Read Buku Loyera - Chichewa Yob. 29 Bible Online

Yob. 29 - Buku Loyera - Chichewa bible

Yob. 29

¹Yobe adapitiriza nati,

²“Ha, ndikadabwerera mwakale monga m'mene ndinkakhalira pa nthaŵi yamakedzana, pa masiku amene Mulungu ankandisunga bwino.

³Nthaŵi imeneyo Mulungu anali nane, nyale yake inkandiwunikira mu mdima.

⁴Masiku amenewo ndinali pabwino zedi, madalitso a Mulungu anali pabanja panga.

⁵Nthaŵi imeneyo Mphambe anali nane, ana anga ali kwete m'mbalimu.

⁶Nthaŵi imeneyo ng'ombe ndi mbuzi zanga zinkandipatsa mkaka wambiri, mitengo yanga ya olivi inkamera ndi m'matanthwe momwe.

⁷Pamene ndinkapita ku chipata cha mzinda, pamene ndinkakonzekera zokakhala nawo pabwalopo,

⁸anyamata akandiwona ankapatuka, ndipo madoda ankadzambatuka nkukhala chilili.

⁹Akalonga ankakhala chete, atangoti pakamwa gwirire.

¹⁰Atsogoleri ankangoti duu, lilime litangoti nganganga ku nkhama.

¹¹Aliyense womva za ine, ankanditchula kuti ndine wodala, aliyense wondiwona ankandilemekeza.

¹²Zidatero chifukwa choti ndinkapulumutsa amphaŵi olira, ndinkalanditsa ana amasiye opanda woŵathandiza.

¹³Anthu amene anali pa zoopsa kwambiri ankanditamanda, akazi amasiye ndinkaŵasangalatsa.

¹⁴Nthaŵi zonse ndinkachita zoyenera, ntchito zanga zonse zinali zangwiro.

¹⁵Ndinali ngati maso kwa anthu osapenya, ndinali ngati mapazi kwa anthu opunduka.

¹⁶Osauka ndinali ngati bambo wao, anthu osaŵadziŵa konse ndinali mtetezi wao pa milandu.

¹⁷Ndinkaononga mphamvu za anthu ankhalwe, ndinkalanditsa amene anali atagwidwa.

¹⁸“Tsono mumtimamu ndinkati, ‘Ndidzafera pakati pa ana anga, masiku a moyo wanga ndidzaŵachulukitsa kwambiri ngati mchenga.

¹⁹Ndinali ngati mtengo umene mizu yake yatambalalira ku madzi umene masamba ake ndi onyowa ndi mame.

²⁰Aliyense ankandilemekeza, nthaŵi zonse mphamvu zanga zinali ngati uta wolimba.’

²¹“Anthu ankamvetsera zimene ndinkanena, ankadikira atakhala chete kuti amve malangizo anga.

²²Ine nditalankhula, iwowo sankalankhulanso, mau anga ankaŵagwira mtima.

²³Ankayembekeza ine monga momwe amayembekezera mvula, ankangoti kukamwa yasa ngati anthu odikira mvula yam'malimwe.

²⁴Ndinkaŵasekerera pamene iwowo analibenso chikhulupiriro, kukoma mtima kwanga kunkaŵalimbitsa mtima.

²⁵Ndinkasankhula njira yao, ndipo ndinkaŵatsogolera ngati mfumu, tsono ndidakhazikika pakati pao, ngati mfumu pakati pa ankhondo ake, ndinali ngati msangalatsi pakati pa olira.”