnyoza ndi pakamwa pako?

¹⁴ Kodi munthu nchiyani kuti angathe kukhala wosachimwa? Kapena wobadwa kwa mkazi nchiyani, kuti angakhale wopanda uchimo pamaso pa Mulungu?

¹⁵Mulungu sakhulupirira ngakhale angelo ake. Ngakhale akumwamba omwe sali angwiro pamaso pake.

¹⁶Nanji tsono munthu, amene ali wonyansa ndi wachabechabe, amene kuchita zoipa kuli ngati kumwa madzi!

¹⁷“Undimve, ine ndikufotokozera, zimene ndidazimva ndikuuza.

¹⁸Zoonazo adandiphunzitsa ndi anthu anzeru, sadandibisire zimene adamva kwa makolo ao.

¹⁹Dziko lao linali lopanda anthu achilendo, amene adakaŵachotsa mu njira yake ya Mulungu.

²⁰Munthu woipa amakhala akuvimvinika ndi zoŵaŵa masiku onse a moyo wake. Munthu wankhalwenso adzavutika zaka zake zonse.

²¹Amamva mau oopsa m'makutu mwake, pamene akuyesa kuti ali pabwino, achifwamba adzamthira nkhondo.

²²Sakhulupirira kuti angathe kupulumuka ku mdima wa imfa, akuyenera kuphedwa ndithu basi.

²³Amangoyendayenda paliponse, kunka nafuna chakudya nkumati, ‘Kodi chili kuti?’ Amadziŵa kuti tsiku lamdima lili pafupi.

²⁴Masautso ndi nthumanzi zimamchititsa mantha kwambiri. Zimenezi zimamgudukira koopsa, monga imachitira mfumu imene yakonzekera kukamenya nkhondo.

²⁵Zonsezi zamugwera chifukwa adaukira Mulungu. Adafuna kulimbana ndi Mphambe.

²⁶Adatenga chishango chake mwaliwuma, ndipo adathamanga kuti akalimbane ndi Mulungu.

²⁷“Ngakhale nkhope yake ndi yokulupala, ngakhale m'chiwuno mwake muli monenepa kwambiri,

²⁸munthuyo adzasauka m'mizinda yoonongeka. Adzakhala m'nyumba zosayenera kukhalamo anthu, chifukwa zidaonongeka pa nkhondo.

²⁹Iyeyo sadzalemera, chuma chake sichidzakhalitsa. Minda yake sidzaberekanso pa dziko lapansi.

³⁰Iyeyo sadzatuluka m'mavuto, adzakhala ngati mtengo umene nthambi zake zapsa ndi moto, Umene maluŵa ake adzachotsedwa ndi mpweya wa Mulungu.

³¹Asadzinyenge pokhulupirira zinthu zoipa zachabe, poti zinthu zachabezo ndizo zidzakhale malipiro ake.

³²Adzafota nthaŵi isanakwane, ndipo nthambi yake sidzaphukanso.

³³Adzakhala ngati mtengo wamphesa umene umayoyola zipatso zake zisanapse. Adzakhala ngati mtengo wa olivi umene wayoyola maluŵa ake.

³⁴Anthu osamvera Mulungu adzakhala opanda zidzukulu. Olandira ziphuphu moto udzapsereza nyumba yao.

³⁵Ameneŵa ndiwo amalingalira zaupandu namachita zoipa. Mtima wao umaganizira zonyenga nthaŵi zonse.”