Read Buku Loyera - Chichewa Yob. 18 Bible Online

Yob. 18 - Buku Loyera - Chichewa bible

Yob. 18

¹Tsono Bilidadi wa ku Suki adayankha kuti,

²“Kodi iwe Yobe, ukhala mpaka liti ukufunafuna zonena? Ingokhala chete, umvetsere, ndipo ife tilankhula.

³Chifukwa chiyani ukutiyesa opusa ngati ng'ombe? Chifukwa chiyani tikuwoneka ngati opanda nzeru m'maso mwako?

⁴Iwe ukungodzipweteka ndi mkwiyo wako. Kodi dziko lapansi lidzasanduka bwinja chifukwa choti iweyo uli wokwiya? Kodi thanthwe nkudzachotsedwa pamalo pake, kuti likukondweretse iweyo?

⁵ “Nyale ya munthu woipa yazima, malaŵi a moto wake sakuŵalanso.

⁶Kuŵala kwa m'nyumba mwake kwasanduka mdima, ndipo nyale ya pambali pake yazima.

⁷Kale ankayenda ndi mgugu, koma tsopano wakhumudwa. Nzeru zake zomwe zamgwetsa.

⁸Mapazi ake omwe amloŵetsa mu ukonde, ndipo wakodwa. Tsono kuti achokemo, wagweranso m'mbuna.

⁹Msampha wamkola mwendo, ndipo khwekhwe lamgwira.

¹⁰Amtchera msampha pansi mobisika, amtchera diŵa m'njira.

¹¹Zoopsa zikumchititsa mantha pa mbali zonse, zikumtsatira pambuyo pake.

¹²Adaali ndi mphamvu, koma tsopano ali ndi njala. Tsoka likumdikira nthaŵi zonse.

¹³Wagwidwa nthenda yoopsa thupi lonse, miyendo yake, manja ake, zonse zaola.

¹⁴Amuchotsa m'nyumba mwake m'mene ankadalira. Amkokera kwa Imfa, mfumu ya zoopsa zonse.

¹⁵M'nyumba mwake zake zonse zachotsedwamo, awazamo sulufule, kuti aphe tizilombo ta matenda.

¹⁶Mizu yake ikuuma pansi, nthambi zake zikufota.

¹⁷Sadzamkumbukiranso kwao kapena kwina kulikonse, dzina lake lidzaiŵalika.

¹⁸Adzamchotsa m'dziko la amoyo ndi kumponya mu mdima, adzampirikitsa pa dziko lapansi.

¹⁹Sadzaona zidzukulu m'banja mwake. Sikudzaoneka ana otsala kumene ankakhalako.

²⁰Anthu akuzambwe adabwa nalo tsoka lakelo, anthu akuvuma nawonso akungopukusa mitu.

²¹Ndithu zimenezi ndizo zimagwera anthu oipa. Kumeneku ndiye kutha kwake kwa anthu osasamala za Mulungu.” Yobe