Read Buku Loyera - Chichewa Yob. 28 Bible Online

Yob. 28 - Buku Loyera - Chichewa bible

Yob. 28

¹“Ndithudi, ulipo mgodi wa siliva, alipo malo oyengerapo golide.

²Chitsulo amachikumba pansi, mkuŵa amachita kuusungunula ku miyala yamkuŵa.

³Anthu amaloŵa mu mdima atatenga nyale namafunafuna miyalayo mpaka ku malire a mgodiwo, akuyenda mu mdima wandiweyani.

⁴Amakumba njira zapansi mumgodimo, kutali ndi kumene kumakhala anthu, mpaka kuiŵalika ndi anthu onka nayenda, amakhala ali lende pansipo, namazunguzika uku ndi uku.

⁵Nthaka imatulutsa chakudya, koma kunsi kwake kumachita ngati kofwantchuka ndi moto.

⁶Miyala yamumgodimo ndi ya safiro, mulinso fumbi la golide.

⁷“Njira ya mu mgodi imeneyi, palibe mbalame yodya zinzake imene imaidziŵa, kamtema yemwe sanaiwone.

⁸Zilombo zolusa sizinapondemo m'njiramo. Mkango sunadzeremo m'menemo.

⁹“Anthu amaphwanya matanthwe olimba, amagadabula mapiri kuyambira m'tsinde.

¹⁰Amasema mipita m'matanthwemo, ndipo amatulutsamo miyala ya mtengo wapatali.

¹¹Amaletsa mitsinje yapansipo kuti isayende, motero amaonetsa poyera zinthu zobisika.

¹² “Koma nzeru zingapezeke kuti? Luntha lingapezeke kuti?

¹³ Anthu sadziŵa kufunika kwake kwa nzeruzo, ndipo sizipezeka pa dziko lino lapansi.

¹⁴Phompho likuti, ‘Sizipezeka mwa ine muno,’ nyanja ikuti, ‘Mwa ine munonso ai.’

¹⁵Nzeru sangazipate ndi golide, mtengo wake sangauyerekeze ndi siliva wambiri.

¹⁶Ngakhale golide wokoma kwambiri wa ku Ofiri sangafike pa mtengo wa nzeruzo, miyala ya onikisi kapena ya safiro nayonso singafikepo.

¹⁷Golide ndi mwala wagalasi sizingakwanire kuti agulire nzeru. Nzeru sangazisinthanitse ndi zokometsera za golide weniweni.

¹⁸Mtengo wake wa nzeru ndi woposa miyala ya korali ndi krisitala, umapambananso ndi miyala ya rubi yomwe. Mtengo wake wa nzeru umapambana ndi ngale zomwe.

¹⁹Miyala ya topazi ya ku Etiopiya sungaiyerekeze ndi nzeru, ngakhale golide wabwino kwambiri sangafikepo pa nzeru.

²⁰“Kodi tsono nzeru zimachokera kuti? Nkuti kumene tingapeze luntha?

²¹Malo ake ndi obisika kwa zamoyo zonse, ndi obisikanso kwa mbalame zamumlengalenga.

²²Ngakhale malo a chiwonongeko ndiponso imfa zimangoti, ‘Tidangomva mphekesera chabe ya zimenezo.’

²³“Mulungu yekha ndiye amadziŵa njira yake yopita kumeneko, amadziŵa kumene nzeruzo zimakhala.

²⁴Paja Iye amayang'ana mpaka ku mathero a dziko lapansi, amaona zonse zimene zili kunsi kwa thambo.

²⁵Pamene Iye adapatsa mphepo mphamvu zake, nayesa kuzama kwa nyanja,

²⁶pamene adakhazika lamulo loti mvula izigwa, nakonza njira za ching'aning'ani cha bingu,

²⁷ pamenepo mpamene adaona nzeruzo naziyesa mtengo wake, ndipo adazikhazikitsa ndi kuzisanthula bwino lomwe.

²⁸Choncho adauza munthu kuti, ‘Kuwopa Ambuye ndiye nzeru zimenezo, kuthaŵa zoipa ndiye luntha limenelo.’ ” Yobe