Read Buku Loyera - Chichewa Yob. 21 Bible Online

Yob. 21 - Buku Loyera - Chichewa bible

Yob. 21

¹Tsono Yobe adayankha kuti,

²“Mumvetsere bwino zimene ndikulankhula, kunditonthoza mtima kwanu kukhale komweko basi.

³Loleni ndilankhuleko, ndikatha kulankhula, munditonzeretonzere.

⁴Kodi ine ndimadandaulira munthu? Tsono ndilekerenji kupsa mtima?

⁵Mundipenye, ndipo mudabwe, mugwire dzanja pakamwa.

⁶Ndikaganiza zimenezo, ndimachita mantha, ndimanjenjemera kwambiri.

⁷“Kodi anthu oipa amakhaliranji moyo? Bwanji amafika mpaka ukalamba, ndi kusanduka amphamvu pa ulamuliro?

⁸Amaona zidzukulu zao, ana ao amakula bwino iwo akupenya.

⁹Mabanja ao amakhala pabwino opanda mantha, mkwapulo wa Mulungu suŵakhudza nkomwe.

¹⁰Ng'ombe zao zamphongo zimabereketsa nthaŵi zonse, ng'ombe zao zazikazi sizipoloza.

¹¹Ana ao amaseŵera pa bwalo, namavinavina ngati anaankhosa.

¹²Anawo amaimba, namaliza ng'oma ndi pangwe. Amakondwa pomva kulira kwa chitoliro.

¹³Masiku ao amatha iwowo akukondwa, amatsikira ku manda mwamtendere.

¹⁴“Anthuwo amauza Mulungu kuti, ‘Tichokereni! Sitifuna kudziŵa njira zanu.

¹⁵Kodi Mphambeyo ndaninso kuti tizimtumikira? Timapindula chiyani tikamapemphera kwa Iye?’

¹⁶Iwowo akuti amapambana chifukwa cha ntchito zao. Koma ineyo maganizo amenewo sindigwirizana nawo.

¹⁷“Nkangati nyale ya oipa idazimapo? Nkangati tsoka limaŵagwera? Nkangati Mulungu amaŵakwiyira naŵalanga?

¹⁸Nkangati amaŵachotsa ngati phesi louluka ndi mphepo, ngati mungu wouluzika ndi kamvulumvulu?

¹⁹Paja amati, ‘Mulungu amalanga mwana chifukwa cha machimo a bambo wake.’ Ai, koma Mulungu aŵabwezere chilango ochimwawo, kuti adziŵedi kuti Mulungu ndiye amalanga ochimwa.

²⁰Zoonadi ochimwawo alangidwe ndithu, alaŵe ukali wa Mphambe.

²¹Nanga kodi amalabadira chiyani za ana ao iyeyo atafa, chiŵerengero cha nthaŵi yake chitatha?

²²Kodi alipo wina woti angaphunzitse Mulungu nzeru, poti Iyeyo amaweruza ngakhale anthu apamwamba?

²³Ena amafa ali olemera kwambiri, ali pabwino, ndi pa mtendere.

²⁴Ndi onenepa, thupi lao lili nenjenenje! Ndiponso ali ndi chuma chambiri.

²⁵Koma ena amafa mtima wao uli woŵaŵa, osalaŵapo chabwino chilichonse.

²⁶Koma olemera ndi osauka omwe onsewo amafa naikidwa m'manda, ndipo amagwa mphutsi.

²⁷“Ndikudziŵa zimene mukuganiza, ndikudziŵanso chiwembu chanu chimene mukuti mundichite.

²⁸Inu mumafunsana kuti, ‘Kodi nyumba ya mkulu uja ili kuti? Kodi hema limene munkakhala anthu oipa aja lili kuti?’

²⁹Kodi simudaŵafunsepo anthu oyenda mu mseu? Nanga kodi simuvomereza zimene iwowo amanena?

³⁰Pa tsiku lakuti Mulungu alanga anthu, munthu woipa salangidwa konse. Amapulumuka pa tsiku loonekera mkwiyo wa Mulungu.

³¹Palibe ndi mmodzi yemwe amene amadzudzula munthu woipa, kapena kumbwezera zoipa zimene adachita.

³²Pamene aikidwa m'manda, anthu amachezera pa manda ake.

³³Anthu onse amatsatira mtembo wake. Amene amatsogola ndi osaŵerengeka, ndipo amakaika mtembo wakewo bwinobwino.

³⁴Nanga inu mudzandisangalatsa bwanji ndi mau opanda pake? Zimene mwayankhazi ndi mabodza okhaokha.” Elifazi