Read Buku Loyera - Chichewa Yob. 24 Bible Online

Yob. 24 - Buku Loyera - Chichewa bible

Yob. 24

¹“Chifukwa chiyani Mphambe saikiratu nthaŵi yoti aweruze? Chifukwa chiyani amene ali olungama saŵaona masiku otero?

²Anthu ena amasendeza malire, kuti akuze dziko lao, amalanda ziŵeto namakazidyetsa ku mabusa ao.

³Amalanda abulu a ana amasiye, amalandanso ng'ombe za akazi amasiye, kuti zikhale chikole.

⁴Amapatutsa anthu osauka m'miseu, ndipo amapirikitsa amphaŵi onse.

⁵Amphaŵiwo amakafunafuna chakudya ku chipululu ngati mbidzi. Kulibe kwina koti apezere ana ao chakudya.

⁶Amakolola za m'minda ya eniake,[1] amakunkha mphesa m'minda ya anthu oipa.

⁷Amagona maliseche usiku wonse, pa nthaŵi yozizira amasoŵa chofunda.

⁸Amavumbwa ndi mvula yakumapiri, amakangamira ku thanthwe chifukwa chosoŵa pousa.

⁹Palinso ena amene amatsomphola ana a masiye ku bele, ndipo amagwira ana a mmphaŵi kuti akhale chikole.

¹⁰Amphaŵi amangoyenda maliseche kusoŵa chovala, amasenza mitolo ya tirigu ali ndi njala.

¹¹Amayenga mafuta a olivi m'minda ya anthu oipa, namapsinya mphesa, koma nkumamvabe ludzu.

¹²Anthu amene alikufa akubuula mumzindamo, anthu ovulala akulirira chithandizo. Komabe Mulungu sakusamalako mapemphero ao.

¹³“Pali ena amene amakana kuŵala, safuna kuyenda m'kuŵalako, ndipo sadziŵa njira zake.

¹⁴Wopha anzake amadzuka usiku kuti aphe osauka ndi amphaŵi. Nthaŵi ya usiku ena amasanduka mbala.

¹⁵Munthu wachigololo amadikira chisisira, namanena kuti, ‘Palibe woti angandiwone,’ ndipo amadzizimbaitsa nkhope.

¹⁶Mbala zimathyola nyumba usiku, masana zimadzitsekera, ndiye kuti zimapewa kuŵala.

¹⁷Onsewo kukada kwambiri, ndiye kuti kwaŵachera. Zoopsa za mdima woti goo ndiye bwenzi lao.

¹⁸“Munthu woipa amatengedwa ndi madzi a chigumula. Minda yake njotembereredwa m'dziko lonse. Sapitako kukagwira ntchito ku minda yake yamphesa.

¹⁹Monga momwe amasungunukira matalala nkuloŵa pansi chifukwa cha fundira, ndimo m'mene munthu wochimwa adzatsikire ku dziko la akufa.

²⁰Ngakhale mai wake adzamuiŵala, koma mphutsi zidzasangalala pomudya. Momwemonso woipayo adzathyoka ngati mtengo.

²¹“Zidzatero chifukwa choti adaŵachita nkhanza akazi amasiye, akazi opanda ana sadaŵachite zabwino.

²²Koma Mulungu amaononga anthu amphamvu. Anthuwo ngakhale atakhazikika, moyo wao ndi wosatsimikizika.

²³Mulungu angathe kumtchinjiriza munthu woipa ndi kumpatsa mtendere, koma amakhala akupenyetsetsa njira zake.

²⁴Woipayo amamkweza pa kanthaŵi kochepa, koma posachedwa saonekanso. Monga ena onse nayenso amafota ngati udzu, amagwa ngati ngala za tirigu akazidula.

²⁵Ndani angathe kukana kuti si momwemo? Kodi wina anganditsutse kuti mau angaŵa si oona?” Bilidadi