Read Buku Loyera - Chichewa Yob. 16 Bible Online

Yob. 16 - Buku Loyera - Chichewa bible

Yob. 16

¹Yobe Yobe adayankha kuti,

²“Zoterezi ndidazimva kale. Nonsenu ndinu anthu osatha kuthuzitsa mtima mnzanu.

³Kodi mudzakhala mukulankhulabe mau achabechabeŵa mpaka liti? Kaya chakuvutani nchiyani kuti muzilankhulabe mau otsutsaŵa?

⁴Inenso ndikadalankhula monga inu, mukadakhala monga ndiliri inemu. Inenso ndikadatha kulankhula monga mukulankhuliramu. Nanenso ndikadakupukusirani mutu.

⁵Ndikadakulimbitsani ndi mau anga, ndikadakuthuzitsani mtima ndi kuchepetsa zoŵaŵa zanu.

⁶“Ine ndikati ndilankhule, zoŵaŵa zanga sizichepa. Ndikati ndikhale chete, zoŵaŵazo zikhala zilipobe.

⁷Ndithudi, Mulungu wanditha mphamvu, waononga banja langa lonse.

⁸Wandigwira, ndipo wasanduka mdani wanga, umboni woti ndine wolakwa. Ndatsala mafupa okhaokha, ndipo chimenechi chikunditsimikiza kuti ndine wolakwa.

⁹Mulungu wanding'amba ali chikwiyire, ndipo akudana nane, wachita kulumira mano. Mdani wanga akundituzulira maso.

¹⁰Anthu amandinyoza polankhula, amandimenya pa tsaya mwachipongwe, akundichitira upo kuti alimbane nane.

¹¹Mulungu wandipereka kwa anthu osasamala za Iye, wandiponya m'manja mwa anthu oipa.

¹²Ndidaali pa mtendere, koma Mulungu adanditswanya. Adandigwira pa khosi ndi kundiphwanya. Adandiimika kuti ndikhale choponyerapo chandamale chake.

¹³Mivi yake ikundilasa pa mbali zonse. Walasa impso zanga mopanda chifundo, watayira pansi ndulu yanga.

¹⁴Akundivulazavulaza. Akulimbana nane ngati munthu wankhondo.

¹⁵“Ndasokerera chiguduli pathupi panga. Ndaika mphamvu zanga pa fumbi.

¹⁶Maso anga afiira nkulira, ndipo zikope zanga zatupa kwambiri.

¹⁷Koma sindidachite chiwawa chilichonse, pemphero langa kwa Mulungu ndi lolungama.

¹⁸“Iwe, dziko lapansi, usabise zoipa zimene andichita. Kulira kwanga kofuna thandizo kusalekeke.

¹⁹ Tsopano lino mboni yanga ili kumwamba, wonditchinjiriza ali komweko.

²⁰Abwenzi anga akundinyodola, choncho ndikulirira kwa Mulungu.

²¹Kukadapezeka wondipepesera kwa Mulungu, bwenzi atandipepesera, monga momwe munthu amachitira mnzake.

²²Pakuti zitapita zaka pang'ono, ndidzayenda njira imene sindidzabwerera.