Read Buku Loyera - Chichewa Yob. 20 Bible Online

Yob. 20 - Buku Loyera - Chichewa bible

Yob. 20

¹Zofari wa ku Naama adayankha kuti,

²“Iwe Yobe, wandipsetsa mtima. Nchifukwa chake ndikufulumira kuyankha.

³Ndikumva mau ondidzudzula ndi ondinyoza, koma ndadziŵa kale m'mene ndingathe kuyankhira.

⁴Kodi sukudziŵa zimene zidachitika masiku amakedzana, kuyambira nthaŵi imene munthu adalengedwa pa dziko.

⁵Kodi sukudziŵa kuti kukondwera kwa woipa nkosakhalira kutha? Kodi sukudziŵa kuti chimwemwe cha munthu wopanda Mulungu ncha kanthaŵi chabe?

⁶Ngakhale mbiri yake ifalikire ponseponse, ndipo ulemerero wake ukwere kufikira ku mlengalenga,

⁷adzatheratu monga momwe imatayikira ndoŵe yake. Amene ankamuwona azidzafunsa kuti, ‘Kodi uje uja ali kuti?’

⁸ Adzangozimirira ngati maloto, ndipo sadzapezekanso. Adzachotsedwa ngati zinthu zoonekera anthu kutulo usiku.

⁹Amene adamuwona kale sadzamuwonanso, sadzapezekanso kunyumba kwake.

¹⁰Ana ake adzabwezera zonse, zimene iyeyo adalanda anthu osauka.

¹¹Thupi lake ndi la nyonga zaunyamata, komabe nyongazo zidzatha naye limodzi m'fumbi.

¹²“Zoipa zimakhala zozuna kwa iye, nchifukwa chake amachita ngati kuzisunga m'kamwa mwake.

¹³Ngakhale safuna kuleka kuzivumata, nangozisunga m'kamwa mwakemo,

¹⁴zoipazo akazimeza, zimaloŵa m'mimba mwake. Zimasanduka ngati ndulu ya mphiri m'kati mwa iyeyo.

¹⁵Amapeza chuma, koma amachisanzanso. Mulungu amachitulutsa m'mimba mwa munthuyo.

¹⁶Zimene amadya zili ngati ululu wa mphiri, ndipo ululuwo udzamupha.

¹⁷Sadzaona mitsinje ya mafuta a olivi, kapena mifuleni ya madalitso a m'dziko lamwanaalirenji.

¹⁸Adzabweza zimene adapata pogwira ntchito. Sadzadyerera chuma chake. Sadzapeza mpata wokondwerera phindu la malonda ake.

¹⁹Pakuti adapondereza amphaŵi ndi kuŵasiya osaŵasamala, ndipo adalanda nyumba zimene sadamange ndiye.

²⁰“Chifukwa choti umbombo wake unali wosakata, sadzatha kusunga chilichonse chimene amakondwera nacho.

²¹Iyeyo ankati akadya, ankadyeratu zonse, tsono chuma chake chidatheratu.

²²Ngakhale ndi wachuma, adzakhala mmphaŵi. Mavuto aakulu adzamgwera.

²³Pa nthaŵi yoti adyerere chuma china, Mulungu adzamgwetsera ukali wamoto ngati mvula yosakata.

²⁴ Adzathaŵa mkondo wachitsulo, koma adzalasidwa chipyoza ndi muvi wamkuŵa.

²⁵Muviwo atautulutsa m'thupi mwake, atachotsa nsonga yake yonyezemira yobaya ndulu yake, iyeyo adzagwidwa ndi mantha aakulu.

²⁶Zonse zimene adazipeza, zazimirira ngati mu mdima. Moto wopanda woukwereza wamupsereza, watentha iyeyo pamodzi ndi zonse zotsalira m'nyumba mwake.

²⁷Zamumlengalenga zidzaulula zolakwa zake, za pansi pano zidzamuukira.

²⁸Chigumula cha madzi chidzaononga nyumba yake. Katundu wake yense adzachotsedwa pa tsiku la mkwiyo wa Mulungu.

²⁹Izi nzimene Mulungu amasungira munthu woipa. Ndizo zimene Mulungu adalamula kuti zikhale mphotho ya munthuyo.” Yobe