Read Buku Loyera - Chichewa Yob. 17 Bible Online

Yob. 17 - Buku Loyera - Chichewa bible

Yob. 17

¹Mtima wanga wasweka ndipo masiku anga atha, manda andiyasamira kukamwa.

²Ndithudi, pali ondiseka ponseponse pondizungulira, ndikupenya m'mene akundinyozera.

³“Inu nokha Mulungu, mukhale ngati chigwiriro changa. Kulibenso wina woti nkunditchinjiriza.

⁴Inu mwatseka mitima yao kuti asamvetsetse bwino zanzeru, choncho musalole kuti iwowo apambane.

⁵Paja akuti munthu akapereka abwenzi ake chifukwa cha chuma, ana ake amazunzika.

⁶“Andisandutsa chisudzo chochiseka anthu, akandiwona amangoti malovu nzee.

⁷M'maso mwanga mwada ndi chisoni, ndaonda ndi mutu womwe.

⁸Anthu olungama akudabwa nazo kwambiri zimenezi. Anthu osachimwa akupsera mtima anthu osamvera Mulungu.

⁹Komabe anthu olungama enieni amapitirira m'njira zao, anthu osalakwa amalimbikira kukhalabe oyera.

¹⁰“Tsono nonsenu bwerani, mubwereze mau anu, pakati panupa sindidzapezapo ndi mmodzi yemwe wanzeru.

¹¹Masiku anga atha, ndipo zimene ndidaakonza zalephereka. Zimene ndinkayembekeza zapita padera.

¹²Koma abwenzi anga amanena kuti usiku ndi usana womwe. Amati, ‘kuŵala ndiye kuli pafupi,’ chonsecho mdima uli goo.

¹³Chimene ndikuyembekeza ndicho kukakhala ku manda, ndikayaleko mphasa yanga mumdima.

¹⁴Ndidzauza dzenje la manda kuti, ‘Iwe ndiwe bambo wanga.’ Ndidzalankhulanso ndi mphutsi kuti, ‘Ndiwe mai wanga,’ kapena kuti, ‘Ndiwe mlongo wanga.’

¹⁵Tsono chiyembekezo changa chili kuti? Ndani angaone populumukira panga?

¹⁶Ndithu, sindidzakhalanso ndi chiyembekezo chilichonse poloŵa m'manda, pamene ndidzatsikira ku fumbi.” Bilidadi