Read Buku Loyera - Chichewa Yob. 19 Bible Online

Yob. 19 - Buku Loyera - Chichewa bible

Yob. 19

¹Tsono Yobe adayankha kuti,

²“Kodi mudzakhala mukundizunzabe mpaka liti? Chifukwa chiyani mukundilasa ndi mau anu?

³Mwakhala mukundinyoza kambirimbiri, Bwanji osachita manyazi kuti mukundisautsa?

⁴Ngakhale zitakhala zoona kuti ndachimwa, kuchimwakotu nkwanga.

⁵Ndithudi, mukuganiza kuti mukundipambana. Mukuti mavuto angaŵa akusonyeza kuchimwa kwanga.

⁶Koma tsono mudziwe kuti Mulungu ndiye wandichita zimenezi, ndiye amene wanditchera msampha umenewu.

⁷Ndithu, ndimafuula kuti, ‘Mayo, akundizunza ine!’ Koma palibe wondiyankha. Ndimapempha chithandizo, koma palibe wondichitira zolungama.

⁸“Mulungu wanditsekera njira, kotero kuti sindingathe kubzola. Njira yangayo waiphimba ndi mdima.

⁹Iye wandilanda ulemerero wanga, wandivula chisoti chaulemu.

¹⁰Wandiphwanyaphwanya mbali zonse, ndipo ndatheratu. Wandilanda chikhulupiriro changa, monga momwe amazulira mtengo.

¹¹Mulungu wandikwiyira, akundiyesa ngati mdani wake.

¹²Watumiza ankhondo ake ochuluka kuti adzalimbane nane. Akonzekeratu zodzandithira nkhondo pafupi ndi nyumba yanga.

¹³“Mulungu waumiriza abale anga kuti andikane. Wasandutsa odziŵana nane kuti akhale achilendo kwa ine.

¹⁴Achibale anga andithaŵa. Abwenzi anga anditaya.

¹⁵Anthu odzacheza kunyumba kwanga andiiŵala, Antchito anga nawonso sakundilemekeza, ndasanduka ngati wakudza m'maso mwao.

¹⁶Ndikaitana wantchito, sandiyankha, ndimachita kupemba kuti andichitire kanthu.

¹⁷Ngakhale mkazi wanga yemwe amaipidwa nane. Ndine chinthu chonyansa kwa abale anga a mimba imodzi.

¹⁸Ngakhale ana omwe amandinyoza, ndikamayenda amandinyodola.

¹⁹ Abwenzi anga onse apamtima amanyansidwa nane, amene ndinkaŵakonda kwambiri andiwukira.

²⁰“Ndangoti gwa kuwonda, moyo wanga wapulumukira pang'onong'ono.

²¹Mvereni chifundo, chonde mvereni chifundo, inu abwenzi anganu, poti dzanja la Mulungu landikantha.

²²Chifukwa chiyani mukundilondola ndinu ngati Mulungu? Kodi simudandizunze kokwanira?

²³“Ha, achikhala ena adaakumbukira mau anga! Ha, achikhala mauwo adaalembedwa m'buku!

²⁴Achikhala mauwo adaazokotedwa pa thanthwe ndi chitsulo, ndi kuthirapo mtovu kuti akhale mpaka muyaya!

²⁵“Mtheradi ndikudziŵa kuti Momboli wanga alipo, ndipo pa nthaŵi yomaliza adzabwera kudzanditeteza.

²⁶Khungu langa litatha nkuwonongeka, m'thupi langa lomweli ndidzamuwona Mulungu.

²⁷Ine ndemwe ndidzamuwona, osati winanso ai. Ndidzamuwona ndi maso angaŵa. Mtima wanga ukulifunitsitsa tsikulo.

²⁸Koma inu mukuti, ‘Ha, tingamzunze bwanji, popeza kuti zovuta zonsezi zaoneka chifukwa cha iye yemweyo?’

²⁹Inu muwope chilango, chifukwa ukali wa Mulungu umalangadi mosalephera. Motero mudzadziŵa kuti chiweruzo chilipo ndithu.” Zofari