Read Buku Loyera - Chichewa Yob. 22 Bible Online

Yob. 22 - Buku Loyera - Chichewa bible

Yob. 22

¹Tsono Elifazi wa ku Temani adayankha kuti,

²“Kodi munthu nkukhala waphindu kwa Mulungu? Iyai, munthu wanzeru amangodzipindulira yekha basi.

³Kodi Mphambe angapeze bwino chifukwa cha kulungama kwako? Kodi kapena Iyeyo nkupindulapo kanthu pa makhalidwe ako angwirowo?

⁴Kodi nchifukwa choti umamuwopa, kuti azikudzudzula, kuti azifuna kukukokera ku mlandu?

⁵Kodi osati nchifukwa choti kuipa kwako nkwakukulu, ndipo kulakwa kwako nkopanda malire?

⁶“Iwe unkaumiriza pachabe abale ako kuti apereke chikole, ndipo unkaŵalanda zovala zao, mpaka kuŵasiya ali ndi usiŵa.

⁷Anthu otopa sudaŵapatse madzi akumwa, anthu anjala udaŵamana chakudya.

⁸Chifukwa cha mphamvu zako udalanda dziko lalikulu, chifukwa cha kudzikonda udakhazikika m'menemo.

⁹Akazi amasiye udaŵachotsa opanda kanthu, ndipo ana amasiye udaŵapondereza.

¹⁰Nchifukwa chake misamphayi yakuzinga, ndipo wadzidzimuka ndi mantha.

¹¹Kuli mdima ndipo sungathe kuwona kanthu, madzi achigumula akukumiza.

¹²“Kodi Mulungu sali kutalitali kumwamba? Ona nyenyezi zili m'mwamba kwambirizo, ona kutalika kwake pamene ziliripo!

¹³Komabe umanena kuti, ‘Kodi Mulungu amadziŵa chiyani? Wabisika ndi mitambo, nanga angatiweruze bwanji?

¹⁴Mitambo yakuda yamzinga, kotero kuti sangathe kuwona bwino, pamene akuyenda pamwamba pa thambopo.’

¹⁵“Kodi iwe ukufuna kuyendabe m'njira yakale imene anthu oipa ankayendamo?

¹⁶Iwowo adachotsedwa nthaŵi yao isanakwane, maziko ao adakokoloka ndi madzi.

¹⁷Anthuwo ankauza Mulungu kuti, ‘Chokani pali ife pano!’ Adatinso, ‘Kodi Mphambeyo nkutichita chiyani ife?’

¹⁸Chonsecho ndi Mulungu amene adaŵalemeretsa ndi zinthu zokoma. Nchifukwa chake ine ndekha ndiye maganizo a anthu oipa sindigwirizana nawo.

¹⁹Anthu abwino amaona zonse ndi kukondwa, anthu osachimwa amangoseka, akamaona oipa akulangidwa.

²⁰Amanena kuti, ‘Ndithudi, adani athu aonongedwa, zimene adazisiya zaonongeka ndi moto.’

²¹“Iwe Yobe, uziyanjana ndi Mulungu kuti ukhale pa mtendere, ukatero udzaona zabwino.

²²Uzimvera malangizo amene Iyeyo amaphunzitsa, uziikapo mtima pa mau ake.

²³Ubwerere kwa Mphambe modzichepetsa, uchotse zosalungama zonse zimene zimachitika m'nyumba mwako.

²⁴Golide wako yense umuyese wachabechabe, ndithu, chuma chamtengowapatali uchiwone ngati dothi,

²⁵Koma Mphambe ndiye akhale ngati golide wako, akhale ngati siliva wako wamtengowapatali.

²⁶Ukatero udzakondwa naye Mphambe, Udzaikapo mtima pa Mulungu mwamtendere.

²⁷Ukadzapemphera kwa Iye adzakumvera, udzapereka kwa Iye zija udalumbira kuti udzaperekazi.

²⁸Chimene wachitsimikiza kuti udzachite, chidzachitikadi, kuŵala kudzakuunikira pa njira zako zonse.

²⁹Pajatu Mulungu amagwetsa onyada, koma amapulumutsa odzichepetsa.

³⁰Amapulumutsa munthu wopanda mlandu, adzakupulumutsa iwenso ndi kulungama kwako.” Yobe