Read Buku Loyera - Chichewa Yob. 23 Bible Online

Yob. 23 - Buku Loyera - Chichewa bible

Yob. 23

¹Apo Yobe adayankha kuti,

²“Leronso ndikudandaula kwambiri kwa Mulungu. Ngakhale ndikubuula, Mulungu akundilangiralangira ndithu.

³Ha, ndikadadziŵa kumene ndikadampeza Mulungu, kuti ndikafike mpaka komwe amakhalako!

⁴Ndikadakamba mlandu wanga pamaso pake, bwenzi nditafotokoza zifukwa zanga zonse.

⁵Bwenzi nditamva mau amene akadandiyankha, bwenzi nditamvetsa zimene akadandiwuza.

⁶Kodi Mulungu akadalimbana nane ndi mphamvu zake? Ai, koma akadamva mau anga.

⁷Kumeneko munthu wolungama akadalankhula ndi Iye modekha. Wondiweruzayo akadandipeza wosalakwa nthaŵi zonse.

⁸“Taonani, ndikapita chakutsogolo, Iye kulibe kumeneko, ndikabwerera cham'mbuyo, sinditha kumupenya.

⁹Ndimamfunafuna kumanzere, koma osamuwona. Ndimayang'ananso kumanja, koma osampenya ndithu.

¹⁰Komabe Mulungu amadziŵa m'mene ndimayendera, akandiyesa adzapeza kuti ndine wangwiro ngati golide.

¹¹Mapazi anga akuponda m'mapazi mwake, ndasunga njira yake, ndipo sindidaitaye.

¹²Sindidapatuke kusiya malamulo ake. Ndasunga mau a pakamwa pake kupambana zofuna zanga zonse.

¹³“Iyeyo ndi wosasinthika, nanga ndani angathe kumsintha maganizo? Zimene wafuna, amazichitadi.

¹⁴Zimene adatsimikiza kuti adzandichita, adzachitadi, ndipo amalingalira zambiri zoterezi.

¹⁵Nchifukwa chake ndikuchita mantha kwambiri pamaso pake. Ndikaganiza za iyeyo, ndimaopa kwabasi.

¹⁶Mulungu walefula mtima wanga. Mphambe wandiwopsa.

¹⁷Wandichititsa mantha ndi Mulungu, osati mdima wa mavuto onse amene amandiphimbaŵa.”