Read Buku Loyera - Chichewa Yob. 26 Bible Online

Yob. 26 - Buku Loyera - Chichewa bible

Yob. 26

¹Tsono Yobe adayankha kuti,

²“Iwe, kodi wandithandiza ine munthu wosauka ndi wofookane ngati?

³Kodi wandilangiza zabwino ine, munthu wopanda nzerune ngati? Kodi wandiwuza nzeru zambiri pamenepa ngati?

⁴Kodi ndani adzamva mau akoŵa? Nanga udazitenga kuti zonsezi?

⁵“Mizimu ya anthu akufa ikunjenjemera pansi pa nthaka, zonse zokhala m'madzi pansipo zikuvutika.

⁶Dziko la anthu akufa ndi lapululu pamaso pa Mulungu, ndipo kumeneko sikuphimbika kwa Iye.

⁷Mulungu adayala thambo lakumpoto pa phompho, adakoloŵeka dziko lapansi m'malo mwake, pamene panali popanda nkanthu komwe.

⁸Amasunga madzi ambiri m'mitambo yochindikira, koma mitamboyo sing'ambika.

⁹Amaphimba mwezi, amauphimba ndi mtambo wake.

¹⁰Madzi Mulungu adaŵalembera malire onga uta, motero adalekanitsa kuŵala ndi mdima.

¹¹Mizati yochirikiza thambo lakumwamba imanjenjemera ndi mantha, imazizwa pakumva kudzudzula kwa Mulungu.

¹²Ndi mphamvu zake adatontholetsa nyanja, ndi nzeru zake adakantha chilombo cham'madzi chija cha Rahabu.

¹³Ndi mpweya mwake adayeretsa zamumlengalenga, ndi dzanja lake adapha chinjoka chothaŵa chija.

¹⁴Zimenezi ndi pang'ono chabe za makhalidwe ake. Tingomva pang'ono za Iye ngati kunong'ona. Koma ndani angadziŵe kukula kwa mphamvu zake?”