Read Buku Loyera - Chichewa Yob. 3 Bible Online

Yob. 3 - Buku Loyera - Chichewa bible

Yob. 3

¹ Pambuyo pake Yobe adalankhula, nayamba kutemberera tsiku lake lobadwa.

³“Tsiku limene ine ndidabadwa litembereredwe, nawonso usiku umene mai wanga adatenga pathupi pa ine utembereredwe.

⁴Tsiku limenelo lisanduke lamdima. Mulungu kumwambako asaliganizirenso tsiku limenelo, kuŵala kusadzaonekenso pa tsikulo.

⁵Tsikulo likhale la mdima wabii, likhale lamikhwithi, mdima wake ukhale woopsa.

⁶Usiku umenewo ukhale wa mdima wandiweyani. Tsiku limenelo lisakhalenso pamodzi ndi masiku a pa chaka, lisaŵerengedwerenso kumodzi ndi masiku a pa miyezi.

⁷Ndithu usiku umenewo usabweretsenso chabwino chilichonse, kusamvekeponso nthungulu zachikondwerero usikuwo.

⁸Odziŵa kutemberera masiku, alitemberere tsikulo, ndiye kuti odziŵa kuutsa Leviyatani, chilombo cham'nyanja chija.

⁹Nyenyezi zake zambandakucha zisaŵale. Tsikulo liyembekeze kucha, koma pachabe. Lisaonenso kuŵala kwa mbandakucha.

¹⁰Tsiku limenelo litembereredwe, chifukwa ndi limene ndidatuluka m'mimba mwa mai wanga, ndipo ndi limene lidandiwonetsa zovuta.

¹¹“Bwanji sindidangobadwa wofaifa! Bwanji sindidangoti badwu nkufa!

¹²Chifukwa chiyani mai wanga adandifukata? Chifukwa chiyani adandiyamwitsa?

¹³Ndikadafa pobadwa pomwe, bwenzi ndikukhala nditagona mwaphee, kungogona tulo, ndi kumangopumula.

¹⁴Bwenzi ndikukhala limodzi ndi mafumu ndi aphungu a pa dziko lapansi, amene adadzimangira nyumba zikuluzikulu pa mabwinja akale.

¹⁵Bwenzi ndikukhala limodzi ndi mafumu okhuphuka, amene adadzaza nyumba zao ndi golide ndi siliva.

¹⁶Bwenzi sindidangokhala ngati mtayo woikidwa m'manda, ngati makanda amene sadaonepo kuŵala kwa dzuŵa.

¹⁷Kumandako anthu oipa savutitsanso, anthu otopa akupumula kumeneko.

¹⁸Am'ndende akupeza nawo mtendere kumeneko, sakumvanso mau ankhanza a kapitao wa ndende.

¹⁹Anthu wamba ndi apamwamba omwe ali pamodzi kumeneko, kapolo ndi womasuka kwa mbuyake.

²⁰“Chifukwa chiyani dzuŵa limamuŵalira munthu wapamavuto? Chifukwa chiyani amakhalabe ndi moyo munthu wa mtima woŵaŵa?

²¹ Amalakalaka imfa, koma osaiwona, amaifunafuna kupambana chuma chobisika.

²²Amakondwa ndi kusangalala kwambiri akafa ndi kuikidwa m'manda.

²³Chifukwa chiyani moyo umapatsidwa kwa munthu amene njira ya moyo wake yabisika, amene Mulungu wamzinga ndi mavuto ponseponse?

²⁴M'malo moti ndidye, ndimalira, ndipo kubuula kwanga nkosalekeza.

²⁵Zimene ndinkaziwopa zachitika ndithu, zimene ndinkachita nazo mantha zandigweradi.

²⁶Ine sindipeza mtendere kapena bata, sindiwona mpumulo, koma mavuto okhaokha.”